3
1 Kukala na ng'hondo kwa kipindi kitali kwa wanhu waja wailumbile na Sauli na waja wailumbile na Daudi. Lakini Daudi kakala yagangamale ng'hani, na wanhu wailumbile na Sauli oneka ohumwa.
Wana wa kimbigalo wa Daudi
2 Wana wa kimbigalo wa Daudi yawalelile ako Hebuloni, wakala Amnoni yakalile chaudele, mamake kakala Ahinoamu kulawa Yezileeli.
3 Kileabu kakala wa kabili, mamake kakala Abigaili yakalile mwehe wa Nabali kulawa Kalimeli, Abisalomu kakala wa kadatu, mamake kakala Maaka mndele wa mndewa Talimai wa Geshuli.
4 Adoniya kakala wa ikane, mamake kakala Hagiti, wa tano Shefatia mamake kakala Abitali,
5 na wa sita, kakala Itileamu mamake kakala Egila, heyo vivija kakala mwehe wa Daudi. Wano awo wanage Daudi wa kimbigalo yawalelile viyakalile Hebuloni.
Abeneli koilumba na Daudi
6 Kipindi ng'hondo yogendelela hagati ya iwanhu wa Daudi na iwanhu wa Sauli, Abeneli kagendelela kupata utawala kwa wanhu wa Sauli.
7 Sauli viyakalile mgima kakala na mtumwa yamtendile mwehe wake, kakemigwa Lisipa, mwanage Aya. Ishibosheti kamuuza Abeneli, “Habali kuwasa na mwehe wa tatangu?”
8 Abeneli kagevuzika ng'hani kwa kija kiyalongeligwe na Ishibosheti, kamulongela, “Vino, kogizaga niye nodaha kumuhinduka Sauli? Vino, kogizaga niye nodisang'hanila kabila da Yuda? Lola niye nhenda ganogile kwa wanhu wa tatako hamoja na ndugu zake na mbwiga zake mbaka lelo sinakulava mmakono ga Daudi, lakini gweye lelo kungela kinyala kwa mtwanzi ino.
9 Mndewa Imulungu yanhowe na hata yang'home kamba sigatenda gago gose gayaiduwile kwa Daudi.
10 Mndewa Imulungu kaiduwila kwa Daudi kamba kousegesa undewa mulukolo lwa Sauli na komgwaa heyo. Na heyo koitawala isi ya Izilaeli na Yuda kulawa Dani mbaka Beelisheba.
11 Ishibosheti hadahile kumwidika Abeneli kwavija kakala komdumba.”
12 Avo, Abeneli katuma wasenga kwa Daudi wamulongele, “Isi ino ya nani? Tenda lagano na niye, na niye nokutaza uisole Izilaeli yose iwe yako.”
13 Daudi kalonga, “Vinoga notenda lagano na gweye, lakini nolonda kinhu kimoja kumwako. Waheza kumwangu mgale Mikali, mndele wa Sauli.”
14 Daudi kawatuma wasenga kwa Ishibosheti mwanage Sauli, wakamulongele, “Mbwezela mwehe wangu Mikali inimfungile zengele kwa migovi gana dimoja ya Wafilisiti.”
15 Avo Ishibosheti kalagiza wakamgoge Mikali kwa mbigalo wake Palitieli mwanage Laishi.
16 Lakini Palitieli kachola hamoja na mwehe wake kuno mnzila kakala yolila mbaka Bahulimu. Baho Abeneli kamulongela, “Bwela ukae.” Avo kabwela.
17 Abeneli kalonga na wavele wa Izilaeli, kawalongela, “Kwa kipindi kitali mukala mulonda Daudi yawe mndewa wenu.
18 Sambi tendeni avo kwavija Mndewa Imulungu kaiduwila kwa Daudi kwa kulonga, ‘Kubitila gweye Daudi msang'hanaji wangu nowakombola wanhu zangu wa Izilaeli kulawa mmakono ga Wafilisiti na wanhu wose owehila.’ ”
19 Abeneli kalonga na wanhu wa kabila da Benjamini, abaho kachola Hebuloni kumulongela Daudi gaja ganogile gawaitogolele na wanhu wose wa Izilaeli na hata kabila da Benjamini.
20 Abeneli viyacholile kwa Daudi ako Hebuloni kakala na wanhu malongo mabili, Daudi kawatendela nyimwilinyimwili.
21 Abeneli kamulongela Daudi, “Niye nochola kukuting'hanizila gweye mkulu wangu mndewa wanhu wose wa Izilaeli, okwiza kwika lagano na gweye, ili uwe mndewa wao na gweye uwatawale kamba viulonda.” Avo Daudi kamulaga Abeneli, na heyo kasegela moyo hole.
Abeneli kokomigwa
22 Abaho, Yoabu hamoja na wanhu wa Daudi wabwela kulawa mwiing'hondo, wabwela na vinhu viwasolile kuing'hondo. Lakini Abeneli hakalile hamoja na Daudi ako Hebuloni, kwavija Daudi kakala yamulagile, na heyo kachola moyo hole.
23 Yoabu viyabwelile hamoja na wakalizi zake wose yakalile nao, kalongeligwa kamba Abeneli mwanage Neli, kakala yezile kumulola mndewa Daudi, na kalongeligwa yachole moyo hole.
24 Avo Yoabu kachola kwa mndewa kumulongela, “Avo choni chuutendile? Lola Abeneli keza kumwako, habali kumuleka yasegele?
25 Vino kojuwa kamba Abeneli mwanage Neli, keza kukuvizila? Keza ili yajuwe mbuli zako na gaja goutenda.”
26 Yoabu viyalawile kulonga na Daudi, kawatuma wasenga wamkweleleze Abeneli, wamvika mdisima da Sila na wambweza, lakini Daudi kakala haijuwile bule mbuli ayo.
27 Abeneli viyabwezigwe Hebuloni Yoabu kamsola hamgwazo ya ulwivi lwa dibuga kamba vija kolonda kulonga nayo mbuli kinyelegezi. Baho kamuhoma mgoha wa mmunda mbaka kadanganika kwavija Abeneli kakala yamkomile Asaheli ndugu yake Yoabu.
28 Daudi viyahulike mbuli ayo, kalonga, “Niye hamoja na undewa wangu twabule kitala siku zose kwa Mndewa Imulungu mbuli ya damu ya Abeneli mwanage Neli.
29 Makungu gose gampate Yoabu na lukolo lwa tatake na ndugu zake, mna iwanhu wa Yoabu sikuyaswele munhu, yolawa udusi, hebu mwene utamu wa dikulu, hebu yogenda kwa fimbo, hebu yokomigwa kwa sime hebu yoswela ndiya.”
30 Yoabu na ndugu yake Abishai wamkoma Abeneli kwavija kakala yamkomile ndugu yao Asaheli mwiing'hondo ako Gibeoni.
31 Abaho Daudi kamulongela Yoabu na wayage yakalile nao, “Degeni viwalo venu, muvale midabwada na mtembele kuno molila kuulongozi wa maiti ga Abeneli.” Mndewa Daudi kakala kukisogo cha awo wapapile imaiti.
32 Wamzika Abeneli ako Hebuloni, mndewa Daudi kalila kwa sauti kudipanga da Abeneli, wanhu wose watenda vivo.
33 Mndewa Daudi kamulilila Abeneli kwa king'holimbo kalonga,
“Vino, iwaze Abeneli mbaka kukomigwa kamba mbananzi?
34 Hufungigwe makono gako
hebu magulu gako kamba mbananzi.
Kukomigwa kamba munhu yakomigwe na wanhu wehile!”
Wanhu walila kabili.
35 Abaho wanhu wose wamcholela Daudi wamnanahiza yaje ndiya yoyose imisi, lakini Daudi kaiduwila kalonga, “Imulungu yang'home kamba nahalanza ndiya hebu kinhu chochose mbaka zuwa diswe.”
36 Wanhu wose viwagonile gago, hewo nao wanogeligwa nago, kila kinhu kiyatendile mndewa wanogeligwa nacho.
37 Avo, siku dijo, Waizilaeli wose wajuwa kamba mndewa Daudi halagize Abeneli mwanage Neli yakomigwe.
38 Mndewa Daudi kawalongela wasang'hanaji zake, “Vino, hamjuwile kamba lelo munhu mkulu na yojuwigwa kadanganika mwiisi ya Izilaeli?
39 Hamoja munigidila mavuta niwe mndewa wenu, lakini lelo nabule nguvu. Wano wana wa Seluya wabanza usede, Mndewa Imulungu yawakoboze ng'hani mbuli ya usede wao.”