7
1 Abaho iwanhu wa Kiliati Yealimu wachola kudisola disanduku da lagano da Mndewa Imulungu, wadigala kuna ing'anda ya Abinadabu yakalile kulugongo. Wamsagula imwana Eleazali yadilole goya disanduku.
Samweli kotawala isi ya Izilaeli
2 Sanduku da lagano da Mndewa Imulungu dikala ako Kiliati Yealimu kwa miyaka malongo mabili, kipindi acho Waizilaeli wose wamulilila Mndewa Imulungu yawataze.
3 Samweli kawalongela Waizilaeli wose, “Kamba mwahalonda kumbwelela Mndewa Imulungu kwa mizoyo yenu yose, muileke imilungu iyagwe na minyago ya Ashitoleti, na mumgoge Mndewa Imulungu na mumsang'hanile heyo yaiyeka, na heyo kowagombola kulawa mmakono ga Wafilisiti.”
4 Avo, Waizilaeli wavasa vinyago va Baali na zimhanda za Ashitoleti, wamsang'hanila Mndewa Imulungu yaiyeka.
5 Samweli kalonga, “Wating'hanizeni Waizilaeli wose ako Misipa na niye nowapulila kwa Mndewa Imulungu.”
6 Avo Waizilaeli waiting'hanila ako Misipa. Wadeha mazi na kugagida kuulongozi wa Mndewa Imulungu kamba nhosa, siku ayo yose wafunga kuja na wamtambikila kwa kulonga, “Tumtendela nzambi Mndewa Imulungu.” Samweli kawa msemi wa Waizilaeli ako Misipa.
7 Wafilisiti viwahulike kamba Waizilaeli waiting'hana ako Misipa, iwakulu wa Wafilisiti wachola kuwavamila. Waizilaeli viwahulike mbuli ayo wawadumba Wafilisiti.
8 Avo wanhu wa Izilaeli wamulongela Samweli, “Sambi uleke kumpula Mndewa Imulungu, Imulungu wetu, gendelela kumulilila ili yatukombole kulawa mmakono ga Wafilisiti.”
9 Samweli kasola ng'hondolo yokong'ha kamulava kwa Mndewa Imulungu kamba nhosa ya kusakaza, abaho Samweli kamulilila Mndewa Imulungu mbuli ya Waizilaeli, na Mndewa Imulungu kahulika kililo chake.
10 Kipindi Samweli viyakalile kolava ayo inhosa ya kusakaza, Wafilisiti wakala behi ili wawavamile Waizilaeli, lakini Mndewa Imulungu kabuma kwa sauti ng'hulu kwa Wafilisiti. Wafilisiti wengilwa bwembwe na wakimbila chaka chaka mgameso ga Waizilaeli.
11 Waizilaeli wasegela ako Misipa wawakweleleza Wafilisiti wawakoma mnzila mbaka behi na dibuga da Beti Kali.
12 Abaho Samweli kasola dibwe kadisimika hagati ya Misipa na Sheni, dibwe dijo kadikema Ebenezeli, kwavija kalonga, “Mbaka sambi Mndewa Imulungu katutaza.”
13 Avo, Wafilisiti walemelwa na hawengile kabili mwiisi ya Izilaeli. Mkono wa Mndewa Imulungu uwakoboza Wafilisiti siku zose za ugima wa Samweli.
14 Gaja gamabuga ga Izilaeli, Wafilisiti wakalile wagasolile, gabwezigwa kwa Waizilaeli, kulawa buga da Ekiloni mbaka buga da Gati na Waizilaeli waigombola isi yao yose. Avo kukala na tindiwalo hagati ya Waizilaeli na Waamoli.
15 Samweli kakala msemi wa iwanhu wa Izilaeli siku zose za ugima wake.
16 Kila mwaka Samweli kakala yotembelela mabuga ga Beseli na Giligali na Misipa. Kakala msemi wa iwanhu wa Izilaeli kuna gamabuga gago gose.
17 Abaho kakala yobwela ukae kumwake ako Lama, na kuko vivija kakala msemi wa Waizilaeli na vivija kamzengela Mndewa Imulungu upango wa kulavila nhosa.