84
ZABULI YA 84
(Kwa kilanja, yatumie modeli wa Gititi. Zabuli ya wanhu wa ulelo wa Kola.)
1 Gweye Mndewa Imulungu, uli na nguvu zose,
ako kuukala kunoga ng'hani.
2 Moyo wangu osulukila ng'hani ng'anda ya Mndewa Imulungu,
moyo wangu na lukuli lwangu vomwimbila Imulungu yeli mgima.
3 Hata nhongwa kazenga mvulu ya kuwasa,
kinega kazenga kisanza chake,
mumo kageka makinda gake,
behi na upango wako wa nhosa,
gweye Mndewa Imulungu,
Mndewa wangu na Imulungu wangu.
4 Wamweda iwanhu okala mng'anda yako,
okutogola gweye siku zose.
5 Wamweda iwanhu wene nguvu zako,
na nzila za kuchola Sayuni zammo mmizoyo yao.
6 Wahabita kubonde da Baka,
oditenda hanhu ha nzasa,
vivija mvula za vuli zomemeza masimo.
7 Ogendelela kulawa nguvu mbaka nguvu,
mbaka kila imoja yovika kuulongozi wa Imulungu ako Sayuni.
8 Gweye Mndewa Imulungu uli na nguvu zose,
tegeleza vinikupula,
tegeleza gweye Imulungu wa Yakobo.
9 Gweye Imulungu umulole mndewa yeli ngao yetu,
mulole kwa ganogile imunhu yumsagule.
10 Siku dimoja kukala kuuluwa lwako,
kunoga kubanza kukala siku elufu imoja hanhu hayagwe,
vinoga nahakuwile mkalizi wa ng'anda ya Imulungu wangu,
kubanza kukala mmahema ga iwanhu wehile.
11 Kwavija gweye Mndewa Imulungu ayo zuwa na ngao,
Mndewa Imulungu kolava ganogile na ukulu,
huwanyima kinhu chochose kinogile,
iwanhu welibule kitala.
12 Gweye Mndewa Imulungu uli na nguvu zose,
kamweda imunhu yokutamanila gweye.