20
Sheba
1 Avo, kukala na munhu yehile ng'hani twaga jake Sheba mwanage Bikili, Mbenjamini, katowa mhalati yake kwa nguvu kalonga,
“Twabule fungu kwa Daudi,
Twabule kinhu kwa mwanage Yese.
Mweye wanhu wa Izilaeli,
Kila munhu yachole ukayake.”
2 Avo, wanhu wose wa Izilaeli wamuleka Daudi wamkweleleza Sheba mwanage Bikili. Lakini wanhu wa Yuda wailumba na mndewa wao kulawa lwanda lwa Yolidani mbaka Yelusalemu.
3 Daudi kavika ukayake Yelusalemu, Daudi kawasola waja iwatwanzi longo wakalile kamba wehe zake awo wakalile walolezi wa ng'anda yake, kaweka mwiing'anda imoja na wakalizigwa goya na kawagwaa ndiya, lakini hawasile nao, hawatogoleligwe kulawa kunze na wakala mumo kamba wagane siku zose za ugima wao.
4 Abaho mndewa kamulongela Amasa, “Nokugwaa siku ndatu uwakeme wanhu wa Yuda weze kumwangu, hamoja na gweye mwenyego.”
5 Lakini Amasa viyacholile kuwakema wanhu wa Yuda, habwelile hima mna ikipindi kiyamwikile mndewa.
6 Daudi kamulongela Abishai, “Kumbe Sheba mwanage Bikili kolonda kutugalila zumozumo kubanza zumozumo diyatugalile Abisalomu. Sola wasang'hanaji zangu umkweleleze Sheba yang'hali hana kwingila kudibuga dizunguluswe luwa lwa mabwe na sikutumone.”
7 Avo, wachola hamoja na wanhu wa Yoabu na Wakeleti na Wapeleti na wakalizi wose. Wose awo wasegela Yelusalemu wachola kumzahila Sheba mwanage Bikili.
8 Viwavikile kuna didibwe dikulu ako Gibeoni, Amasa keza kuwabokela. Yoabu kakala yavalile kiwalo cha ng'hondo, mkigudi kakala yavalile mkwiji ugogeleze yala ili na sime. Viyavikile behi nayo sime dilagala hasi.
9 Yoabu kamulongela Amasa, “Kwa mgima ndugu yangu?” Yoabu kamgoga zindevu Amasa kwa mkono wake wa kudila ili yamnonele.
10 Amasa honile bule umwele ukalile mumkono wa Yoabu. Yoabu kamuhoma mmunda Amasa kwa mkono wa kumoso na utumbo uvaladuka kunze na kadanganika. Yoabu hamuhomile miyanza mibili.
Abaho Yoabu na ndugu yake Abishai wagendelela kumzahila Sheba mwanage Bikili.
11 Munhu imoja wa Yoabu kema behi ya lukuli lwa Amasa kalonga, “Yoyose yeli kwa Yoabu na komnogela Daudi, yamkweleleze Yoabu.”
12 Amasa viyakalile kawasa hasi kuno damu yogendelela kulawa na kwenela mnzila, kila munhu yobita haja kakala yokwima. Avo munhu ija viyone wanhu wose okwima haja, kalusegesa lukuli lwa Amasa kalugala mumgunda na kalugubika na kiwalo.
13 Amasa viyasegesigwe mna inzila, wanhu wose wakala omkweleleza Yoabu kumzahila Sheba mwanage Bikili.
14 Sheba kabita mna gamakabila gose ga Izilaeli mbaka buga da Abeli wa Beti Maaka na wanhu wose wa lukolo lwa Bikili, waiting'hana na wamkweleleza.
15 Wanhu wose wakalile hamoja na Yoabu, wadizunguluka buga da Abeli Beti Maaka diyakalile Sheba, watenda kisugulu wakwela ili walubomole luwa,
16 mtwanzi imoja mbala wa buga dijo kalonga, “Tegelezeni, tegelezeni, mulongeleni Yoabu yeze nilonge nayo,”
17 Yoabu kachola, ija imtwanzi kamulongela, “Gweye iyo Yoabu?”
Yoabu kamwidika, “Ona iyo niye.”
Ija imtwanzi kamulongela, “Nitegeleze niye msang'hanaji wako.”
Yoabu kamwidika, “Nokutegeleza.”
18 Ija imtwanzi kalonga, “Ako umwaka wanhu wakala olonga, ‘Gendeni mkauze kudibuga da Abeli,’ avo mbuli yokuwa yokwisha.
19 Siye twa wanhu wa tindiwalo na totamaniligwa mwiisi ya Izilaeli. Gweye kolonda kudibomola buga kulu da Izilaeli. Habali kolonda kusola uhazi wa Mndewa Imulungu?”
20 Yoabu kamwidika, “Bule, hata siku dimoja muugima wangu sidaha kudinanga hebu kudibomola.
21 Siye hatulonda kutenda kamba viulongile. Lakini munhu imoja yokemigwa Sheba mwanage Bikili kulawa kuna ulugongo lwa Efulaimu kamuhinduka mndewa Daudi. Ngweleleni munhu ayo na niye nosegela mdibuga dino.”
Ija imtwanzi kamulongela Yoabu, “Pala jake mokwasiligwa uchanha ya uluwa.”
22 Ija imtwanzi kachola kwa wanhu wose kuno kana magesa gake. Nao wamkanha dipala Sheba mwanage Bikili na kumwasila kunze Yoabu, avo Yoabu katowa mhalati, kawasegesa wanhu zake kulawa kudibuga ajo da Abeli, kila munhu kachola ukayake. Abaho Yoabu kabwela kwa mndewa Daudi, ako Yelusalemu.
Msafa wa wanhu wa Daudi
23 Avo Yoabu kakala yolongoza wakalizi wose wa Izilaeli. Benaya mwanage Yehoyada kakala mkulu wa Wakeleti na Wapeleti.
24 Adolamu kakala mkulu wa waja iwotenda sang'hano kwa kunanahizwa. Yehoshafati mwanage Ahiludi kakala mwandikaji wa kumbukumbu za mndewa.
25 Sheva kakala mwandikaji, Sadoki na Abiatali wakala walava nhosa.
26 Ila kulawa buga da Yaili vivija kakala mulava nhosa wa Daudi.