90
ZABULI YA 90
(Kupula kwa Musa, munhu wa Imulungu.)
1 Go Mndewa Imulungu,
gweye kwa kae yetu muulelo wose.
2 Vigongo ving'hali havinakoneka,
na gweye ung'hali hunalumba isi yose,
gweye kwa Imulungu kulawa milele mbaka milele.
3 Kowabweza iwanhu kuditimbwisi,
gweye kolonga, “Bweleni kuditimbwisi, mweye iwanhu.”
4 Kwavija kumwako miyaka elufu kamba siku imoja ibitile,
hebu kamba kuwasilila kilo kimoja.
5 Kowasegesa iwanhu muutulo wa ifa,
na hewo kamba mijani mibisi ya imitondo.
6 Hamoja imitondo yozuka,
ichungulo yoholola na kunyala.
7 Tubanangwa kwa ng'hasiliki yako,
na ukali wako otudumbiza.
8 Kugeka gehile getu kuulongozi wako,
nzambi zetu za kinyelegezi zokoneka mumng'alo wako.
9 Tukala siku zetu zose hasi ya ng'hasiliki yako,
twishiliza miyaka yetu kamba mhumuzi.
10 Siku zetu za kukala miyaka malongo saba,
kamba tuna nguvu tokala miyaka malongo nane,
lakini miyaka yose imema magazo na madununzo,
na yobita himahima na siye tolawanya.
11 Nani yojuwa nguvu ya ng'hasiliki yako?
Kwihilwa kwako kamba vitulondigwa kukudumba gweye.
12 Tufunze kuzipeta siku zetu vinogile,
ili tupate ubala.
13 Gweye Mndewa Imulungu, uwe na bazi!
Kokawa mbaka lini?
Tonele bazi wasang'hanaji wako.
14 Imitondo unishibishe unogelo wako hawishaga,
ili twimbe kwa deng'ho na tudeng'helele siku zose.
15 Utudeng'heze kamba zisiku vuutukoboze,
kamba miyaka itugazigwe.
16 Sang'hano zako zoneke kwa wasang'hanaji wako,
ukulu wako kwa wanao.
17 Utonele bazi gweye Mndewa Imulungu, Imulungu wetu,
uzimize sang'hano za makono getu,
ona uzimize sang'hano za makono getu.