21
Wana wa kimbigalo wa Sauli
1 Kipindi cha utawala wa Daudi kukala na lufilili lwa nzala kwa miyaka midatu, avo Daudi kampula Mndewa Imulungu, na Mndewa Imulungu kalonga, “Sauli na wanhu zake wana kitala cha kwita damu kwavija wawakoma Wagibeoni.”
2 Mndewa kawakema Wagibeoni na kalonga nao. Wagibeoni hawakalile Waizilaeli, ila wakala Waamoli wasigale. Waizilaeli waiduwila kamba hawawakoma bule, lakini Sauli kawakoma kwavija kakala kosulukila kona Waizilaeli na Yuda okala isi yose.
3 Daudi kawauza Wagibeoni, “Nhende choni? Nitende loholo gani ili muitambikile isi ino na wanhu wa Mndewa Imulungu?”
4 Wagibeoni wamwidika, “Twabule haki ya kudai sente hebu zahabu kulawa kwa Sauli hebu wanhu zake, wala twabule haki ya kumkoma munhu yoyose mwiisi ya Izilaeli.”
Daudi kawauza, “Molonda niwatendele choni?”
5 Wamulongela mndewa, “Sauli kawamba kutukoma ili sambi yasigale munhu yoyose mwiisi ya Izilaeli.
6 Tugweleleni wanage saba wa kimbigalo tuwananike na tuwakome kuulongozi wa Mndewa Imulungu ako Gibea ya Sauli, yasaguligwe na Mndewa Imulungu.”
Mndewa kalonga, “Nowagweleleni.”
7 Mndewa Daudi hamulavile Mefibosheti mwanage Yonatani, mzukulu wa Sauli, mbuli ya dija dilagano diwekile Daudi na Yonatani haulongozi wa Mndewa Imulungu.
8 Lakini mndewa kawalava Alimoni na Mefibosheti iyagwe wana wabili wa Lisipa mndele wa Aya yamulelele Sauli. Vivija kawalava wana watano wa Melabu mndele wa Sauli yamulelele Adilieli mwanage Balazilai wa buga da Mehola.
9 Daudi kawalava wana awo saba wa kimbigalo kwa Wagibeoni, hewo wawananika kulugongo haulongozi wa Mndewa Imulungu, wawakoma wose saba hamoja. Wakomigwa kipindi cha mwanduso wa kusenga shaili.
10 Abaho Lisipa kasola kiwalo cha gunia, kakitambaliza uchanha ya dibwe kulu. Kakala aho tangu mwanduso wa kusenga mbaka kipindi cha mvula vikivikile na kuitowela imitufi. Kipindi chose acho, kakala yowinga ndege imisi na kakala yowinga wanyama wa kumuhulo ikilo, ili sambi waikwesele imitufi.
11 Daudi viyalongeligwe kija kiyatendile mtumwa wa kitwanzi wa Sauli yakemigwe Lisipa mndele wa Aya,
12 avo, Daudi kachola kusola mizege ya Sauli na Yonatani kwa wanhu wa Yabeshi Gileadi. Iwaibile ako kudibugano da Beti Sheani kuwawananike, kipindi Wafilisiti viwamkomile Sauli ako kulugongo lwa Giliboa.
13 Avo, Daudi kaibweza mizege ya Sauli na mwanage Yonatani, abaho wazola mizege ya waja iwabwanga saba wananikigwe.
14 Abaho, wanhu wa Daudi waizika mizege ya Sauli na mwanage Yonatani mwiisi ya Benjamini ako Sela behi na panga da Kishi tatake Sauli. Nao watenda kila kinhu kamba viyawalagize mndewa. Abaho Imulungu kahulika kupula kwao mbuli ya isi yao.
Ng'hondo na Wafilisiti
(1 Umwaka 20:4-8)
15 Avo, kukala na ng'hondo kabili Wafilisiti na Waizilaeli. Daudi na wanhu zake wachola kuitowa na Wafilisiti. Siku dijo Daudi kakala yeshiligwe nguvu.
16 Ishibi Benobu imoja wa ulelo wa Walefai, mgoha wake wa shaba ukala na uzito wa kilo ndatu na nusu na kuno kakala yaifungile sime da sambi mkigudi, kakala yolonda kumkoma Daudi.
17 Lakini Abishai, mwanage Seluya, kamtaza Daudi, kamtowa ija Imfilisiti mbaka kamkoma. Avo wanhu waiduwila kwa Daudi walonga, “Hulondeka uchole na siye mwiing'hondo, sambi uizime taa ya Izilaeli.”
18 Vigabitile gago, kulawilila ng'hondo iyagwe na Wafilisiti ako Gobu. Abaho Sibekai, Mhushati kamkoma Safu imoja wa ulelo wa Walefai.
19 Kulawilila ng'hondo iyagwe na Wafilisiti ako Gobu. Elihanani mwanage Yaili wa buga da Beselehemu, kamkoma Goliati, Mgiti, muhini wa mgoha wake uigala na muhini wa gembe.
20 Abaho kukala na ng'hondo iyagwe ako Gati, kukala na zinhu dimoja kulu na tali dikala na vidole sita kila mkono na sita kila mgulu, vose kwa vose kakala na vidole malongo mabili na nne. Vivija kakala munhu wa ulelo wa Walefai.
21 Heyo viyawaligile Waizilaeli, Yonatani mwanage Shimei, ndugu yake Daudi, kamkoma.
22 Awo wane walawa muulelo wa Walefai wa ako Gati, na hewo wafila mmakono ga Daudi na wakalizi zake.