25
Daudi na Nabali na Abigaili
1 Avo Samweli kadanganika, abaho wanhu wose wa Izilaeli waiting'hana na wamulilila, wamzika ukayake ako Lama.
Abaho Daudi kachola kuluwala lwa Palani.
2 Kukala na munhu imoja kudibuga da Maoni na kakala na mgunda ako kudibuga da Kalimeli. Ako Kalimeli kakala yafugile ng'hondolo zake na kawakanha mibahila. Kakala mgoli ng'hani kakala na ng'hondolo elufu ndatu na mbuzi elufu imoja.
3 Munhu ayo kakala yokemigwa Nabali na mwehe wake kakemigwa Abigaili. Abigaili kakala mtwanzi yanogile na mwene nzewele. Lakini mkasano wake kakala munhu yowehila wanhu na mtenda gehile, na kalawa mulukolo lwa Kalebu.
4 Avo Daudi kukuja kuyakalile kuluwala kahulika kamba Nabali kowakanha mibahila ng'hondolo zake ako Kalimeli.
5 Daudi kawatuma wabwanga zake longo, kawalongela, “Choleni kwa Nabali ako Kalimeli mulamuseni kwa twaga jangu.
6 Mulamuseni kwa kumulongela, ‘Tindiwalo diwe kumwako, diwe kwa wanhu wa mng'anda yako na diwe mna ivinhu vako vose viuli navo.
7 “ ‘Nihulika kowakanha mibahila ng'hondolo zako, nolonda ujuwe kamba wasusilaji zako wakala hamoja na siye, na siye hatuwatendele gehile. Vivija siku zose vitukalile hamoja kudibuga da Kalimeli, hakibigwe kinhu kulawa kumwao.
8 Wauze wabwanga zako okulongela. Avo watogolele wabwanga wano, kwavija kivika kipindi cha nyimwilinyimwili. Chonde wagwelele kinhu chochose kiuli nacho wasang'hanaji zako na niye mwanago Daudi.’ ”
9 Waja iwabwanga wa Daudi viwavikile wamulongela Nabali kamba viwalagizwe na Daudi, abaho wabeta kidogo.
10 Abaho Nabali kawalongela wasang'hanaji wa Daudi, “Daudi ayo nani? Mwanage Yese ayo nani? Siku zino kuna wasang'hanaji wengi iwokimbila wandewa zao.
11 Vino, nisole magate gangu, mazi gangu na nyama iniwachinjile wakanha mibahila ya ng'hondolo zangu, abaho niwagwelele wanhu sijuwa kuwalawile?”
12 Avo, waja iwabwanga wabwela na kumulongela Daudi viwalongeligwe.
13 Avo, Daudi kawalongela wanhu zake, “Kila munhu yavale sime jake mkigudi.” Kila munhu kavala sime jake mkigudi nayo Daudi kavala sime jake, wanhu magana mane wamuwinza Daudi na wanhu magana mabili wasigala na mizigo.
14 Mbwanga imoja wa Nabali, kamulongela Abigaili, mwehe wa Nabali, “Daudi katuma wasenga zake kulawa kuluwala ili wamulamuse mkulu wetu. Lakini heyo kawaliga.
15 Lakini wanhu waja wakala wanogile ng'hani kumwetu hawatutendele gehile, kipindi chose kitukalile hamoja na hewo kuja kuluwala kuduhu kinhu kisoligwe kumwetu.
16 Wanhu waja wakala kamba wakalizi wetu kipindi chose imisi na ikilo, kipindi chose kitukalile tosusila ng'hondolo.
17 Avo uigese mbuli ino na ujuwe va ukutenda. Mbuli ino yodaha kugala vinhu vihile kwa mkulu wetu na wanhu wa mng'anda yake. Heyo munhu yehile ng'hani avo kuduhu munhu yodaha kulonga na heyo.”
18 Abigaili katenda himahima kasola magate magana mabili, mifuko mibili ya ng'hwembe ya divai, ng'hondolo watano wabanikigwe, kilo longo na saba za uhule ukanzingigwe, na mabumunda gana ga zabibu zinyalile, na mabumunda magana mabili ga tini zinyalile, vinhu vose avo kavikweza uchanha ya vihongwe.
19 Kawalongela waja iwabwanga wake, “Mwenye longoleni, niye na kukisogo nokwiza.” Lakini hamulongele chochose mkasano wake.
20 Viyakalile yohumuluka kubonde kuno kakwela kihongwe wake, kakala yazibigwe na lugongo mwambu umoja, kasinhukila Daudi na wanhu zake ochola kuja kuyalawile heyo.
21 Daudi kakala yogelegeza, “Niye ng'hala mkalizi wa vinhu zose va Nabali kuno kuluwala bila kupata kinhu chochose na kuduhu kinhu chake kipotele, gaja gose ganogile ganimtendele abaho heyo koniliha gehile.
22 Mndewa Imulungu yang'home kamba mayo imitondo niye siwakoma wambigalo wose weli kumwake.”
23 Abigaili viyamonile Daudi kahumuluka mkihongwe kaidulika mbaka hasi haulongozi ha Daudi.
24 Kaibwanha pwaa mmagulu ga Daudi kamulongela, “Go mkulu wangu mbuli zose na ziwe kumwangu. Nokupula nonge na gweye niye msang'hanaji wako, utegeleze mbuli za msang'hanaji wako.
25 Sikuumgelegeze Nabali munhu yehile kamba vidili twaga jake Nabali, vivo na heyo viyeli. Heyo kokemigwa Nabali fambulo jake mbozi, niye msang'hanaji wako siwonile awo iwabwanga wautumile.
26 “Avo mkulu wangu, kamba vija Mndewa Imulungu viyokala, na gweye viukala, kamba Mndewa Imulungu viyakugomese kuliha gehile kwa kwita damu kwa makono gako, leka iwanhu okwihila na waja olonda gehile gakupate waduwiligwe kamba Nabali.
27 Chonde mkulu wangu bokela vinhu vangu vino vinikugalile, uwagwelele wabwanga iwakukweleleze.
28 Nokupula uzigele kumgongo mbuli zangu zihile niye msang'hanaji wako. Mndewa Imulungu kokutenda mndewa, na ulelo wako okuwa wandewa kwavija gweye go mkulu kuitowa ng'hondo ya Mndewa Imulungu. Siku zose za ugima wako sambi oneke na mbuli yoyose ihile.
29 Kwahalawilila munhu yokupelemba ili yakukome, Mndewa Imulungu kouhonya ugima wako hamoja na wanhu oukala na hewo. Lakini kousegesa himahima ugima wa waja okwihila, kamba vija munhu viyokwasa dibwe kwa ng'humbewe.
30 Mndewa Imulungu vonda yakutendele mkulu wangu kila kinhu kinogile kiyaiduwile kumwako, na kokutenda uwe mndewa wa Izilaeli,
31 mkulu wangu sikuuwe na kitala chochose kwa kwita damu na kubwezela gehile. Mndewa Imulungu yahakutendela ganogile, nokupula ung'humbuke niye msang'hanaji wako.”
32 Daudi kamulongela Abigaili, “Yagweleligwe nhogolwa Mndewa Imulungu, Imulungu wa Izilaeli, yakulagize wize kumwangu lelo.
33 Mgwee ukulu Mndewa Imulungu yakugwee magesa gakunigomesa sambi nitende mbuli ihile ya kwita damu na kuliha gehile.
34 Kwavija Mndewa Imulungu, Imulungu wa Izilaeli, kangomesa sambi nikutendele mbuli ihile, kamba viyokala maza hulopole kwiza kuiting'hana na niye, mayo imitondo sambi yasigale mbigalo yoyose kwa Nabali.”
35 Abaho Daudi kabokela vinhu viyamgalile Abigaili, Daudi kamulongela, “Bwela ukae moyo hole. Niye nihulika gaunilongele, na kiupulile nikibokela.”
36 Abigaili viyabwelile ukae, kamvika Nabali kakuna inyimwilinyimwili ng'hulu ya kindewa mwiing'anda yake. Nabali kakala yakoligwe ng'hani na kadeng'helela mmoyo wake. Avo hamulongele kinhu chochose mbaka imitondo.
37 Usiku vuuchile, Abigaili kamona mkasano wake divai imulawa kudipala, kamsimulila mbuli zose, bahaja Nabali lukuli lose lufa ganzi, kanyala gogodaa.
38 Vizibitile siku longo kumwande, Mndewa Imulungu kamtenda Nabali yadanganike.
39 Daudi viyahulike Nabali kadanganika kalonga, “Nhogolwa zimgendele Mndewa Imulungu yambwezele gehile Nabali yaniligile. Mndewa Imulungu kanihonya, sambi nitende gehile. Mndewa Imulungu kamtagusa Nabali kwa mbuli zake zihile.”
Abaho Daudi kawatuma wanhu wakamsole Abigaili ako Kalimeli yawe mwehe wake.
40 Waja wasang'hanaji wa Daudi viwavikile kwa Abigaili ako Kalimeli, wamulongela, “Daudi katulagiza twize kukusola ili uwe mwehe wake.”
41 Abigaili kenuka, kaidulika mbaka hasi, kalonga, “Niye na msang'hanaji nhogola kusunha magulu ga wasang'hanaji wa mkulu wangu.”
42 Abigaili kalopola, kakwela kihongwe wake, na wasang'hanaji zake watano wa kitwanzi wamkweleleza kwa migulu, kailongoza hamoja na wasang'hanaji wa Daudi, nayo kawa mwehe wa Daudi.
43 Vivija Daudi kamfungila zengele Ahinoamu kulawa Yezileeli. Avo awo wabili wakala wehe zake.
44 Kipindi acho, Sauli kakala yamulavile mndele wake Mikali, yakalile mwehe wa Daudi, ili yasoligwe na Paliti mwanage Laishi, kulawa buga da Galimu.