83
ZABULI YA 83
(Lwila na Zabuli ya Asafu.)
1 Gweye Imulungu, sikuunyamale tuluu,
sikuunyamale gweye Imulungu ututaze.
2 Lola iwanhu okudeta ogala ndwagi,
lola iwanhu okwihila okwinula mapala gao.
3 Kwa moyo wihile opanga kutenda gehile kwa iwanhu wako,
opanga kutenda gehile kwa awo uwanogela.
4 Olonga, “Izoni, tuwabanange kamba isi,
ili twaga da Izilaeli sikudikumbukwe kabili.”
5 Kwa nzila imoja ogelegeza gehile,
oilumba mbuli yako,
6 wanhu wa Edomu na Waishimaeli,
Wamoabu na Wahagali,
7 wanhu wa Gebali na Amoni na Amaleki,
na Ufilisiti, hamoja na iwanhu wa Tilo.
8 Vivija Ashulu wailumba na hewo,
kuwagwaa nguvu ulelo wa Lutu.
9 Uwatendele kamba vuuwatendele Wamidiani,
na kamba vuuwatendele Sisela na Yabini ako kuulwanda lwa Kishoni,
10 awo wakomigwe ako Endoli,
na wakala kamba zalala mwiisi yose.
11 Watende iwakulu wao kamba Olebu na Zeebu,
na iwatawala wao kamba Zeba na Zalimuna,
12 walongile, “Leka tuhasole hanhu ha kudimila ha Imulungu.”
13 Gweye Imulungu wangu wahembeluse,
kamba timbwisi da kivula vumbi,
kamba mipepe ihembeluswa na beho.
14 Kamba moto ulukuza muhulo,
hebu kamba lambi da moto dilukuza kigongo,
15 avo wakweleleze kwa beho jako,
na uwadumbize kwa ng'humbi yako.
16 Gubika vihanga vao kwa kinyala,
ili wadizahile twaga jako, gweye Mndewa Imulungu.
17 Hewo wagwe kinyala na kuwa na bwembwe milele,
hewo na wapotele kwa kinyala.
18 Waleke wajuwe kamba gweye wiiyeka,
gweye twaga jako Mndewa Imulungu,
gweye ayo ukalaga Uchanha Ng'hani ya isi yose.