26
Daudi komuleka mgima Sauli kabili
1 Wambigalo wayagwe kulawa buga da Wazifu wachola Gibea kumulongela Sauli kamba Daudi kaifisa kulugongo lwa Hakila, mwambu wa kudilawila zuwa wa Yeshimoni.
2 Himahima, Sauli na wakalizi wa Izilaeli elufu ndatu wasaguligwe, wachola kuluwala lwa Zifu kumzahila Daudi.
3 Sauli keka ng'hambi kulugongo lwa Hakila behi na nzila ya Yeshimoni, lakini Daudi kakala yang'hali kuko kuluwala. Daudi viyahulike kamba Sauli keza kumzahila,
4 kawatuma wasepaji, na hewo wamulongela kamba kweli keza.
5 Daudi kenuka himahima kachola hanhu hayekile ng'hambi Sauli. Kahaona hanhu hayawasile Sauli na Abeneli mwanage Neli, mkulu wa iwakalizi wa Sauli. Sauli kakala yawasile hagati ya ing'hambi kuno kazungulukwa na wakalizi zake.
6 Daudi kamulongela Ahimeleki yakalile Muhiti, na Abishai ndugu yake Yoabu, mamao kakemigwa Seluya, kalonga, “Nani yochola hamoja na niye kwa Sauli?”
Abishai kamulongela, “Niye nochola hamoja na gweye.”
7 Ikilo, Daudi na Abishai wengila hana ing'hambi ya Sauli, wamvika Sauli kawasa hagati ya ing'hambi, mgoha wake kausimika hasi behi na pala jake. Abeneli na wakalizi wayagwe wakala wawasile kwa kumzunguluka Sauli.
8 Abishai kamulongela Daudi, “Lelo Mndewa Imulungu kamgela mmakono munhu wako yokwihila. Avo, ndekela niye nimuhome mgoha mwanza umoja mbaka hasi, sibwelela kabili.”
9 Lakini Daudi kamulongela Abishai, “Sikuumuhome, kwavija nani yodaha kumgolosela mkono munhu yasaguligwe na Mndewa Imulungu na sikuyawe na kitala chochose?
10 Kamba Mndewa Imulungu viyokala, Mndewa Imulungu komkoma Sauli, hebu siku yake ya kudanganika yovika hebu kochola kuing'hondo na kuko kokomigwa.
11 Na Mndewa Imulungu kangomesa sikunimgolosele mkono munhu yamsagule. Lakini sola mgoha wake uli behi na pala jake hamoja na kibuyu chake cha mazi, tusegele.”
12 Avo, Daudi kasola uja umgoha ukalile behi na pala da Sauli hamoja na kibuyu cha mazi na wasegela. Lakini kuduhu munhu yonile hebu kujuwa mbuli ayo, na vivija haduhu munhu yalamuke, kwavija Mndewa Imulungu kawagalila utulo lovu lovu.
13 Abaho Daudi kachola mwambu wa kabili wa bonde dijo kema uchanha ya lugongo kutali na ng'hambi ya Sauli.
14 Abaho kawakema kwa sauti ng'hulu wakalizi wa Sauli na Abeneli mwanage Neli kuno kolonga, “Vino Abeneli konihulika?”
Abeneli kamuuza, “Gweye kwa nani umkema mndewa?”
15 Daudi kamwidika, “Vino gweye simbigalo? Nani yoigala na gweye mwiisi ya Izilaeli? Mbona humkalize mndewa wako? Munhu imoja kulawa kumwetu keza kumkoma mndewa wako.
16 Mbuli yutenda hainogile. Noiduwila kamba Mndewa Imulungu viyokala, gweye na wanhu zako molondigwa mukomigwe, kwavija hamumkalize mndewa wenu, yasaguligwe na Mndewa Imulungu. Avo mgoha wa mndewa na kija ikibuyu cha mazi kikalile behi na pala jake va kwahi?”
17 Sauli kaijuwa sauti ya Daudi kamuuza, “Vino ino sauti yako mwanangu Daudi?”
Daudi kamwidika, “Ona go mkulu mndewa wangu ino sauti yangu.”
18 Abaho Daudi kagendelela kulonga, “Habali mndewa wangu konikweleleza niye msang'hanaji wako? Nhenda choni? Mbuli gani ihile inikutendele?
19 Avo, mndewa wangu, tegeleza mbuli iyolonga msang'hanaji wako. Kamba Mndewa Imulungu iyo yakulongele wize kunikoboza, avo nolova nhosa ili nimnogeze, lakini kamba wanhu awo wakulongele, Mndewa Imulungu yawaduwile wanhu awo kwavija waniwinga mwiisi yatugwelele Mndewa Imulungu na kunilongela, ‘Genda ukaisang'hanile imilungu iyagwe.’
20 Habali gweye mndewa wa Izilaeli konipelemba kupatu kamba niye kamba munhu viyopelemba ng'hwale kulugongo? Sikuundeke nidanganike mwiisi baki, kutali na Mndewa Imulungu.”
21 Abaho Sauli kamwidika, “Niye nhenda vihile. Bwela mwanangu Daudi. Sigeza kukukoma kabili kwavija lelo kunileka mgima. Niye nambozi na nhenda vihile ng'hani.”
22 Daudi kamwidika, “Go mndewa, mgoha wako wakuno, mtume mbwanga wako imoja yeze yausole.
23 Mndewa Imulungu komuliha kila munhu kwa ganogile goyosang'hana na kutamanilwa kwake. Lelo Mndewa Imulungu kakugela mmakono gangu, lakini niye sikugolosele mkono kwavija gweye kusaguligwa na Mndewa Imulungu.
24 Kamba viniwonile ofaya ugima wako lelo, vivo ili kwa ugima wangu ufaye kwa Mndewa Imulungu na heyo konikombola kulawa mmagazo gose.”
25 Sauli kamulongela Daudi, “Imulungu yakutendele ganogile mwanangu Daudi, kotenda vinhu vikulu na kohuma.” Abaho Daudi kasegela na Sauli kabwela ukayake.