3
Lusi kozahililigwa mbigalo
1 Siku dimoja Naomi kamulongela mkwe yake Lusi, “Mndele wangu nolondigwa nikuzahilile mbigalo ili umbwihile na umwede.
2 Avo ino Boazi, yuusang'hane hamoja na iwasang'hanaji zake, ndugu yetu wa usungu, avo tegeleza, ichungulo kokuwa kobeta shaili hanhu ha kubigila.
3 Avo genda ukoge abaho ubakale mavuta na uvale viwalo vinogile, abaho uchole hanhu hoobigila shaili Boazi, sambi uilaguse kumwake mbaka vonda yamambukize kuja na kung'wa.
4 Vivija uhajuwe hanhu honda yawase. Yahasonga kukukila, uchole mholemhole ugubule umgolole mmagulu gake na uwase baho. Heyo kokulongela daukutenda.”
5 Lusi kamulongela, “Notenda gose gaunilongele.”
6 Avo Lusi kachola hanhu hoobigila, katenda kamba viyalongeligwe na mama mkwe yake.
7 Boazi viyamambukize kuja na kung'wa na kasamhuka, kachola behi na ikichele cha shaili kawasa. Lusi kachola mholemhole kagubula umgolole hana gamagulu ga Boazi na kawasa baho.
8 Kilo kikulu, Boazi kasinhuka, kahinduka, kasinhuka kumona mtwanzi kawasa mmagulu gake.
9 Kamuuza, “Gweye kwa nani?” Lusi kamwidika, “Niye na Lusi msang'hanaji wako. Kwavija gweye kwa ndugu yangu wa usungu na kolondigwa kunilola goya, ngubika na mhindo ya mgolole wako uchanha ya niye msang'hanaji wako kamba kilaguso cha kunikaliza.”
10 Boazi kamulongela, “Mndele wangu Mndewa Imulungu yakutendele ganogile, kwavija gose gautenda sambi ganoga kubanza gaja gautendile aho haichanduso, kwavija huwazahile wabwanga wagoli hebu wakiwa wakusole.
11 Avo mndele wangu sambi udumbe, niye nokutendela gose goulonda kwavija kila munhu mdibuga dino koijuwa tabiya yako inogile.
12 Kweli niye nolondigwa nikulole goya, lakini hana ndugu wa behi yolondigwa kukulola goya kubanza niye.
13 Gweye, wasa hano kilo kino, mayo imitondo tojuwa yahatogola kukulola goya vinoga, lakini kamba yahalema kukulola goya, kwa twaga da Mndewa Imulungu yeli mgima noiduwila niye nokulola goya. Wasa hano mbaka imitondo.”
14 Avo Lusi kawasa mmagulu ga Boazi mbaka imitondo, ulukwili kalamuka ili sambi yoneke, kwavija Boazi halondile munhu yajuwe kamba mtwanzi kakala hanhu ha kubigila shaili.
15 Boazi kamulongela, “Tandika hasi kiwalo chako kiuvalile.” Lusi katandika ikiwalo chake na Boazi kampimila mgelo umoja wa shaili, kamdikwa na heyo kabwela kudibuga.
16 Viyavikile kwa mama mkwe yake kauzigwa, “Iwaze mndele wangu?” Lusi kamsimulila gose gayatendeligwe na Boazi.
17 Abaho kalonga, “Kanilongela sambi nibwele makono gaiyeka kwa mama mkwe yangu avo kanipimila mgelo umoja wa shaili.”
18 Naomi kamulongela, “Avo mndele wangu beta tanhu tulole chonda kilawilile, kwavija Boazi honda yatogole mbaka mbuli ino vonda ikale goya lelo.”