2
Mafundizo ga kumtambikila Imulungu
1 Tanhu, mulongeleni Imulungu gaja gomulonda, mumpule Imulungu na muwapulile wanhu wayagwe na mumgwee nhogolwa kwa sama ya wanhu wose,
2 mpuleni Imulungu kwa sama ya wandewa na wanhu wose wayagwe weli na ukulu mziisi, ili tukale na tindiwalo na tukale moyo hole na kumdumba Imulungu na kutenda ganogile.
3 Mbuli ayo inoga na yomnogela Imulungu Mkombola wetu,
4 yolonda wanhu wose wakomboligwe na waujuwe ukweli.
5 Kwavija hana Imulungu imoja na hana imoja yotenda Imulungu na wanhu wailumbe, munhu ayo Yesu Kilisito,
6 yailavile mwenyego kutenda wanhu wose wakomboligwe, mbuli ino ayo iyalaguse Imulungu mna ikipindi kinogile.
7 Lekaavo nhumigwa kamba mtumigwa na mfundiza kwa wanhu haweli Wayahudi, kuwapetela usenga wa kutamanila na ukweli. Niye siviza bule, nolonga ukweli!
8 Avo mwahaiting'hana kumtambikila Imulungu, nolonda wanhu wailavile kwa Imulungu na odaha kwinula makono gao na kumpula Imulungu bila kugevuzika hebu bamila.
9 Vivija nolonda watwanzi wavale goya viwalo vao na wawe na nzewele, siyo kwa kugesa kuluka mvili kwa zahabu na lulu hebu viwalo va bei ng'hulu,
10 lakini kwa sang'hano zinogile, kamba viilondigwa kwa watwanzi omtambikila Imulungu.
11 Watwanzi olondigwa wanyamale kipindi munhu iyagwe kolonga na waifunze kwa uhole.
12 Niye siwatogolela bule watwanzi wafundize hebu wawe na ukulu kwa wambigalo, olondigwa wanyamale kipindi munhu iyagwe kolonga.
13 Kwavija Adamu heyo yasongile kulumbigwa, abaho Hawa.
14 Vivija siyo Adamu ayo yaviziligwe ila mtwanzi ayo yaviziligwe na kabena lagizo da Imulungu.
15 Lakini mtwanzi kokalizigwa kipindi viyolela wana, kamba yahagendelela kukala kwa kutamanila na kung'ala na unogelwa na kwa kutenda gago gose kwa kugesa vinogile.