42
Akuluvake Yusufu vàhwena ku Misili
1 Isilaeli, yani Yakobo papilikene kuva aneko ku Misili kùvele vilyo, nkuvahaulila vana vake kuchidoni, “Mwadachi mùikalenge chihi apano umulolana?
2 Nangu ngùpilikene kuva, aneko ku Misili kùvele vilyo. Hweneng'ana aneko mukasume vilyo, uchinga tunahwe na indala.”
3 Bahi avala akuluvake Yusufu kumi, nkuhwena aneko ku Misili unasuma vilyo.
4 Henga Yakobo nanga panannekile Benjamini, nnung'une Yusufu alangane navo, kwa kuva áyopa lanankoja mambo mabaya.
5 Bahi vana vanga Isilaeli nkuhwika ku Misili na nkuva kati ya vanu avala vapîte ku Misili unasuma vilyo, kwa kuva ata chilambo cha ku Kanaani nachinang'o chívele na indala.
6 Mahiku anelo Yusufu njo anavele nkulu wa chilambo anecho cha ku Misili. Na nang'e njo achivasumisa vanu vilyo. Bahi akuluvake nkuhwena unanhunamila Yusufu kwa eshima mpaka pahi.
7 Yusufu pavawene akuluvake nkuvamala, henga nkulitenda muchi akávamaite, nkulonjela navo kwa kukalipa. Nkuvauja kuchidoni, “Mwenu mùhaloka kwachi?” Vanang'o nkunnyang'ula kuchidoni, “Hwetu tùhaleke nchilambo cha ku Kanaani, tùidile unasuma vilyo.”
8 Pamo na kuva Yusufu ánivamala akuluvake, henga vanang'o nanga pavanammaite.
9 Nkuhimukila dindoto dyake dya tangu kwamba akuluvake, nkuvahaulila kuchidoni, “Mwenu mmapelelesi. Mùidile unapelelesa nchilambo chetu uchinga mupate kumala idabadangi yetu.”
10 Vanang'o nkunnyang'ula kuchidoni, “Nanga nang'olo wetu. Hwetu tuvatumishi vako tùidile unasuma vilyo.
11 Hwetu tuvammalele nni tuvana tùva atata yumo. Hwetu nni tuvanu tùvá kukulupika, akee tuvapelelesi.”
12 Henga Yusufu nkuhimya wachidoni, “Nanga! Mwenu mùidile unapelelesa nchilambo chetu uchinga mupate kumala idabadangi yetu.”
13 Henga vanang'o nkunnyang'ula kuchidoni, “Hwetu tuvatumishi vako, túvele tuvana kumi na mbili tùvá atata yumo, mwenedi wa chilambo cha ku Kanaani. Nnung'unwetu àisalidile kukaya na atata wetu, na nnung'unwetu yunji ànihila.”
14 Henga Yusufu nkuvahaulila kuchidoni, “Nni uchocho chinguhawile kuva mwenu nni mmapelelesi.
15 Uvila njo chimumbelingwa. Nangu mbènkwapila kwanga Falao kuva, apano nanga pamumbeuka mpaka pambeida nnung'unwenu.
16 Nnaije munu yumo mmwenu akantwale aneyo nnung'unwenu akuno mmanji mutaìjwè nnilungu. Anepo njo paumbemaikana uhiu wa malove lenu. Na akànaide na nnung'unwenu, bahi ngwàpila kwanga Falao kuva, muhiu mwenu mmapelelesi.”
17 Bahi nkuvataya vammalele nnilungu kwa maduva matatu.
18 Liduva lya tatu Yusufu nkuvahaulila kuchidoni, “Bahi tendanga uvila uchinga mupate kulama, kwa kuva nangu namweshimu Nnungu.
19 Ikàva muhiu mwenu ni mmanu mukulupika, bahi yumo mmwenu àisalile nnilungu, na mwenu mmanji muvapelekejije vilyo alangavenu vavêle na indala,
20 koka mukahaloke na nnung'unwenu n'joko apano. Anelyo njo limbemaîha uhiu wa malove lenu, na mwenu mukambewalalwa.” Bahi vanang'o nkukubali kutenda uchocho.
21 Vanang'o nkuva uvahaulanila vene kwa vene kwa luga yavo uvachidoni, “Muhiu hwetu twaninkosela nnung'unwetu. Ikànava twanimwona chanavele na uchungu pachitupembeja tuupohe umi wake, henga hwetu nanga patunampilikanidile. Aneyo njo ing'anya ya ibaniki aino ituipata vino.”
22 Lubeni nkuvahaulila kuchidoni, “Dachi, nangu tenda ńninnyaulilanga kuva tunantendele mabaya nnung'unwetu? Henga mwenu nanga pamunangupilikanidile! Hambi tùvenkwasibiwa ing'anya ya kuhwa kwake.”
23 Vanang'o nanga pavanamaite kuva àlalá lavachitangola Yusufu ánalapilikana, kwa kuva álonjela navo kwa indila ya nkalimani.
24 Yusufu nkuhwena kunyenje, nkutandilika ukuta. Panyalele, nkuuya unalonjela navo kavila. Yusufu nkulaija Simeoni akamulwe na kuhungwa mididi akuno anung'unuvake uvalola.
Akuluvake Yusufu vàuya kwavo
25 Yusufu nkuvalaija vatumishi vake vavataile vilyo mmagunila lao na kila munu vammuihije madini lake la dihela nnigunila lyake, na vaveng'e chakulya cha nndila. Vanang'o nkuvatendela muchi chalaijije.
26 Bahi avala akuluvake nkuvanyakuja punda vao misigo yavo ya vilyo, nkuuka.
27 Pavanavele nndila, nkuhwika pachinu pakulala, munu yumo muanevo nkuhungula ligunila lyake uchinga annihe punda wake chakulya, nkukangana namene palawene madini lake la dihela pannima ligunila lyake.
28 Nkuvahaulila anung'unuvake kuchidoni, “Madini langu la dihela vàninguuyihija. Alano apano pannima ligunila lyangu!” Pavapilikene anelo, mitima yao nkutenguka. Nkulolana akuno uvatetemela, nkuujana kuchidoni, “Chinu ntwani achino chatutendeledile Nnungu?”
29 Pavahwikile nchilambo cha ku Kanaani kwa Yakobo atatawao, vanang'o nkunnyaulila lammalele lavakojîje uvachidoni,
30 “Nkulungwa wa chilambo achila átangola na hwetu kwa kukalipa, na kutwona hwetu kuva tuvapelelesi nchilambo chake.
31 Henga hwetu nkunnyaulila kuva, hwetu ni tuvanu tuvakukulupika, na wala akee tuvapelelesi.
32 Hwetu nkunnyaulila kuva, hwetu twavele tuvana kumi na mbili tùvá atata yumo, na kuva, nnung'unwetu ànihila na nnung'unwetu wa chihwangwa àvele kukaya, nchilambo cha ku Kanaani pamo na atata wetu.
33 Anepo ayula nkulungwa wa chilambo achila nkutuhaulila kuchidoni, ‘Uvila njo chinimbemala kuva muhiu mwenu ni mmanu mukulupika. Nneke apano munu yumo mmwenu, koka mwenu mupelekeje vilyo kwa alangavenu vavêle na indala.
34 Bahi pamumbeuya aneko mulangane na nnung'unwenu wa chihwangwa, na anepo njo panimbemala kuva mwenu mukee mmapelelesi ila ni mmanu mukulupîka. Mukàtenda uchocho, nangu nguchininchimulile nnilungu nkulwenu, na muchimuluhusiwe kusuma na kusumisa nchilambo achino.’ ”
35 Pavachikuchula vilyo mmagunila lao, nkukangana pavawene kila munu vammuihijìjè chihwitiki chake cha madini la dihela nnigunila lyake. Pavalawene anelo, vammalele pamo na atata wao nkuyopa.
36 Yakobo atata wao nkuvahaulila kuchidoni, “Mwenu mùngupakanywele vana vangu! Yusufu akapali, na Simeoni akapali, na vino mùlembela muntwale na Benjamini. Anelo lammalele làngukoja chihi unene!”
37 Anepo Lubeni nkunnyaulila atatake kuchidoni, “Nikànauye na Benjamini, bahi vawalale anavangu vavili. Nneke Benjamini mmakono langu, nanangu nguchininchunge na kuuya nawe apano.”
38 Henga atatake nkunnyang'ula kuchidoni, “Mwanangu nanga pambelangana na mwenu. Nkuluwe ànihila, nang'e weka njo aisalidîle. Na nangu vino nni nsele nguvêle na dihulisi. Na lakànkoja mambo mabaya mmwanda umuhwena, nguchinguhwe na lihindambi.”