89
ZABULI YA 89
(Zabuli ya Etani Mwezilahi.)
1 Go Mndewa Imulungu,
nokwimba unogelo wako hawishaga milele,
kwa mulomo wangu nolonga kutamanilwa kwako,
ujuwigwe ulelo wose.
2 Nolonga kamba unogelo wako hawishaga okala milele,
na kutamanilwa kwako kugangamala kamba ulanga.
3 Kulonga, “Nitenda lagano na ija inimsagule,
niiduwila kwa msang'hanaji wangu Daudi,
4 ‘Nowimiza ulelo wako milele,
na nougangamiza undewa wako ulelo wose.’ ”
5 Gweye Mndewa Imulungu, ulanga otogola unzonza wako,
vivija kutamanilwa kwako mumting'hano wa iwanhu ong'ala.
6 Kwavija nani uchanha kuulanga yoilinga na Mndewa Imulungu?
Nani mna iviumbe va kuulanga yalingile kamba Mndewa Imulungu?
7 Kumting'hano wa iwanhu wa Imulungu, Imulungu kodumbigwa ng'hani,
kodumbigwa kubanza wose omzunguluka.
8 Gweye Mndewa Imulungu uli na udahi wose,
nani kamba gweye?
Gweye Mndewa Imulungu, gweye mwene nguvu,
na kutamanilwa kwako kokuzunguluka.
9 Gweye kotawala bahali imemile ng'humbi,
kipindi ng'humbi yake viinuke gweye koihoza.
10 Gweye kudihonda dizoka Lahabu kamba imoja wa iwanhu wachinjigwe,
kwa mkono wako wenye nguvu kuwapwililisa iwanhu okwihila.
11 Ulanga wako gweye na isi vivija yako,
kwika chandusilo mwiisi hamoja na vose vili mumo.
12 Kulumba kasikazini na kusini,
Lugongo lwa Taboli na Helimoni vokwimba twaga jako kwa deng'ho.
13 Mkono wako umema udahi,
mkono wako una nguvu,
mkono wako wa ukudila otogoligwa.
14 Haki na nhaguso acho chandusilo cha kigoda chako cha undewa,
unogelo hawishaga na kutamanilwa vokulongolela.
15 Wamweda iwanhu oifunza kukutogola kwa deng'ho,
otembela mdilenge da kung'ala kwako, gweye Mndewa Imulungu.
16 Odeng'helela twaga jako imisi yose,
odeng'helela mna ihaki yako.
17 Kwavija gweye kwa ukulu na nguvu yao,
kwa ganogile gako topata mhumo.
18 Go Mndewa Imulungu, mkalizi wetu kalawa kumwako,
mndewa wetu kolawa kumwako gweye Ung'alile wa Izilaeli.
19 Kulonga mkipindi fulani mzinzozi,
kwa iwanhu wako otamanilwa kulonga,
“Nimgwaa nguvu digalu,
nimwinula mbwanga hagati ya iwanhu.
20 Nimpata Daudi msang'hanaji wangu,
nimgidila mavuta gangu gong'ala.
21 Ganza jangu domgogeleza,
mkono wangu omgela nguvu.
22 Haduhu imunhu yomwihila yonda yamuhume,
haduhu munhu yehile yonda yamonele.
23 Nowahonda iwanhu omwihila kuulongozi wake,
na awo omdeta nowabananga.
24 Kutamanilwa kwangu na unogelo wangu hawishaga okala hamoja na heyo,
kwa twaga jangu kopata mhumo ng'hulu.
25 Nougangamiza utawala wake na nguvu,
kulawa bahali mbaka lwanda.
26 Na heyo konikema, ‘Gweye kwa tatangu,
Imulungu wangu, dibwe da ukombola wangu.’
27 Vivija nomsagula yawe chaudele wangu,
yeli mkulu kubanza iwandewa wose wa mwiisi.
28 Nowika unogelo wangu hawishaga kumwake milele,
na lagano jangu na heyo dogangamala.
29 Nowika ulelo wake milele,
kigoda chake cha undewa kamba ulanga vuukala milele.
30 Kamba wanage ogaleka malagizo gangu,
hawagakweleleza mafundizo gangu,
31 kamba odilema lagizo jangu,
na ogasemwa gaja ganiwalongele,
32 noikoboza nzambi yao kwa fimbo,
gehile gao kwa kuwatowa.
33 Lakini siusegesa unogelo wangu hawishaga kumwake,
na sileka kutamanilwa kwangu.
34 Niye sibena lagano jangu,
na sihindusa dija dilongigwe na mulomo wangu.
35 Mwanza umoja na kwa siku zose,
niiduwila kwa kung'ala kwangu,
na niye simvizila Daudi,
36 kamba ulelo wake osigala milele,
na kigoda chake cha ukulu chosigala kuulongozi wangu kamba zuwa.
37 Chosigala milele kamba mbalamwezi,
msindila yotamanilwa kuulanga.”
38 Lakini sambi gweye kumulema,
kumbezeli na kumgevuzikila ayo yuumgidile mavuta gako.
39 Kudilema lagano jako na msang'hanaji wako,
na kuifitiza taji yake kuditimbwisi.
40 Kubomola ng'huta zake zose,
na ngome zake zose kuzitenda kamba vihame.
41 Wanhu obita behi wamboka vinhu vake,
kagalamka kilozo kwa iwanhu okala behi na heyo.
42 Kuwagwaa mhumo iwanhu omwihila,
kuwatenda iwanhu omdeta wadeng'helele.
43 Kuhindusa ukali wa sime jake,
na humtazile kung'hondo.
44 Kumambukiza kuitapa kwake,
na kukibwanha kigoda chake cha undewa.
45 Kuzihungula siku za ubwanga wake,
kumgubika kwa kiwalo cha kinyala.
46 Mbaka lini gweye Mndewa Imulungu koifisa milele?
Ng'hasiliki yako yokwaka kamba moto mbaka lini?
47 Kumbuka ugima wangu vuubita himahima.
Kwa kinhu gani kuwalumba iwanhu wa mwiisi?
48 Nani yokala mgima na hafa bule?
Hebu kodaha kuikombola mwenyego mwiiifa?
49 Mndewa Imulungu wa kwahi unogelo wako hawishaga wa aho haichanduso,
kwa kutamanilwa kwako kuiduwila kwa Daudi?
50 Mndewa Imulungu kumbuka msang'hanaji wako viyolongigwa,
lola vinigela kumgongo kubezeli kwa iwanhu wa isi yose.
51 Wanhu wanideta na kunyonela,
gweye Mndewa Imulungu.
Wanilonga kila kinhu kinhenda niye yuunigidile mavuta gako.
52 Mndewa Imulungu yatogolwe, milele.
Ona na Ona.