2
Kupula kwa Hana
1 Abaho Hana kapula kalonga,
“Moyo wangu omwinula Mndewa Imulungu,
nihuma kubitila Mndewa Imulungu,
kwa mulomo wangu nowaseka iwanhu onihila,
kwavija noudeng'helela ukombola wako!”
2 “Kuduhu yang'alile kamba Mndewa Imulungu,
kuduhu yoyose kubanza heyo,
kuduhu dibwe kamba Imulungu wetu.
3 Lekeni kuitapa,
lekeni kulonga bezi.
Kwavija Mndewa Imulungu ayo Imulungu yojuwa gose,
kubitila heyo gose gotendwa gopimigwa.
4 Mhinde za waja weli na nguvu zibeneka.
Lakini waja welibule nguvu ogendelela kupata nguvu.
5 Waja umwaka wakalile na ndiya nyingi,
sambi otumigwa ili wapate ndiya,
lakini waja wakalile na nzala,
sambi wabule nzala.
Mtwanzi mgumba kalela wana saba.
Lakini mtwanzi yeli na wana wengi,
sambi kalekigwa bila mwana.
6 Mndewa Imulungu kokoma na kozilibula,
heyo kogala kuzimu,
na kobweza kabili.
7 Mndewa Imulungu kowatenda wayagwe wawe wakiwa,
na wayagwe wawe wagoli.
Kowabwanha hasi na kowenula uchanha.
8 Kowenula wakiwa kulawa mditimbwisi,
na kowenula welibule kinhu kulawa kudilundo da mitozi,
na kowatenda wakale na iwakulu,
na wahazi ivigoda va ukulu.
Kwavija mhanda za isi yose za Mndewa Imulungu,
uchanha yake keka isi yose.”
9 “Heyo kogakaliza magulu ga awo omtamanila,
lakini iwanhu wehile okanhigwa mdiziza,
kwavija munhu hadaha kuhuma kwa nguvu zake.
10 Wanhu omwihila Mndewa Imulungu obenigwa vihande vihande,
kotowa ng'huwa kumwao kulawa kuulanga.
Mndewa Imulungu koitagusa isi yose,
komgwaa nguvu mndewa wake,
koukweza udahi wa ayo iyamsagule.”
11 Abaho Elikana kabwela ukae ako Lama. Lakini mbwanga ayo Samweli kamsang'hanila Mndewa Imulungu kuulongozi wa Eli imulava nhosa.
Wana wa kimbigalo wa Eli
12 Avo wana wa kimbigalo wa Eli wakala wanhu wehile hawamdumbile Mndewa Imulungu.
13 Mila ya iwalava nhosa na iwanhu ikala kamba munhu kalava nhosa, msang'hanaji wa imulava nhosa kokwiza kipindi inyama yokimula, kuno kagoga lubiki lwa meno madatu,
14 na kolugela mnongo hebu msufulia hebu mdipipa. Ayo imsang'hanaji kahoma lubiki lwake mnongo, nyama yoyose yonda ilavigwe na lubiki lulo, nyama ayo yokuwa ya mulava nhosa. Vino vivo watendile ako Shilo kwa iwanhu wose wa Izilaeli wacholile kuko kulava nhosa zao.
15 Vivija mavuta ga mnyama gang'hali haganasomigwa, msang'hanaji wa imulava nhosa kochola kumulongela ija imunhu yolava inhosa, “Nigwelele nyama mbisi nimgalile mulava nhosa ili yakabanike kwavija honda yabokele nyama yako ikimusigwe.”
16 Kamba munhu ayo yahamulongela, “Beta tanhu gamavuta gasomigwe abaho kosola vovose vuulonda,” Baho ija imsang'hanaji wa imulava nhosa komulongela, “Aka, ngwelela sambi baha, kamba wahalema noisola kwa nguvu.”
17 Avo nzambi ya iwabwanga awo ikala ng'hulu ng'hani mgameso ga Mndewa Imulungu, kwavija wabwanga awo waibeza nhosa ya Mndewa Imulungu.
Samweli ako Shilo
18 Kipindi acho, mbwanga ayo Samweli viyakalile kogendelela kumsang'hanila Mndewa Imulungu, kakala yovala kikoti cha kitani.
19 Kila mwaka mamake kakala yomulukila kikanzu kidodo, na kamgalila kila viyakalile yochola hamoja na mbigalo wake kulava nhosa ya mwaka.
20 Abaho Eli kawatambikila Elikana na mwehe wake, kalonga, “Mndewa Imulungu yakugwee gweye Elikana wana wayagwe kwa mtwanzi ino mbweze haja hamumlavile Mndewa Imulungu.” Abaho wabwela ukae.
21 Mndewa Imulungu kamonela bazi Hana nayo kagoga inda na kalela wana wadatu wa kimbigalo na wana wabili wa kitwanzi. Imbwanga Samweli kagendelela kukula mna ukumsang'hanila Mndewa Imulungu.
Eli kowazuma wanage
22 Kipindi acho Eli kakala mvele ng'hani. Kahulika gose gawatendile wanage wa kimbigalo kwa iwanhu wose wa Izilaeli, na viwakalile owasa na waja iwatwanzi wakalile osang'hana kuna ulwivi lwa dihema da mting'hano.
23 Avo kawauza wanage, “Habali motenda mbuli kamba azo? Kwavija wanhu wose onongela mbuli zenu zihile zimutenda.
24 Sikumutende kamba avo wanangu, kwavija mbuli azo zinihulika kulawa kwa iwanhu wa Mndewa Imulungu ziha.
25 Kamba munhu yahamtendela nzambi miyage, Imulungu kodaha kuwagombeleza, lakini kamba munhu yahamtendela nzambi Imulungu nani yodaha kumgombeleza?” Lakini wanage hawamtegeleze tatao, kwavija Mndewa Imulungu kagesa kuwakoma.
26 Avo imbwanga Samweli kagendelela kukula na kanogeligwa na Mndewa Imulungu na iwanhu.
Imulungu koulema ulelo wa Eli
27 Siku dimoja, munhu wa Imulungu kamcholela Eli, kamulongela, “Mndewa Imulungu kolonga vino, ‘Vino niye siilaguse mwenyego kwa muhenga wako, viwakalile Misili omsang'hanila Falao?
28 Niye nimsagula heyo mna gamakabila gose ga Izilaeli, ili yawe mulava nhosa wangu, yachole kuna uupango wangu wa nhosa, yakasome ubani na yavale kikoti kuulongozi wangu. Nimgwaa muhenga wako na iwanhu wa mng'anda yake nhosa zose zilavigwa kumwangu kwa moto kulawa kwa iwanhu wa Izilaeli.
29 Habali kuzonela migongo nhosa ziniwalongele wanhu wangalile? Gweye kuwategeleza wanago kubanza niye, muineneheza wenyego kwa kuja nyama zinogile za kila nhosa ziwandavile Waizilaeli.’
30 “Avo Mndewa Imulungu, Imulungu wa Izilaeli, kolonga vino, ‘Niiduwila kamba ulelo wako na ulelo wa muhenga wako osang'hana kuulongozi wangu milele.’ Lakini sambi Mndewa Imulungu kolonga, ‘Mbuli ayo iwe kutali na niye, kwavija nowagesa wose onigesa niye na wose onibezeli na niye nowalema.
31 Kipindi chokwiza nokukoma gweye na iwanhu wa mng'anda ya muhenga wako na kokuwa kuduhu mbigalo yoyose yonda yawe mvele mng'anda yako.
32 Kokala na minyagu nyagu na kowonela migongo wayago kwa ganogile gonda niwagwee wanhu zangu wa Izilaeli, lakini kuduhu mbigalo muulelo wako yonda yakale mbaka yawe mvele.
33 Nomuleka mgima imoja wa iwanhu wa ulelo wako, na heyo konisang'hanila kamba mulava nhosa. Lakini kokuwa msuwameso na kokuwa kabule tamanilo, na iwanhu wose wayagwe wa ulelo wako odanganika kwa sime.
34 Kinhu chonda kiwapate wanago, Hofini na Finehasi, acho kino, wose wabili odanganika siku dimoja. Kino chokuwa kilaguso kumwako.
35 Abaho nomsagula mulava nhosa iyagwe yonda yanitegeleze, kotenda gaja geli mmoyo wangu na nzewele zangu. Nomtendela ulelo ugangamale, nayo konisang'hanila niye siku zose, haulongozi wa ija inimsagule.
36 Yoyose yonda yahonyeke muulelo wako kochola kwa ayo kumpula kihande kidodo cha sente hebu gate na kumulongela, “Chonde unike hanhu hamoja ha ulava nhosa ili mhate kihande kidodo cha gate.” ’ ”