12
Samweli kowalaga Waizilaeli
1 Abaho Samweli kawalongela Waizilaeli wose, “Nhegeleza mbuli zose zimunilongele, na niye niwasimikila mndewa wenu.
2 Sambi, muna mndewa wakuwalongoza. Niye namvele, wanangu wa kimbigalo wa hamoja na mweye. Ng'hala kilongozi wenu tangu ving'halile mbwanga.
3 Niye nabahano kamba kuna kinhu chochose kinhendile kihile, laveni usindila kuulongozi wa Mndewa Imulungu na mndewa wake iyamsagule. Kuna ng'ombe hebu kihongwe wa munhu inimbokile? Kuna munhu yoyose inimbunzile? Hebu kumdununza munhu yoyose? Nibokela sente ya munhu ili nimulekele yatende mbuli zake? Longeni na niye nowabwezela.”
4 Wamulongela, “Ka hutubunzile hebu kutudununza, na husolile kinhu cha munhu yoyose.”
5 Samweli kawalongela, “Mulonga na Mndewa Imulungu iyo imsindila wenu, na mndewa wake iyamsagule, mnyona nabule kitala kinhendile.”
Wamulongela, “Mndewa Imulungu mwenyego iyo imsindila.”
6 Samweli kawalongela, “Mndewa Imulungu iyo yawasagule Musa na Haluni, heyo iyo yawalavile iwahenga zenu mwiisi ya Misili.
7 Avo inukeni baho kumwili, niwalongele kuulongozi wa Mndewa Imulungu abaho niwakumbuse mbuli zake za unzonza ziyatendile ili yawakombole iwahenga zenu na mweye.
8 “Yakobo viyengile isi ya Misili, na Wamisili viwakalile owadununza, wahenga zenu wamulilila Mndewa Imulungu, avo Mndewa Imulungu kawatuma Musa na Haluni, hewo iwo wawalavile mwiisi ya Misili na kuwatenda mukale mwiisi ino.
9 “Lakini wamsemwa Mndewa Imulungu, Imulungu wao, na heyo kawagela mmakono ga Sisela, mkulu wa iwakalizi wa Hazoli, na mmakono ga Wafilisiti na mndewa wa Moabu. Isi azo ziitowa na wahenga zenu na kuwahuma.
10 Wahenga zenu wamulilila Mndewa Imulungu kuno olonga, ‘Tukutendela mbuli zihile kwavija tuleka kukutambikila gweye na tuvitambikila vinyago va Baali na mhanda za Ashitoleti. Utugombole kulawa mmakono ga wano iwotwihila, na siye tokusang'hanila.’
11 Baho Mndewa Imulungu kamtuma Yelubaali, abaho kamtuma Bedani, abaho kamtuma Yefisa, na wakimambukizo kanituma niye Samweli. Kila imoja wetu kawagombola kulawa kwa iwanhu owehila wamzungulukeni, mbaka vino mokala moyo hole.
12 “Lakini vimonile Nahashi mndewa wa Waamoni keza kuwakoboza, mumulema Mndewa Imulungu wenu, ayo yeli mndewa wenu, munongela, ‘Ka tolonda mndewa yatutawale.’
13 Avo, imndewa yummulondile ayuno, ayo yumumpulile Mndewa Imulungu yawagwee mndewa, na heyo kawagweleleni.
14 Kamba mwahamdumba Mndewa Imulungu na kumsang'hanila na kumtegeleza bila kubena malagizo gake, mweye hamoja na mndewa wenu yowatawala, mwahamuinza Mndewa Imulungu, Imulungu wenu, heyo kowatendela ganogile.
15 Lakini kamba hamumtegeleza Mndewa Imulungu na kugagoga malagizo gake, avo Mndewa Imulungu komkobozeni mweye hamoja na mndewa wenu.
16 “Avo mina, mukale goya mulole mbuli ya Mndewa Imulungu yonda yatende ako kumwande.
17 Kwavija mna ikipindi kino cha kusenga ngano mvula kuduhu, avo nompula Mndewa Imulungu yagale mvula na ng'huwa, na mweye mojuwa mbuli zenu zihile zimumtendele Mndewa Imulungu, kwa kulonda muwe na mndewa wenu.”
18 Avo Samweli kampula Mndewa Imulungu na heyo Mndewa Imulungu kagala mvula na ng'huwa siku ngima. Wanhu wose wamdumba Mndewa Imulungu na Samweli.
19 Abaho wamulongela Samweli, “Chonde, gweye tupulile kwa Mndewa Imulungu siye wasang'hanaji zako, ili tuhonyeke na ifa, kwavija twengeza nzambi zetu kwa mbuli ayo ihile ya kulonda tuwe na mndewa wetu.”
20 Samweli kawalongela, “Sambi mudumbe, kweli mutenda mbuli ihile. Lakini sikumuleke kumkweleleza Mndewa Imulungu na msang'hanileni Mndewa Imulungu wenu kwa mizoyo yenu yose.
21 Sikumuikweleleze minyago ilibule chochose na wala haidaha kuwagombola, kwavija haifaya kwa chochose.
22 Kwavija kanogelwa kuwatendela wanhu zake, avo kwa ukulu wa twaga jake hawaleka wanhu zake.
23 Lakini niye sidaha kuleka kuwapulila kwa Mndewa Imulungu, nahatenda avo nokuwa nimtendela vihile Mndewa Imulungu, niye nogendelela kuwafunza nzila inogile na ya haki.
24 Avo mweye mdumbeni Mndewa Imulungu na mumsang'hanile kwa mizoyo yenu yose ilibule lusikisiki. Gelegezeni gaja ganogile gayawatendele.
25 Lakini kamba mwahagendelela kutenda gehile mofagiligwa mweye hamoja na imndewa wenu.”