2
Lusi kosang'hana mumgunda wa Boazi
1 Kukala na munhu yokemigwa Boazi yolawa mulukolo lumoja na Elimeleki imkasano wake Naomi. Boazi kakala mgoli ng'hani.
2 Siku dimoja, Lusi immoabu kamulongela Naomi, “Nhogolela ny'hole kumngunda nikasalate vija visigale kusengigwa, kwa munhu yoyose yonhogolela nisalate kukisogo chake.” Naomi kamulongela, “Genda, mndele wangu.”
3 Avo Lusi kachola kumgunda kusalata vija visigale. Ilawilila bila kujuwa kakala kumgunda wa Boazi, yuja yakalile lukolo lumoja na Elimeleki.
4 Vikibitile kipindi kidogo, Boazi kavika kulawa Beselehemu kawalamusa wasengaji, kawalongela, “Mndewa Imulungu yawe na mweye.” Na hewo wamwidika, “Mndewa Imulungu yakutendele ganogile.”
5 Abaho Boazi kamuuza imwimilizi wa iwasengeji, “Vino, mndele yuja iyo nani?”
6 Ija imwimilizi kamulongela, “Ija imndele Mmoabu yezile hamoja na Naomi kulawa kuna iisi ya Moabu.
7 Kanipula yasalate vija vilekigwe na wasengaji. Avo keza kasalata tangu imitondo, sambi baha kachola kuhumula mkibanda.”
8 Avo Boazi kamulongela Lusi, “Tegeleza mndele wangu, sikuuchole hanhu hayagwe kusalata vija visigale ila mumgunda uno wiyeka. Wakweleleze iwasang'hanaji wangu wa kitwanzi.
9 Lola hanhu hoosenga uwakweleleze. Niwazuma wano iwabwanga sambi wakugaze. Wahawa na ng'hilu genda hana inongo ukang'we mazi gawadehile iwabwanga.”
10 Baho Lusi kamfugamila Boazi mbaka hasi, kamulongela, “Mhataze kutogoleligwa na gweye na kuno niye na munhu baki?”
11 Lakini Boazi kamulongela, “Nigahulika gose guumtendele mama mkwe wako tangu mbigalo wako viyafile. Nojuwa viuwalekile tatako na mamako na isi yako yuuvumbukile, kwiza kukala na wanhu huwajuwile bule.
12 Mndewa Imulungu yakutendele ganogile kwa gose gautendile. Mndewa Imulungu, Imulungu wa Izilaeli yumkimbilile kamba kinziya yomkimbilila mamake, yakulihe ng'hani.”
13 Lusi kamulongela, “Go mkulu, gweye kunhendela ganogile ng'hani. Kunihoza umoyo na kulonga na niye kwa uhole hamoja niye sili msang'hanaji wako.”
14 Ndiya viipile, Boazi kamkema Lusi kamulongela, “Lusi izo uje gate na uzanhike mumchuzi.” Avo Lusi kakala hamoja na wasengaji, na Boazi kamgwaa uhule ukanzingigwe, kauja na keguta mbaka kausigasa.
15 Lusi viyagendelele kudondola vija visigale mumgunda, Boazi kawalongela wasang'hanaji zake, “Sambi mumgomese hata yahadondola hana gamakinza mulekeni.
16 Vivija mumsomolele mna gamakinza na mulekeni yadondole sikumumkomhokele.”
17 Avo Lusi kagendelela kudondola vija visigale mbaka ichungulo, kabiga na kabeta ija ishaili kapata mgelo umoja na malagalila.
18 Kaidikwa kifuza chake kachola ukae kumulagusila mama mkwe yake vija viyapatile. Vivija kamgwaa ija indiya iyasigase.
19 Avo mkwe yake kamuuza, “Kudondola kwahi lelo? Gweye kukala kuna umgunda wa nani? Imulungu yamtende yamwede ayo yakutazile gweye.” Avo Lusi kamulongela Naomi, kamba kakala kosang'hana kwa munhu yokemigwa Boazi.
20 Naomi kamulongela mkwe yake, “Mndewa Imulungu yamtendele ganogile Boazi, Mndewa Imulungu siku zose kogavikiza gaja gayalongile kwa iwanhu wagima na wafile.” Naomi kagendelela kulonga, “Munhu ayo ndugu yetu wa usungu, na imoja wa awo olondigwa kutulola goya.”
21 Abaho Lusi ayo Immoabu kalonga, “Vivija munhu ayo kanongela niilumbe na wasang'hanaji zake mbaka vonda wamambukize kusenga.”
22 Avo, Naomi kamulongela Lusi, “Ona mndele wangu, uilongoze na iwasang'hanaji zake ili wanhu sambi wakugaze kuna imigunda iyagwe.”
23 Avo Lusi kasang'hana na iwasang'hanaji wa kitwanzi wa Boazi, kadondola vija visigale mbaka viwamambukize kusenga ingano na shaili. Siku zose azo Lusi kakala yokala na mama mkwe yake.