88
ZABULI YA 88
(Lwila na Zabuli ya wanhu wa ulelo wa Kola. Kwa kilanja, yatumie modeli wa Mahalati Leanoti. Zabuli ya Hemani Mwezilahi.)
1 Gweye Mndewa Imulungu unikombole,
nilila kuulongozi wako imisi na ikilo.
2 Kupula kwangu kuvike kuulongozi wako,
uhulike ndilo yangu.
3 Kwavija zoyo jangu dimema magazo,
ugima wangu wabehi kwisha.
4 Nipetwa mna iwao ochola kudisimo,
sambi nokala kamba munhu yelibule nguvu.
5 Nibagulwa hamoja na iwanhu wadanganike,
kamba iwanhu wachinjigwe owasa mmapanga,
awo hawakumbuka chochose,
awo walekigwe na ukalizi wako.
6 Kunitupa mdisimo dingile gidigidi,
kugati kudiziza totolo.
7 Ng'hasiliki yako ibanza kumwangu,
kunizola kwa ng'humbi yako.
8 Kunibagula na iwambwiga zangu wose,
na kunitenda ngevuzo kumwao,
kunikimilila na sidaha kutoloka.
9 Meso gangu gaziza mbuli ya giogio.
Gweye Mndewa Imulungu nokukema kila siku,
nokwinulila gweye makono gangu.
10 Vino kowalagusila iwanhu wadanganike unzonza wako?
Vino mizimu yokwinuka na kukugwaa nhogolwa?
11 Vino unogelo wako hawishaga olongigwa ako kudipanga?
Vino wanhu osimulila vuutamanilwa ako kuubananzi?
12 Vino unzonza wako ojuwigwa kudiziza?
Vino sang'hano zako za haki zojuwigwa mwiisi ya wasemwigwe?
13 Lakini nokulilila gweye Mndewa Imulungu,
imitondo kupula kwangu kokuvikila gweye.
14 Gweye Mndewa Imulungu,
habali konilema na kokifisa kihanga chako?
15 Tangu ubwanga wangu nigazwa na nilonda kufa,
nogaya kwa bwembwe jako na niye nibwela kuchugu.
16 Ng'hasiliki yako ibita uchanha yangu,
bwembwe jako dinibananga.
17 Imisi yose vonisuwilila kamba mazi mengi,
nizungulukwa wose.
18 Kuwasegesa mbwiga zangu na awo niwanogela,
ziza digalamuka mbwiga zangu wa behi.