10
Daudi kowahuma Waamoni na Washami
(1 Umwaka 19:1-19)
1 Vigabitile gago, Nahashi mndewa wa Waamoni kadanganika, imwana Hanuni kawa mndewa hanhu hake.
2 Mndewa Daudi kalonga, “Nomtendela ganogile Hanuni mwanage Nahashi kamba tatake viyanhendele ganogile niye.” Avo Daudi katuma usenga kumgwaa pole mbuli ya ifa ya tatake.
Wasenga wa Daudi viwavikile mwiisi ya Waamoni,
3 iwakulu wa Waamoni wamulongela Hanuni mndewa wao, “Kogizaga Daudi viyalagize wasenga kwiza kukugwaa pole komuheshimu tatako? Daudi kalagiza wanhu zake ili kudilolesa goya buga dino ili yadisole.”
4 Avo, Hanuni kawasola awo iwasenga wa Daudi kawabea ndevu kila imoja wao nusu na katatula viwalo vao hagati ya madako abaho kawaleka wasegele.
5 Daudi viyalongeligwe mbuli ayo, katuma wasenga wayagwe kuwabokela kwavija wakala wageligwe kinyala ng'hani. Mndewa Daudi kawalongela, “Kaleni kuko kudibuga da Yeliko, mbaka ndevu zenu zikote abaho mwize.”
6 Waamoni viwonile wamgevuza Daudi wawakodi Washami kulawa Beti Lehobu na Washami kulawa Soba wakala wakalizi otembela kwa migulu elufu ishilini na wakalizi elufu kumi na mbili kulawa Tobu, na mndewa wa Maaka kakala na wakalizi elufu imoja.
7 Daudi viyahulike mbuli ayo, kamtuma Yoabu yachole na bumbila jose da wakalizi wakalile magalu.
8 Waamoni waipanga kwa ng'hondo ako kudilango da dibuga jao, na waitanda kwa ng'hondo, na Washami kulawa Soba na Lehobu na wanhu wa Tobu na Maaka waitanda kwa ng'hondo ako kudibugano.
9 Yoabu viyone kuulongozi na kuchugu kumwake wekigwa wakalizi wa kung'hondo, avo kasagula iwakalizi wakalile magalu ng'hani mwiisi ya Izilaeli kawapanga mbuli ya Washami.
10 Awo iwakalizi wasigale kaweka hasi ya ulongozi wa ndugu yake Abishai, hewo wekigwa waitowe na Waamoni.
11 Yoabu kamulongela Abishai, “Kamba Washami wahanibanza nguvu wize kunitaza vivija Waamoni wahakubanza gweye nguvu nokwiza kukutaza.
12 Lakini ugangamale na uiyohe mbuli ya wanhu zetu na mabuga ga Imulungu wetu. Mndewa Imulungu kotenda gaja komnogela mgameso gake.”
13 Avo Yoabu na wanhu wakalile hamoja na heyo wachola kuitowa na Washami, na hewo Washami wakimbila kuulongozi wake.
14 Waamoni viwone Washami okimbila, na hewo vivija wamkimbila Abishai na wengila kudibuga. Yoabu kaleka kuitowa na Waamoni kabwela Yelusalemu.
15 Lakini Washami viwone wahumwa na Waizilaeli waiting'hana.
16 Hadadezeli kalagiza Washami wakalile umwambu wa lwanda lwa Fulate, wagaligwe ako Helamu, kuno olongozwa na Shobaki kilongozi wa wakalizi wa Hadadezeli.
17 Daudi viyalongeligwe mbuli ayo, kawating'haniza wakalizi wose wa Izilaeli, kaloka lwanda lwa Yolidani kachola mbaka Helamu. Washami waitanda kuitowa na Daudi na wasonga kuitowa na heyo.
18 Lakini Washami wakimbila kuulongozi wa Waizilaeli, Daudi kawakoma Washami wakwelile mituka magana saba, na waja wakwelila falasi elufu alobaini. Vivija kamtowa Shobaki imkulu wa wakalizi wao, kadanganika bahaja.
19 Avo wandewa wose wakalile wasang'hanaji wa Hadadezeli viwone wahumwa na Waizilaeli, wailumba na Waizilaeli na wawatenda wasang'hanaji wao. Avo, Washami wadumba kuwataza kabili Waamoni.