81
ZABULI YA 81
(Zabuli ya Asafu. Kwa kilanja, yatumie modeli wa Gititi.)
1 Mwimbileni kwa deng'ho Imulungu yeli na nguvu zose,
guteni kwa deng'ho kwa Imulungu wa Yakobo.
2 Songeni lwila, toweni ngoma ndodo,
toweni bango kwa sauti inogile.
3 Toweni mhalati mbalamwezi yahema,
na kipindi cha mbalamwezi yahakangala,
kipindi cha nyimwilinyimwili yetu.
4 Dino lagizo kwa Izilaeli,
na lagizo da Imulungu wa Yakobo.
5 Kaditenda diwe amuli kwa iwanhu wa Izilaeli,
viwasegele mwiisi ya Misili,
kuko kutuhulike ulonzi hatuutangile.
6 “Nisegesa mzigo mmaega gao,
makono gao gafunguligwa mkigelo.
7 Mmagazo gako kunikema na niye nikukombola,
nikwidika mmawingu ga kuduma,
nikugeza mmazi ga Meliba.
8 Mweye wanhu zangu tegelezeni na niye nowazuma,
maza mnitegeleze niye mweye Izilaeli.
9 Sikumuwe na imulungu iyagwe hagati yenu,
sikumumtambikile imulungu iyagwe.
10 Niye ayo Mndewa Imulungu wako,
nikulavile mwiisi ya Misili.
Yahama mulomo wako na niye nokudima.”
11 “Lakini wanhu zangu hawalondile kunihulika,
Waizilaeli walema kunitegeleza.
12 Avo niwaleka muudulu wa mizoyo yao,
wakweleleze nzila zao wenyego.
13 Maza wanhu wangu wanitegeleze,
maza iwanhu wa Izilaeli wahakweleleze nzila zangu,
14 nahawagomese iwanhu owehila himahima,
na kuhindula mkono wangu kwa awo owehila.
15 Waja omwihila Mndewa Imulungu wahaidulike kumwake,
na nhaguso yao yahasigale milele.
16 Lakini mweye mwahagweleligwe ngano inogile,
na kushiba kwa uki ulawa kudibwe.”