24
Daudi kowapeta wanhu wakuitowa mwiing'hondo
(1 Umwaka 21:1-27)
1 Mndewa Imulungu kawagevuzikila kabili Waizilaeli, kamsusumiza Daudi, “Genda ukawapete Waizilaeli na wanhu wa Yuda.”
2 Avo, mndewa Daudi kamulongela Yoabu mkulu wa wakalizi, “Gendeni mkagazunguluke makabila gose ga Izilaeli kusongela Dani mbaka Beelisheba, mkawapete wanhu ili njuwe viweli.”
3 Lakini Yoabu kamwidika mndewa, “Mndewa Imulungu, Imulungu wako, yawatende Waizilaeli miyanza gana kubanza vija viweli sambi, vivija na gweye mndewa wangu ukone kwengezeka ako mgameso gako, lakini habali mndewa wangu kunogelwa na mbuli ino?”
4 Lakini mbuli ya mndewa ikala na nguvu kubanza ya Yoabu na wakulu wa wakalizi wose. Avo wasegela haulongozi wa mndewa, wachola kuwapeta Waizilaeli.
5 Viwalokile lwanda lwa Yolidani weka ng'hambi ako Aloeli, mwambu wa kusini wa bonde mwiisi ya Gadi na wagendelela mbaka Yazeli.
6 Abaho wachola Gileadi na Kadeshi mwiisi ya Wahiti, abaho wavika Dani kulawa Dani wazunguluka mbaka Sidoni,
7 wavika kudibuga da Tilo dizungulusigwe na senyenge ya mibwe, wengila mmabuga ga Wahivi na Wakanaani. Abaho wamambukiza na Negebu ya Yuda ako Beelisheba.
8 Viwamambukize kubita isi zose, wabwela Yelusalemu ikala ibitile miyezi tisa na siku malongo mabili.
9 Abaho Yoabu kamgalila mndewa idadi ya wanhu, Izilaeli kukala na wambigalo laki nane odaha kuitowa kwa misime na Yuda wanhu laki tano.
10 Avo Daudi viyeshile kuwapeta wanhu, kona usungu ng'hani. Avo Daudi kamulongela Mndewa Imulungu, “Nhenda nzambi ng'hulu ng'hani. Go Mndewa Imulungu, nokupula ugele kumgongo nzambi yangu, niye msang'hanaji wako, kwavija nhenda mbuli ya kibozi ng'hani.”
11 Daudi viyalamuke imitondo, mbuli ya Mndewa Imulungu ikala imwizile mtula ndagu Gadi yakalile mulolaji wa Daudi, ilonga vino,
12 “Genda ukamulongele vino Daudi, ‘Vino vivo viyolonga Mndewa Imulungu, nokugwaa mbuli ndatu, usagule mbuli imoja nikutendele.’ ”
13 Avo Gadi kachola kumulongela Daudi, “Kolonda lufilili lwa nzala lwa miyaka midatu mwiisi yako? Hebu miyezi midatu uwakimbile iwanhu okwihila kuno okuzahila? Hebu siku ndatu isi yako iwe na mitamu ihile? Gelegeza abaho unilongele chuusagule nikamulongele iyanilagize.”
14 Daudi kamulongela Gadi, “Nokona usungu ng'hani, vinoga tukobozigwe na Mndewa Imulungu kwavija heyo kana bazi ng'hani, kubanza kugeligwa mmakono ga wanhu.”
15 Avo, Mndewa Imulungu kawagalila Waizilaeli utamu, kusongela imitondo mbaka kipindi kilondeke. Wadanganika wanhu elufu sabini kusongela Dani mbaka Beelisheba.
16 Msenga wa Mndewa viyagolose mkono wake ili kudibananga buga da Yelusalemu, Mndewa Imulungu kagimbula kamgomesa ayo imsenga wa kuulanga yakalile yowabananga wanhu kalonga, “Yotosha bweza mkono wako.” Msenga wa mndewa Imulungu kakala yemile behi na hanhu ha kubigila ha Alauna Myebusi.
17 Daudi viyamone msenga ayo wa kuulanga yakalile yowakoma wanhu, kamulongela Mndewa Imulungu, “Niye ayo nhendile nzambi na gehile. Awo iwanhu wahole kamba ng'hondolo, watenda choni? Ng'hasiliki yako ize kumwangu niye na iwanhu wa mng'anda yangu.”
18 Siku dijo Gadi kamulongela Daudi, “Kwela uchanha ukamzengele upango Mndewa Imulungu hanhu ha kubigila ngano ha Alauna Myebusi.”
19 Avo, Daudi kakwela uchanha kamba viyalongeligwe na Gadi, na kamba Mndewa Imulungu viyalagize.
20 Alauna viyamone mndewa na wanhu zake okwiza kumwake, kalawa kunze kamfugamila mbaka hasi.
21 Alauna kamuuza mndewa, “Go mndewa wangu mbuli gani ikutendile uvike kwa msang'hanaji wako?”
Daudi kamwidika, “Niza kulugula lubuga lwako lwa kubigila ngano ili nimzengele upango wa nhosa Mndewa Imulungu, ili utamu usegele.”
22 Alauna kamulongela Daudi, “Mndewa wangu, sola kinhu chochose chuulonda. Niye nolava ng'ombe wabili mbuli ya nhosa za kusoma moto na nokugwaa imibiki inibigilaga ngano na mibiki iniwafungilaga ng'ombe ziwe ngodi.
23 Vose nokugwaa, go mndewa.” Abaho Alauna kamulongela mndewa, “Mndewa Imulungu, Imulungu wako yakutendele ganogile.”
24 Lakini mndewa kamulongela Alauna, “Bule! Sikuungwelele vivino. Niye novigula kwa bei ilondeka. Sidaha kumulavila Mndewa Imulungu nhosa za kusoma moto za vinhu sivigulile.”
Avo Daudi kahagula hanhu ha kubigila na ng'ombe wabili kwa vihande malongo matano va shaba.
25 Abaho Daudi kamzengela Mndewa Imulungu upango wa nhosa hanhu aho, na kamulavila nhosa za kusoma moto na nhosa za kugala kuilumba. Avo, Mndewa Imulungu kamwidika, na uja uutamu wa Waizilaeli usegela.