4
Ishibosheti kokomigwa
1 Ishibosheti mwanage Sauli viyahulike kamba Abeneli kakomigwa ako Hebuloni, kakala yanyunyuwale na wanhu wose wa Izilaeli wadumba.
2 Avo Ishibosheti mwanage Sauli, kakala na wanhu wabili wakalile wakulu wa vibumbila va wakalizi, imoja kakemigwa Baana na iyagwe kakemigwa Lekabu. Awo wakala wanage Limoni wa buga da Beeloti. Buga da Beeloti ikala isi ya kabila da Benjamini.
3 Wanhu wa Beeloti wakimbilila Gitaimu, na wakala ako kamba wanhu baki mbaka vino lelo.
4 Yonatani mwanage Sauli, kakala na mwana yakalile yalemale magulu gake gose mabili. Mwana ayo twaga jake Mefibosheti. Kipindi usenga wa kudanganika kwa Sauli na Yonatani vuuvikile kudibuga da Yezileeli, Mefibosheti kakala na miyaka mitano. Mulezi wa mwana ayo viyahulike Sauli na Yonatani wakomigwa ako Yezileeli, kamnyamula imwana kakimbila nayo. Lakini viyakalile yokimbila, imwana kagwa na kalemala.
5 Lekabu na Baana wanage Limoni wa Beeloti, wachola ukayake Ishibosheti, wavika kuko imisi viyakalile kobwihila.
6 Wengila mng'anda waitenda kamba olonda kusola ngano, wamvika Ishibosheti mdigati jake kawasa mulusazi, wamuhoma mmunda. Abaho Lekabu na ndugu yake Baana wakimbila.
7 Kipindi acho viwengile mng'anda wamvika kawasa mulusazi. Wamuhoma mmunda wamkoma, wakanha pala jake wasegela najo. Wabitila nzila ya kudikonde da Alaba kilo kwa kilo.
8 Wamgalila Daudi pala da Ishibosheti ako Hebuloni, wamulongela, “Dino pala da Ishibosheti mwanage Sauli, ija iyokwihila yalondile kukukoma. Mndewa Imulungu kamuliha gehile Sauli na ulelo wake mbuli yako gweye mndewa wangu.”
9 Daudi kawedika, Lekabu na ndugu yake Baana, wanage Limoni kulawa Beeloti, kawalongela, “Kamba Mndewa Imulungu viyokala, heyo yaugombole ugima wangu kulawa mmagazo gose,
10 munhu imoja viyanongele, ‘Sauli kadanganika,’ kagizaga kongalila usenga unogile, nimgoga nimkoma kuko Sikilagi, ayo iyo nhunza inimgwelele mbuli ya usenga wake.
11 Avo yobanza ng'hani kwa wanhu wasede wamkomile munhu yelibule kitala chochose mng'anda yake na mulusazi lwake! Vino havinogile kumwangu kuwakoma mweye na kuwasegesa mwiisi?”
12 Avo Daudi kawalagiza wanhu zake, wakawakome. Wawakanha makono gao na magulu gao wawatumbika mmibiki kumgwazo wa lamba ako Hebuloni. Abaho wadisola pala da Ishibosheti na wadizika behi na panga da Abeneli ako Hebuloni.