8
Waizilaeli opula wagweleligwe mndewa
1 Samweli viyakuwile mvele, kawatenda wanage wa ikimbigalo wawe wasemi wa iwanhu wa Izilaeli.
2 Mwanage wa chaudele wa ikimbigalo kakala yokemigwa Yoeli, na wa kabili kakemigwa Abiya. Wose wabili wakala wasemi ako Beelisheba.
3 Lakini iwana hawakweleleze nzila za tatao ila walonda kupata vinhu, watogola kubokela hongo na waigalusa haki.
4 Abaho iwavele wose wa Izilaeli waiting'hana hamoja na wachola kudibuga da Lama kwa Samweli,
5 wamulongela, “Lola, gweye kwa mvele, na wanago hawakweleleza nzila zako gweye. Avo tusagulile mndewa ili yatutawale kamba vizili isi zose ziyagwe.”
6 Lakini Samweli hanogelwe na mbuli ayo iwalongile, “Tugwelele mndewa yatutawale.” Avo, Samweli kampula Mndewa Imulungu.
7 Mndewa Imulungu kamulongela Samweli, “Tegeleza kila kinhu kiwokulongela iwanhu, kwavija hawakulemile gweye, ila wanilema niye sambi niwe mndewa kumwao.
8 Kamba viwatendile viniwalavile Misili, wanileka niye, na oisang'hanila imilungu iyagwe mbaka lelo, kamba viwanilekile niye na kuisang'hanila imilungu iyagwe, vivo viwokutendela na gweye.
9 Avo, gweye wategeleze, lakini uwazume ng'hani na uwalongele kunze kunze ago gonda watendeligwe na ayo imndewa yonda yawatawale.”
10 Avo, Samweli kawalongela iwanhu gose gayalongile Mndewa Imulungu kwa awo wampulile yawasagulile mndewa.
11 Samweli kawalongela, “Vino vivo vonda yawatendele imndewa yonda yawatawale mweye, kowasola wanenu wa kimbigalo na kowatenda wawe waendelesha mituka yake na wayagwe kowatenda wakwela falasi zake na wayagwe kowatenda wawe wakimbilaji kuulongozi wa mituka yake.
12 Wayagwe kowatenda wawe wemilizi wa wakalizi maelufu na wayagwe wemilizi wa wakalizi malongo matano kwa malongo matano. Wayagwe kowatenda walime na kusenga migunda yake na wayagwe kowatenda watende vinhu va kung'hondo na vinhu vilondigwa na imituka yake.
13 Kowasola wandele wenu wamtendele mavuta gonung'hila goya na watelekaji na okaji wa magate.
14 Koisola migunda yenu inogile, na migunda yenu ya mizabibu na mizeituni, na kowagwelela wasang'hanaji zake.
15 Kosola fungu da longo da ndiya yenu na zabibu zenu na kowagwaa vilongozi wake na wasang'hanaji zake.
16 Kowasola watumwa zenu wa kimbigalo na wa ikitwanzi, na wabwanga wenu wanogile na vihongwe wenu, kowatenda wamsang'hanile.
17 Kosola fungu da longo da fugo zenu zose, na mweye mokuwa watumwa zake.
18 Siku dijo dahavika mweye molila mbuli ya ayo imndewa yumumsagule wenyego, lakini Mndewa Imulungu honda yawedike bule.”
19 Lakini iwanhu walema kumtegeleza Samweli, wamulongela, “Haduhu, tolonda mndewa yatutawale,
20 ili na siye tuwe kamba iwanhu wa isi zose ziyagwe, na imndewa wetu kotutawala na kotulongoza na kokuwa kilongozi wetu kuing'hondo yetu.”
21 Samweli viyazihulike mbuli zose ziwakalile olonga iwanhu, kabwela kamulongela Mndewa Imulungu.
22 Mndewa Imulungu kamulongela Samweli, “Wategeleze na uwagwelele mndewa.” Samweli kawalongela Waizilaeli wabwele mna gamabuga gao.