11
Sauli kodigombola buga da Yabeshi Gileadi
1 Abaho Nahashi mndewa wa Waamoni, kachola kadizunguluka buga da Yabeshi Gileadi. Iwanhu wose wa Yabeshi Gileadi wamulongela Nahashi, “Ika malagano na siye na siye tokusang'hanila.”
2 Heyo kawedika, “Mwahalonda twike malagano na mweye, lagano jangu kwa kila imoja wenu nimtobole siso da mkono wa kudila, avo Waizilaeli wose okona kinyala.”
3 Waja iwavele wa Yabeshi Gileadi wamulongela, “Tugwelele siku saba ili tuwalagize wasenga mwiisi yose ya Izilaeli. Kamba kuduhu munhu wakutugombola, toigala wenyego kumwako.”
4 Waja iwasenga viwavikile koyokala Sauli ako kudibuga da Gibea, viwawalongele wanhu mbuli ayo wanhu wose walila kwa sauti.
5 Sauli kakala yobwela kumgunda na ng'ombe wake, kauza, “Kilawila choni? Habali wanhu olila?” Wamulongela uja uusenga ulawile Yabeshi Gileadi.
6 Sauli viyahulike avo, Loho ya Mndewa Imulungu imwizila kwa nguvu, na heyo kagevuzika ng'hani.
7 Kawasola ng'ombe wabili kawakanha kanha vihande vihande, kawagwaa waja iwasenga wakavike mna imbaka ya Izilaeli kuno walonge munhu yoyose hailumba na Sauli na Samweli kuna ing'hondo ng'ombe zake otendigwa kamba vino. Waizilaeli wadumba kija chayalondile kutenda Mndewa Imulungu, avo wose wailumba na hewo.
8 Sauli kawating'haniza wanhu ako Bezeki, kulawa Izilaeli wakala wanhu laki ndatu na kulawa Yuda wakala wanhu elufu selasini.
9 Wawagwaa usenga waja wagalile uusenga wa ichanduso kulawa Yabeshi Gileadi, “Walongeleni mayo zuwa dahawa hachanha mokuwa mukomboligwa.” Viwapatile usenga wachola kuwalongela wanhu wa Yabeshi Gileadi na hewo wadeng'helela.
10 Avo wanhu wa Yabeshi Gileadi wakala omkekela Nahashi, wamulongela, “Mayo toigala wenyego kumwako utende chochose chuulonda.”
11 Ulukwili Sauli kagola vibumbila vidatu, wose wachola kuna ing'hambi ya Waamoni na kuwakoboza, mbaka viivikile imisi wakomigwa Waamoni wengi, na waja wasigale wapwililika na kukala kuduhu wakalile hamoja.
12 Abaho Waizilaeli wamulongela Samweli, “Wakwahi waja iwanhu walongile Sauli sikuyawe mndewa wetu? Wagaleni wanhu awo tuwakome.”
13 Avo, Sauli kawalongela, “Haduhu munhu yonda yakomigwe lelo, kwavija siku ya lelo Mndewa Imulungu kaigombola Izilaeli.”
14 Samweli kawalongela wanhu, “Tucholeni wose Giligali tukalonge kamba Sauli ayo mndewa.”
15 Wanhu wose viwavikile Giligali, wamsimika Sauli kuulongozi wa Mndewa Imulungu kamba mndewa. Sauli hamoja na wanhu wa Izilaeli wadeng'helela ng'hani, na wamulavila Mndewa Imulungu nhosa za kugala kuilumba.