9
Daudi na Mefibosheti
1 Siku dimoja Daudi kauza, “Kuna munhu yoyose kasigala muulelo wa Sauli? Kamba kabaho nolonda nimtendele ganogile mbuli ya Yonatani”
2 Avo kukala na msang'hanaji imoja mng'anda ya Sauli twaga jake Siba. Wamkema yachole kwa Daudi. Mndewa Daudi kamuuza, “Vino gweye iyo Siba?”
Heyo kamwidika, “Ona, iyo niye msang'hanaji wako.”
3 Mndewa Daudi kamuuza, “Habule munhu yoyose yasigale muulelo wa Sauli? Kamba kabaho nolonda kumtendela ganogile kamba vinongile kwa Imulungu.”
Siba kamulongela, “Kabaho mwanage Yonatani, lakini kalemala magulu.”
4 Avo, mndewa kauza, “Kakwahi?”
Siba kamwidika, “Kamng'anda ya Makili mwanage Amieli ako Lodebali.”
5 Avo, mndewa Daudi katuma wanhu, wachole kumsola Mefibosheti mng'anda ya Makili mwanage Amieli ako Lodebali.
6 Avo, Mefibosheti mwanage Yonatani mzukulu wa Sauli viyavikile kwa mndewa Daudi kamfugamila kaidulika mbaka hasi.
Daudi kamkema, “Mefibosheti.”
Heyo kamwidika, “Iyo niye msang'hanaji wako.”
7 Daudi kamulongela, “Sikuudumbe niye nokutendela ganogile mbuli ya tatako Yonatani. Ija imigunda yose ya babu yako Sauli nokubwezela, na gweye koja mmeza yangu siku zose.”
8 Mefibosheti kaidulika, kalonga, “Habali konitendela kamba avo, niye msang'hanaji wako? Niye niigala na umbwa yafile.”
9 Abaho mndewa Daudi kamkema Siba yakalile msang'hanaji wa Sauli kamulongela, “Kila kinhu kikalile cha Sauli na ulelo wake nimgwaa mzukulu wake.
10 Gweye na wanago na wasang'hanaji zako momulimila Mefibosheti na momgalila ndiya ili mzukulu wa mkulu wako Sauli yawe na ndiya. Avo Mefibosheti imzukulu wa mkulu wako, koja mmeza yangu siku zose.” Kipindi acho Siba kakala na wana wa kimbigalo longo na tano na wasang'hanaji malongo mabili.
11 Siba kamulongela mndewa, “Niye msang'hanaji wako notenda kamba viundagize.” Avo, Mefibosheti kakala yoja mmeza ya Daudi kamba imoja wa wana wa mndewa.
12 Mefibosheti kakala na mwana mdodo twaga jake Mika. Wanhu wose wa Siba wakala wasang'hanaji wa Mefibosheti.
13 Avo, Mefibosheti yakalile yalemale migulu yose kakala yokala Yelusalemu, na kakala yoja mmeza ya mndewa siku zose.