22
Lwila lwa Daudi lwa kuhuma
(Zabuli 18)
1 Daudi kamwimbila Mndewa Imulungu lwila viyamgombole kulawa mmakono ga wanhu wamwihile, na kulawa mmakono ga Sauli.
2 Kalonga,
Mndewa Imulungu ayo dibwe jangu,
heyo ayo ngome yangu,
heyo ayo mkombola wangu.
3 Imulungu wangu ayo dibwe jangu,
kumwake nokimbilila,
heyo ayo ngao yangu,
heyo ayo nguvu ya ukombola wangu,
heyo ayo ngome yangu
heyo ayo kimbililo jangu.
Heyo ayo mkombola wangu,
yang'hombole kulawa kwa iwanhu wasede.
4 Nomkema Mndewa Imulungu yolondigwa kutogoligwa,
kanikombola kulawa kwa iwanhu onihila.
5 Kwavija mazi mengi ga ifa gakala ganizunguluke,
ng'humbi ingubika.
6 Nzabi za kuzimu zinizingiliza,
mitego ya ifa ingoga.
7 Mmagazo gangu nimkema Mndewa Imulungu,
nimkema Imulungu wangu,
kulawa mng'anda yake kahulika sauti yangu,
na kililo changu kimvikila mmagwiti gake.
8 Aho isi igwaya na kutigisika,
chandusilo cha ulanga kisinhuka na kugwaya,
kwavija Imulungu kagevuzika.
9 Yosi difililika kulawa mmhula zake,
moto usakaza ulawa mmulomo wake,
makala ga moto gazipuka kulawa kumwake.
10 Kaunamiza ulanga kahumuluka hasi,
mawingu matitu gakala hasi ya magulu gake.
11 Kakwela kiumbe kili na mabawa kaguluka,
kahumuluka mdibeho kamba ndege.
12 Kaigubika ziza,
kaigubika mawingu gazamile gamemile mazi gailundize.
13 Mumng'alo wake mawingu gasegela,
mabwe ga moto gamwemwesa.
14 Mndewa Imulungu kaduma kulawa kuulanga,
Imulungu yeli Uchanha Ng'hani kalava sauti yake.
15 Katowa misale kawaswaswanya,
kagala mimwesa kawawinga.
16 Abaho hasi kuna ibahali koneka,
ichandusilo cha isi kigubuka,
Mndewa Imulungu viyakomhoke,
kwa ukubuma mhumuzi ya mhula yake.
17 Imulungu kagolosa mkono wake kulawa uchanha kangoga,
kanivabula kulawa mmazi mengi.
18 Kanikombola na wanhu onihila weli na nguvu,
na kanihonya kulawa kwa awo onihila,
kwavija wakala na nguvu kubanza niye.
19 Wanivamila ving'halile mmagazo,
lakini Mndewa Imulungu kanitaza.
20 Kanigala hanhu hana inyafasi,
kanikombola kwavija kaninogela.
21 Mndewa Imulungu kanhunza kamba haki yangu viili,
kanhunza kwavija makono gangu gabule ubananzi,
22 kwavija niikweleleza nzila ya Mndewa Imulungu,
na sitendile gehile na kumuleka Imulungu wangu.
23 Kwavija malagizo gake gose nigagoga,
na mafundizo gake sigalekile.
24 Na niye nitelela kuulongozi wake,
niigomesa sikunitende nzambi.
25 Avo Mndewa Imulungu kanhunza kamba vinitendile,
kanhunza kwavija makono gangu gabule ubananzi.
26 Gweye kotamaniligwa kwa wanhu otamaniligwa,
kwa yelibule kitala koilagusa kwabule kitala.
27 Gweye kung'ala kwa waja wang'alile,
lakini kwa wanhu otenda gehile omona heyo kamba msede.
28 Gweye kowakombola iwanhu wahole,
lakini kowahumulusa iwanhu oitapa.
29 Gweye Mndewa Imulungu kwa taa yangu,
Mndewa Imulungu konimwemwesela mdiziza jangu.
30 Gweye wahanitaza, nodihuma bumbila da wakalizi,
kwa Imulungu wangu nodaha kuzumha luwa.
31 Sang'hano za Imulungu zitelela,
imbuli ya Mndewa Imulungu ya kweli,
heyo ayo ngao kwa iwanhu wose omkimbilila.
32 Haduhu yeli Imulungu ila Mndewa Imulungu,
haduhu yeli dibwe ila Imulungu wetu.
33 Ino Imulungu ayo ngome yangu igangamale,
kaitenda nzila yangu itelele.
34 Kaigangamiza migulu yangu iwe kamba ya nhelembo,
kanika goya uchanha kuinhembeti.
35 Kogafunza makono gangu kuitowa ng'hondo,
makono gangu gana nguvu ya kuvedula upinde wa shaba ya kiguzi.
36 Kunigwaa ngao yako ya kunikombola,
ukombola wako unhenda munhu mkulu.
37 Kuitanula nzila yangu,
na migulu yangu haitelebuke bule.
38 Niwakweleleza iwanhu onihila na niwahonda,
sibwelile kuchugu mbaka viwabanangigwe wose.
39 Niwabananga niwabwanha hasi mbaka hawadahile kwinuka kabili,
wagwa hasi ya magulu gangu.
40 Gweye kunigwaa nguvu ya kuitowa kung'hondo,
kuwabwanha iwanhu onilema hasi yangu.
41 Kuwatenda iwanhu onihila wakimbile,
na awo onilema niwabananga.
42 Walola lakini kukala haduhu munhu yoyose wa kuwataza,
wamulilila Mndewa Imulungu lakini heyo hawedike bule.
43 Niwahonda wagaluka kamba timbwisi,
niwaduluga na kuwabojoga kamba tope da mnzila.
44 Gweye kunikombola kulawa mmakono ga wanhu zangu,
kunitenda niwe mtawala wa isi zose,
iwanhu siwajuwile wanisang'hanila.
45 Wanhu baki weza kumwangu kuno onifugamila,
bahaja viwahulike nolonga wanitegeleza.
46 Wageni wakala wabule tamanilo,
weza kumwangu kulawa mzingome zao akuno ogwaya.
47 Mndewa Imulungu kamgima,
yatogoligwe dibwe jangu,
yatogoligwe Imulungu wangu,
dibwe wa ukombola wangu.
48 Imulungu ayo yanidahize kuwalihiza gehile,
na kaweka hasi yangu iwanhu wa isi zose.
49 Kanikombola kulawa kwa iwanhu onihila,
kaninula uchanha ya awo onilema niye,
na kanigala kutali ya iwanhu iwasede.
50 Kwa mbuli ayo, nokutogola gweye Mndewa Imulungu hagati ya iwanhu wa isi zose,
na nokwimba na kulonga twaga jako kulu.
51 Imulungu kamgwaa mndewa wake mhumo ng'hulu,
na kalagusa unogelo wake kwa ayo iyamsagule,
kwa Daudi na ulelo wake milele.