6
Vakwave Yesu vankumwita
Mateu 13:53-58
Napanelo Yesu akauma palyutu alyo kuka mpaka kwave; vakwoda vake vashindamwoda. Likawike liduva lyakupumula andyúka kushitala shakulipudidya kutwala kutunduvanga kupundisha; vanu voe váshimwigwilila vandíshanga kutwala kushidoni, “Na aju vitendo avi apatilé kwashi? Limanyilo ali lyavampele na aju livé dashi na makango ala atenda nae ankutandela mwashi? Na aju i jo nkúveda mwanagwe Maliya, nkulugwe Tiyagu, Yoshe, Yudashi namu Simoni? Da valumbuvake i ava vavéle namu wetu apa?” Vanavo mwaa wake nae ishindavanyatila. Yesu kushidoni, “Hapali nkúlava ákaishimika ila mushilambo shake kwavavele vatatavake na valikola vake ni kwakanaishimika.” Nae popo po haimmaikidile kutenda makango ila andívavikila makono valwele padyoko kutwala kuvaponia. Nadoni nae andíshanga kwamwaa waungakulupila wave.
Yesu ankuvatumidya vamyombe kumi na mbili
Mateu 10:5-15; Lukashi 9:1-6
Napanelo nae kuma kupita apundisha mumakaja ashitanono. Andívashema avalá kumi na mbili kutwala kuvatuma vavili-vavili na kuvapa madalaka akulamulilila majini mashapu. Andívaleya kunyukata shinu shoeshoe mushimwanda shave ila vanyukate ipimbo bai; shakulya mene, lipeta mene na dishingo mene. Vagwale vilatu tu; dikanju mbili havanagwale. 10 Andívaulila kavili kushidoni, “Paing'ande yoeyoe yamulota kuwikila, ikalanga popo mpaka pamulota kuma likaja alyo. 11 Palyutu lyoelyoe vakanampwashalela na vakanalota kumwigwilila, pamuma po, lipumunange litutunga mmadodo mwenu pakulota uve ushuda kwave vanavo.” 12 Bai vanavo vandyúma kupita vavalangangila vanu valijugulange madambi ave. 13 Majini oe vashindakumulanga na valwele voe vashindavapaka mauta kutwala valwele vo vashindavaponia.
Kubyaigwa kumwe Nshuwau Wakubatisha
Mateu 14:1-12; Lukashi 9:7-9
14 Napanelo umu Elode andígwa vinu avyo víshitandeka kwodamwaa shimbili shimwe Yesu shindyúmanikanga kula kushinu. Vanu vashindatangola kushidoni, “Nshuwau Wakubatisha andidyuka pakati pavakupela ni ashi shitádya vyamakango avyo vipagwe namu nae.” 15 Vanji doni, “Liyashi ajo.” Vanji, “Aju nkúlava, avelé kenga nkúlava jumo pakati pavakulava vakala.” 16 Kanji Elode paigwite malove alo nae kushidoni, “Nshuwau ajo; jo waninnamulidile nangu vanshinde, apo jojo jo, andidyuka.”
17 Jo Elode jo, kala po andílamulila vamunge Nshuwau vanjele nkalaboshi mwaa nae aníntwala Elodiya nkongwe washinnomba nung'une mwene walina Pilipo kutwala kunnomba. 18 Napanelo Nshuwau ashinanduma Elode kushidoni, “Haikuvaikidile unnombe nkongwe ndyagwe nung'uno.” 19 Napavedoni Elodiya ashinammikila shitundi Nshuwau, ashindalota ammyae kanji haishuulukika 20 mwaa Elode ashinanjopa Nshuwau. Nae ashinanshilidyanga pakuva anímmanya kenga avele munu waishaliya na wakwilimyanga wake Nnungu. Ishinannagwela kumwigwilila Nshuwau ata ikava kenga pashimwigwilila po, ashinampuwanianga.
21 Napanelo muliduva lyashitenda Elode shikukulu shakumbukumbu yakuvalekwa kwake lindípatikana litala kumwe Elodiya lyakutandela amulá mwashilota. Muliduva alyo Elode andívapa shakulya vananangalaledi vakumene vaishilikali yake, vananangalaledi vavaing'ondo na vananangalaledi vakumene vakwaloka ku Galileya. 22 Bai mwanagwe Elodiya nkongwe kwinjila mulyutu lyo kuvina landa kutwala Elode pamo na vakulalikigwa kuvanagwela namene. Umu jo ikannagwele, andímwaulila mwali kushidoni, “Ngujugwa shinu shoeshoe nangu ndakupa!” 23 Nae kulilapila kushidoni, “Ngujugwa shoeshoe shaulota, ata paikavele inushu yautawala wangu, ndakupa.” 24 Mwali kuma kuka ndamudya anyoke, “Ngujugwe nyamani?” Anyoke kushidoni, “Kanjugwe muti umwe Nshuwau Wakubatisha.”
25 Mwali kuukinneu kumwe umu ndamwaulila kushidoni, “Ninkulota ungupe ambi popa mushani muti umwe Nshuwau Wakubatisha.” 26 Umu shindímwidila shipalodi shoe namene napane kwodamwaa andílilapa pamevo pa avalá vakulalikigwa, halatíle kumwitila. 27 Umu kutwala kuntuma mwing'ondo akaidenavo muti wo. Nae kuka kukalaboshi nanshinda Nshuwau 28 kutwala muti wo kwidanavo àvikile mushani ndamupa mwali, mwali kutwala kuka ndamupa anyoke. 29 Vakwoda vake Nshuwau vakaigwe dyabali adyo vandyúka ndatwala mili wo ndashika.
Yesu ankulisha imbumba yavanu dyalupu mwanu
Mateu 14:13-21; Lukashi 9:10-17; Nshuwau 6:1-14
30 Napanelo avalá vamyombe vandyúja kuka kumwe Yesu kutwala kummalangangila vinu uti vyavatandile na vyavapundishidye. 31 Yesu kutwala kuvaulila kushidoni, “Mwenu, tuke kushimbweshe tukapumule padyoko kwagweka.” Mwaa pashinu apo vandípagwa vanu voe váshida na váshuma váshitadya mpaka vanavo litala lyakulyela shinu mene kuvapagwidya. 32 Vanavo kwinjilanga mwingalava gweka yave kuka kushimbweshe.
33 Napanelo vanu voe vakavona vauma na vamanya kwavashuka, vanu vakwalakela mminjini uti kutukuta namadodo kulitandya vanavo kuwika. 34 Yesu pashulwike mwingalava, kwona imbumba yavanu nae kwanangila shididi mwaa ishiva kenga imbumba yadingandolo díkavenavo nkúshunga* kutwala kutunduvanga kuvapundisha vinu vyoe. 35 Liduva napanelo liinjila mmamba, vakwoda vake vanímmandika kutwala kumwaulila doni, “Pashinu apa panalugwangwa vila na wakati wo undipita. 36 Vaulile venentete vaukanange mmala na mmakaja akuvandika vakashume shinu valye.”
37 Yesu kutwala kuvajang'ula kushidoni, “Shinu sho, vape mwenu po!” Vanavo kushidoni, “Shosho sho shilotegwa dinali dimiya mbili! Napanelo indivaikila tuvape kulya tujanga njuluku au?” 38 Nae kushidoni, “Da mwenu po muvénavo magung'u mangapi? Wena mukalole!” Pavaukile ndalola vakamwaulila doni, “Apagwité magung'u mwanu na dyomba mbili.” 39 Napanelo Yesu andívalamulila vakwoda vake vavikadyange venentete muukoka kwamapungu. 40 Venentete vo kwikalanga mapungu avanu miya-miya na avanu amusini-amusini. 41 Yesu kutwala alalá magung'u mwanu pamo na adilá dyomba mbili kulola kuwa kwalaliya kumajanianga magung'u kuvapa vakwoda vake vavajavile namomo kuvajavila adilá dyomba mbili vanu uti. 42 Vanavo uti kulya mpaka kwikuta. 43 Vakwoda vake vakatwalange makombo amagung'u pamo na adyomba vandyúmbadya makalala kumi na mbili. 44 Vanu ve valíle magung'u alo vavele valume dyalupu mwanu.
Yesu ankuwena pashanya medi
Mateu 14:22-33; Nshuwau 6:15-21
45 Yesu kutwala kuvakanyalidyangidyanneu vakwoda vake vakwalange mwingalava vauke valangalela litanda nkono unji yani ku Beteshaida vanneke nae alaila imbumba yavanu. 46 Akalaile imbumba, andyúka kulishinga ndashwali. 47 Pauwikile wakati wayalyulo ingalava kuwika shing'ati litanda nae avelé gweka kumwangu. 48 Napanelo nae avona vakwoda vake kuvauvanga pavashandesha ingalava mwaa imepo ishaaloka mushu mwave, muwakati walyamba kumanga kulangala, nae kuvaukila awena pashanya medi. Alota avapite mushu mwave, 49 vanavo pavangwene awena pashanya medi, vashona doni, “Ali litailei,” kutwala vanavo kukugwanga. 50 Vanavo uti vakamwone vanínjopa, nae kutangalenneu kushidoni, “Lyunge ntima! Ni nangu apa. Hamunajope!” 51 Yesu kukwela mwingalava amulá kupagwa pamo namu vanavo kutwala imepo yo kumalala do, jii! Vanavo kushanga 52 mwaa ata lo makango amagung'u alalá, mana ake havamanyíte; mitima vyave vandítadya vinanope.
Yesu ankuvaponia vamidi
Mateu 14:34-36
53 Napanelo vakaamboke litanda lyo vandíwika shilambo sha ku Geneshaleti kushiya ingalava yave kutwala kuungangila. 54 Vanavo pavaumanenge mwingalava venentete kummanyinneu Yesu. 55 Bai venentete kuumananga kupita vatukuta mumakaja aisemu ayo vapita vavanyukata valwele mudigoli kuvaukanavo kulyutu lyavashiigwanga kenga Yesu avelé kwanavo. 56 Kulyutu lyoelyoe kwashuka nae, mminjini mmakaja madikidiki kwali mmagwelu, vanu vashindavatwala valwele kuvaladya mumautu aumbala kutwala kunjugwangila avaleke valwele vankwae padyoko vela munkumbu waikanju yake. Uti avalá váshinkwaa, vashindapona.
* 6:34 Lola I Vaumu 22:17. 6:37 Dinali dimiya mbili uvele njuluku woe mwaa dinali imo uvele nshala wamunu kwaliduva limo.