11
Daudi na Batisheba
1 Kipindi cha mwanduso wa mwaka, kipindi acho wandewa wacholaga kung'hondo, Daudi kamtuma Yoabu na wakulu zake hamoja na Waizilaeli wose, wakawakome Waamoni na wakadizunguluke buga jose da Laba. Lakini Daudi kasigala Yelusalemu.
2 Siku dimoja ichungulo Daudi kenuka mulusazi kakwela mkiswili cha ng'anda ya kindewa. Viyakalile kotembela kuko kukiswili kamona mtwanzi imoja kokoga, mtwanzi ayo kakala yanogile ng'hani.
3 Avo Daudi kamtuma munhu yakauze mtwanzi ija nani. Munhu ija kamulongela, “Mtwanzi ija Batisheba mndele wa Eliamu na mwehe wa Ulia Muhiti.”
4 Avo Daudi katuma wasenga wamgale, avo Batisheba keza kwa Daudi, Daudi kawasa nayo, abaho mtwanzi ayo kabwela ukae. Mtwanzi ayo kakala yaisunhile viyeshile kutumika.
5 Ija imtwanzi kagoga inda, kamgalila usenga Daudi kamulongela, “Niye nina inda.”
6 Avo Daudi kamtumila usenga Yoabu kalonga, “Ungalile Ulia Muhiti.” Yoabu kamtuma Ulia kwa Daudi.
7 Ulia viyavikile kwa Daudi, Daudi kamuuza vilihi Yoabu na wanhu wose, na ng'hondo yogendelelaze.
8 Abaho Daudi kamulongela Ulia, “Genda ukayako ukasunhe magulu gako.” Avo Ulia kalawa kwa mndewa, abaho mndewa katuma wanhu wamgalile nhunza.
9 Lakini Ulia hacholile ukayake, kawasa hana ulwivi lwa ng'anda ya mndewa, hamoja na wasang'hanaji wa mndewa.
10 Daudi viyahulike kamba Ulia hacholile ukayake kamuuza Ulia, “Gweye kulawa mmwanza, habali hucholile ukayako?”
11 Ulia kamulongela Daudi, “Sanduku da lagano da Imulungu, hamoja na wakalizi wose wa Izilaeli na Yuda okala mvibanda mwiing'hondo. Mkulu wangu Yoabu na wasang'hanaji zake wose weka ng'hambi kuluwala. Nodahaze niye nichole ukayangu nikaje na kung'wa na kuwasa na mwehe wangu? Noiduwila kamba viukala, sitenda mbuli kamba ayo.”
12 Daudi kamulongela Ulia, “Ukale hano lelo na mayo kobwela.” Avo Ulia kasigala Yelusalemu kwa siku mbili.
13 Daudi kamgoneka Ulia kumwake, Ulia kaja na kung'wa, Daudi kamng'weza Ulia mbaka kakoligwa lakini ikilo Ulia hacholile bule ukayake, kawasa bahaja hamoja na wasang'hanaji wa mndewa.
14 Usiku viuchile Daudi kamwandikila baluwa Yoabu kamgwaa Ulia yamgalile.
15 Mna ibaluwa ayo, Daudi kandika, “Mwike Ulia kuulongozi wa ing'hondo ng'hulu abaho gweye usegele ili yatoigwe mbaka yadanganike.”
16 Avo Yoabu viyakalile kodizunguluka buga kamwika Ulia hanhu kuyajuwile hokalizigwa ng'hani.
17 Wanhu wa buga dijo walawa kuitowa na Yoabu. Wakalizi wayagwe wa Daudi wakomigwa. Ulia Muhiti vivija kakomigwa.
18 Abaho, Yoabu kamtumila usenga Daudi kamulongela mbuli zose zili kuing'hondo.
19 Yoabu kamulongela vino ija imsenga, yamulagize, “Wahamambukiza kumulongela mndewa mbuli zose za kuing'hondo,
20 na yahagevuzika na kukuuza, ‘Habali muchola behi na buga na kuitowa? Hamujuwile kamba wahawapigisile misale kulawa kuluwa lwa dibuga?
21 Nani yamkomile Abimeleki mwanage Yelubesheti? Simtwanzi yampigisile dibwe da kudugila kulawa kuuluwa na dimkoma Abimeleki ako Tebesi? Habali muchola behi na uluwa?’ Kamba yahakuuza vivo mulongele, ‘Vivija msang'hanaji wako Ulia Muhiti kadanganika.’ ”
22 Ija imsenga kachola kwa Daudi kamulongela gose gayalagizwe na Yoabu.
23 Msenga kamulongela Daudi, “Iwanhu otwihila watuhuma nguvu, walawa kunze ya buga na kutukoboza. Lakini tuitowa nao mbaka mdilwivi lwa dibuga.
24 Abaho watutowa na misale siye wasang'hanaji zako kulawa muuluwa. Wasang'hanaji wako wayagwe wakomigwa. Vivija msang'hanaji wako Ulia Muhiti kakomigwa.”
25 Daudi kamulongela ija imsenga, “Ukamulongele vino Yoabu, ‘Mbuli ayo sambi ikugele lusikisiki, sime dabule meso, ng'hondo yokoma yoyose ija. Gangamala kudikoboza buga na udibanange dijo.’ Avo umgele moyo Yoabu kwa mbuli azo.”
26 Mwehe wa Ulia viyahulike mbigalo wake kadanganika kamtendela tanga.
27 Tanga vidishile, Daudi kalagiza Batisheba yagaligwe mwiing'anda yake. Daudi kamtenda Batisheba mwehe wake na kamulelela mwana wa kimbigalo lakini mbuli ayo haimnogele bule Mndewa Imulungu.