31
Sauli koikoma
(1 Umwaka 10:1-12)
1 Avo, Wafilisiti waitowa na Waizilaeli na Waizilaeli wawakimbila Wafilisiti, na wanhu wengi wakomigwa ako kulugongo lwa Giliboa.
2 Na Wafilisiti wamkweleleza Sauli na wanage wa kimbigalo, Wafilisiti wawakoma Yonatani na Abinadabu na Malikishua iwana wa Sauli.
3 Ng'hondo ikala ng'hulu kwa Sauli, na awo wakalile opigisa misale wamuhoma na wamulumiza.
4 Avo Sauli kamulongela ayo yakalile yompapila ivinhu vake va kung'hondo, “Somola sime jako unihome, buleavo wanhu wano hawengile kumbi okwiza na kunibezeli.”
Lakini ayo yampapile vinhu vake va kung'hondo kalema kwavija kadumba ng'hani. Avo Sauli kasola sime jake na kadilagalila.
5 Ayo yampapile ivinhu va kung'hondo viyone Sauli kadanganika, na heyo kadilagalila sime jake kadanganika hamoja na Sauli.
6 Avo ivo Sauli viyadanganike, na wanage wadatu, na munhu yampapile vinhu va kuing'hondo na wanhu zake wose wadanganika siku dijo dimoja.
7 Waja Waizilaeli wakalile umwambu wa bonde da Yezileeli na waja wakalile mwambu wa kudilawila zuwa wa Yolidani viwonile Waizilaeli wakimbila, na Sauli na wanage wadanganika, wagaleka mabuga gao wakimbila, Wafilisiti wachola kukala mmabuga gago.
8 Imitondo yake, Wafilisiti viwacholile kusola vinhu va waja wawakomile waivika mitufi ya Sauli na wanage wadatu kulugongo lwa Giliboa.
9 Wadikanha pala da Sauli na wamvula ivinhu vake va kung'hondo, abaho watuma usenga mwiisi yose ya Wafilisiti, wabwililisa usenga awo mzing'anda za iminyago yao na kwa wanhu.
10 Wavika ivinhu vake va kung'hondo mng'anda ya kutambikila Ashitoleti. Abaho walutumbika lukuli lwa Sauli kuluwa lwa buga da Beti Sheani.
11 Lakini iwenekae wa Yabeshi Gileadi viwahulike gaja Wafilisiti gawamtendele Sauli,
12 iwanhu wose magalu wenuka, wachola kilo kwa kilo na walusola lukuli lwa Sauli na ng'huli za wanage aho kuluwa lwa Beti Sheani, weza nazo mbaka Yabeshi wazisoma moto.
13 Abaho waisola mizege yao na waizika hana dibiki da mdai kuko Yabeshi, na wafunga kuja kwa siku saba.