២
ទំនុកតម្កើងរបស់នាងហាណា
១ ពេលនោះ នាងហាណាអធិស្ឋានដូចតទៅ៖
«ព្រះអម្ចាស់ប្រោសប្រទានអោយខ្ញុំមានចិត្ត
ត្រេកអរសប្បាយយ៉ាងខ្លាំង
ព្រះអម្ចាស់លើកខ្ញុំឡើងអោយបានខ្ពស់មុខ
ខ្ញុំអាចហាមាត់និយាយតទល់នឹងខ្មាំងសត្រូវវិញ
ខ្ញុំមានអំណរយ៉ាងខ្លាំង
ព្រោះព្រះអង្គសង្គ្រោះខ្ញុំ។
២ គ្មាននរណាម្នាក់វិសុទ្ធ* ដូចព្រះអម្ចាស់ទេ
គ្មាននរណាម្នាក់ដូចព្រះអង្គឡើយ
ហើយក៏គ្មានថ្មដាណារឹងមាំ
ដូចព្រះនៃយើងដែរ។
៣ កុំចេះតែពោលពាក្យអួតបំប៉ោងឡើយ
ហើយក៏មិនត្រូវអោយមានពាក្យសំដីព្រហើន
ចេញពីមាត់អ្នករាល់គ្នាដែរ
ដ្បិតព្រះអម្ចាស់ជាព្រះ
ដែលជ្រាបសព្វគ្រប់ទាំងអស់
ព្រះអង្គវិនិច្ឆ័យគ្រប់អំពើរបស់មនុស្ស។
៤ ព្រះអង្គកាច់បំបាក់ធ្នូរបស់ទាហានដ៏ខ្លាំងពូកែ
តែព្រះអង្គប្រទានកម្លាំង
ដល់មនុស្សទន់ខ្សោយ។
៥ អស់អ្នកដែលធ្លាប់តែមានអាហារបរិបូណ៌
បែរជានាំគ្នាស្វែងរកអាហារចំអែតក្រពះ
រីឯអ្នកដែលធ្លាប់តែអត់ឃ្លាន
បែរជាមានអាហារបរិបូណ៌ទៅវិញ។
ព្រះអង្គប្រោសប្រទានអោយស្ត្រីអារ
សំរាលកូនដល់ទៅប្រាំពីរដង
តែស្ត្រីសាយកូន បែរជាគ្មានកូនទៅវិញ។
៦ ជីវិតរបស់មនុស្សត្រូវស្លាប់ ឬរស់
ស្រេចតែលើព្រះអម្ចាស់
គេត្រូវធ្លាក់ទៅស្ថានមនុស្សស្លាប់
ឬឡើងមកវិញ ក៏ស្រេចតែលើព្រះអង្គដែរ
៧ មនុស្សយើងមាន ឬក្រ ស្រេចតែលើព្រះអម្ចាស់
ព្រះអង្គបន្ទាបនរណាក៏បាន
ឬលើកនរណាឡើងក៏បាន។
៨ ព្រះអង្គលើកមនុស្សកំសត់ទុគ៌តចេញពីធូលីដី
ហើយដកមនុស្សក្រីក្រចេញពីគំនរសំរាម
ដើម្បីអោយគេបានអង្គុយទន្ទឹមនឹងអ្នកធំ
ព្រមទាំងបានគ្រងរាជសម្បត្តិដ៏រុងរឿង
ដ្បិតព្រះអម្ចាស់បានតែងតាំងគ្រឹះនៃផែនដី
ហើយព្រះអង្គដាក់ពិភពលោក
នៅលើគ្រឹះនេះ។
៩ ព្រះអង្គថែរក្សាដំណើរជីវិត
របស់អស់អ្នកដែលស្មោះត្រង់នឹងព្រះអង្គ
រីឯមនុស្សអាក្រក់វិញ
គេនឹងត្រូវវិនាសក្នុងភាពងងឹត
ដ្បិតមនុស្សមិនអាចមានជ័យជំនះ
ដោយសារកម្លាំងរបស់ខ្លួនបានឡើយ។
១០ អស់អ្នកដែលប្រឆាំងនឹងព្រះអម្ចាស់
មុខជាត្រូវអន្តរាយ
ព្រះអង្គធ្វើអោយមានរន្ទះពីលើមេឃ
បាញ់ចំពួកគេ។
ព្រះអម្ចាស់នឹងវិនិច្ឆ័យទោសផែនដីទាំងមូល
ព្រះអង្គប្រទានឫទ្ធានុភាពដល់ស្ដេច
ដែលព្រះអង្គតែងតាំង
ព្រមទាំងប្រទានព្រះចេស្ដាដល់ព្រះមហាក្សត្រ
ដែលព្រះអង្គបានចាក់ប្រេងអភិសេក»។
១១ បន្ទាប់មក លោកអែលកាណាក៏វិលទៅផ្ទះរបស់គាត់នៅភូមិរ៉ាម៉ាវិញ រីឯកុមារសាំយូអែលនៅបំរើព្រះអម្ចាស់ ជាមួយលោកបូជាចារ្យអេលី។
កូនប្រុសទាំងពីររបស់លោកអេលី
១២ កូនប្រុសរបស់លោកអេលីជាមនុស្សពាល ពួកគេមិនស្គាល់ព្រះអម្ចាស់ទេ។
១៣ ទោះបីអ្នកទាំងនោះមានមុខងារជាបូជាចារ្យក្ដី គេប្រព្រឹត្តចំពោះប្រជាជន ដូចតទៅ: កាលណាមានគេយកយញ្ញបូជាមកថ្វាយព្រះអម្ចាស់ អ្នកបំរើរបស់បូជាចារ្យក៏ចូលមកចំពេលដែលគេចំអិនសាច់ ទាំងកាន់សមមុខបីមកជាមួយផង។
១៤ អ្នកបំរើនោះយកសមចាក់សាច់ដែលគេស្ងោរ នៅក្នុងខ្ទះ ក្នុងឆ្នាំង ឬក្នុងថ្លាង ហើយសាច់ទាំងប៉ុន្មានដែលនៅជាប់នឹងសមនោះ បូជាចារ្យប្រមូលយកទាំងអស់។ ពួកគេតែងតែប្រព្រឹត្តបែបនេះចំពោះជនជាតិអ៊ីស្រាអែលទាំងអស់ ដែលមកថ្វាយយញ្ញបូជានៅស៊ីឡូ។
១៥ ជួនកាលមុនពេលគេដុតខ្លាញ់ អ្នកបំរើរបស់បូជាចារ្យមកនិយាយនឹងអ្នកដែលថ្វាយយញ្ញបូជាថា៖ «ចូរប្រគល់សាច់ដែលត្រូវអាំងនេះជូនលោកបូជាចារ្យទៅ ដ្បិតលោកមិនទទួលសាច់ឆ្អិនពីអ្នកទេ គឺលោកទទួលតែសាច់ឆៅប៉ុណ្ណោះ»។
១៦ ប្រសិនបើអ្នកនោះឆ្លើយថា «ត្រូវដុតខ្លាញ់ជាមុនសិន រួចសឹមអ្នកយកតាមចិត្តចុះ!» នោះអ្នកបំរើពោលឡើងថា «ទេ! ត្រូវអោយខ្ញុំឥឡូវនេះមក បើមិនដូច្នោះទេ ខ្ញុំនឹងយកដោយប្រើកម្លាំងបាយ!»។
១៧ អំពើបាបដែលកូនប្រុសរបស់លោកអេលីប្រព្រឹត្តនោះ ទាស់នឹងព្រះហឫទ័យរបស់ព្រះអម្ចាស់ខ្លាំងណាស់ ដ្បិតពួកគេប្រមាថមើលងាយតង្វាយរបស់ព្រះអង្គ។
កុមារសាំយូអែលនៅស៊ីឡូ
១៨ កុមារសាំយូអែលបំពេញការងារនៅចំពោះព្រះភក្ត្រព្រះអម្ចាស់ គាត់ពាក់អាវអេផូដ*ធ្វើពីក្រណាត់ទេសឯក។
១៩ រៀងរាល់ឆ្នាំ ម្ដាយតែងតែដេរអាវតូចមួយយកមកអោយ នៅពេលនាងឡើងមកជាមួយប្ដី ដើម្បីថ្វាយយញ្ញបូជាប្រចាំឆ្នាំ។
២០ លោកអេលីជូនពរលោកអែលកាណា និងនាងហាណាថា៖ «សូមព្រះអម្ចាស់ប្រោសប្រទានអោយអ្នកមានកូនផ្សេងទៀត ជាមួយស្ត្រីនេះ ជំនួសកូនដែលនាងបានថ្វាយទៅព្រះអម្ចាស់!»។ បន្ទាប់មក ពួកគេវិលត្រឡប់ទៅផ្ទះវិញ។
២១ ព្រះអម្ចាស់ប្រោសប្រណីដល់នាងហាណា នាងក៏មានផ្ទៃពោះជាបន្តបន្ទាប់ ហើយសំរាលបានកូនប្រុសបីនាក់ និងស្រីពីរនាក់។ រីឯកុមារសាំយូអែលមានវ័យចំរើនធំឡើងនៅចំពោះព្រះភក្ត្រព្រះអម្ចាស់។
លោកអេលីស្ដីបន្ទោសកូនៗរបស់លោក
២២ លោកអេលីមានវ័យកាន់តែចាស់ជរាណាស់ហើយ លោកឮគេនិយាយពីអំពើផ្សេងៗ ដែលកូនប្រុសទាំងពីររបស់លោកបានប្រព្រឹត្តចំពោះជនជាតិអ៊ីស្រាអែលទាំងមូល ជាពិសេស លោកឮថា កូនរបស់លោកតែងតែដេកជាមួយស្រីៗដែលធ្វើការនៅមាត់ទ្វារព្រះពន្លា។
២៣ លោកអេលីក៏ពោលទៅកូនៗរបស់លោកថា៖ «ហេតុអ្វីបានជាកូនធ្វើដូច្នេះ? ពុកបានឮប្រជាជននិយាយពីអំពើអាក្រក់របស់កូនគ្រប់ៗគ្នា។
២៤ កូនអើយ មិនត្រូវធ្វើបែបនេះឡើយ អ្វីៗទាំងប៉ុន្មានដែលពុកបានឮប្រជាជននិយាយពីកូននោះ អាក្រក់ហួសហេតុណាស់!
២៥ ប្រសិនបើមនុស្សម្នាក់ប្រព្រឹត្តអំពើបាបទៅលើម្នាក់ទៀត ព្រះជាម្ចាស់នឹងរកខុសត្រូវអោយ ផ្ទុយទៅវិញ ប្រសិនបើគេប្រព្រឹត្តអំពើបាបទៅលើព្រះអម្ចាស់ តើនឹងមាននរណារកខុសត្រូវអោយ?»។ កូនៗលោកអេលីពុំព្រមស្ដាប់តាមពាក្យទូន្មានរបស់ឪពុកឡើយ ដ្បិតព្រះអម្ចាស់បានសំរេចប្រហារជីវិតពួកគេចោល។
២៦ រីឯកុមារសាំយូអែលមានវ័យចំរើនធំឡើង ជាទីគាប់ព្រះហឫទ័យព្រះអម្ចាស់ និងជាទីពេញចិត្តរបស់មនុស្សម្នាទាំងឡាយ។
ព្យាការីម្នាក់ប្រកាសពីការដាក់ទោសគ្រួសារលោកអេលី
២៧ មានអ្នកជំនិតមួយរូបរបស់ព្រះជាម្ចាស់បានមកជួបលោកអេលី ពោលថា៖ «ព្រះអម្ចាស់មានព្រះបន្ទូលដូចតទៅ:
“កាលបុព្វបុរសរបស់អ្នកស្ថិតនៅស្រុកអេស៊ីប ជាទាសកររបស់ស្ដេចផារ៉ោន យើងបានសំដែងអោយគេស្គាល់យើង។
២៨ យើងជ្រើសរើសអើរ៉ុន ជាបុព្វបុរសរបស់អ្នក ពីក្នុងចំណោមកុលសម្ព័ន្ធទាំងអស់របស់ប្រជាជនអ៊ីស្រាអែល អោយបំពេញមុខងារជាបូជាចារ្យ ដើម្បីឡើងទៅអាសនៈដុតគ្រឿងក្រអូប និងពាក់អាវអេផូដ* បំរើយើង។ យើងបានចែកសាច់ដែលជនជាតិអ៊ីស្រាអែលយកមកដុតជាតង្វាយដល់យើង អោយពូជពង្សនៃបុព្វបុរសរបស់អ្នករាល់គ្នា។
២៩ ហេតុអ្វីបានជាអ្នករាល់គ្នាជាន់ឈ្លីយញ្ញបូជា និងតង្វាយ ដែលយើងបង្គាប់អោយប្រជាជនយកមកថ្វាយ នៅក្នុងដំណាក់របស់យើង? ហេតុអ្វីបានជាអ្នកលើកតម្កើងកូនរបស់អ្នកជាងយើង ដោយបណ្ដោយអោយកូនយកចំណែកតង្វាយល្អៗរបស់ជនជាតិអ៊ីស្រាអែល ជាប្រជាជនរបស់យើង យកទៅបំប៉នខ្លួនឯងដូច្នេះ?”
៣០ ហេតុនេះ ព្រះអម្ចាស់ ជាព្រះនៃជនជាតិអ៊ីស្រាអែល មានព្រះបន្ទូលដូចតទៅ: យើងធ្លាប់សន្យាពីមុនមកថា ពូជពង្សនៃបុព្វបុរសរបស់អ្នក គឺពូជពង្សរបស់អ្នក នឹងបំរើយើងអស់កល្បជាអង្វែងតរៀងទៅ។ ក៏ប៉ុន្តែ ឥឡូវនេះ យើងសូមប្រកាសយ៉ាងឱឡារិកថា យើងលុបបំបាត់ចោលនូវពាក្យសន្យានោះហើយ! ដ្បិតយើងផ្ដល់កិត្តិយសដល់អស់អ្នកដែលលើកកិត្តិយសយើង តែបើអ្នកណាមើលងាយយើង យើងក៏លែងរាប់រកអ្នកនោះវិញដែរ!
៣១ ទៅអនាគត យើងនឹងធ្វើអោយអ្នក ព្រមទាំងពូជពង្សរបស់អ្នក បាក់កម្លាំង ហើយក្នុងពូជពង្សរបស់អ្នក គ្មាននរណាម្នាក់មានអាយុវែងទៀតឡើយ។
៣២ អ្នកនឹងឃើញគូវិវាទរបស់អ្នក ស្ថិតនៅក្នុងដំណាក់របស់យើង។ ប្រជាជនអ៊ីស្រាអែលនឹងទទួលសេចក្ដីសុខចំរើន ដោយសារអ្នកនោះ រីឯក្នុងពូជពង្សរបស់អ្នកវិញ គ្មាននរណាម្នាក់មានអាយុវែងទៀតឡើយ។
៣៣ ទោះជាយ៉ាងណាក្ដី យើងនឹងទុកអោយមានមនុស្សម្នាក់ក្នុងពូជពង្សរបស់អ្នក បំពេញមុខងារនៅជិតអាសនៈរបស់យើង ដើម្បីអោយអ្នកឈឺចិត្ត និងបាត់បង់សេចក្ដីសង្ឃឹម។ រីឯកូនចៅឯទៀតៗរបស់អ្នកដែលកើតមកតាមក្រោយ នឹងត្រូវស្លាប់ ក្នុងពេលកំពុងតែពេញវ័យ។
៣៤ អ្នកនឹងឃើញការដែលកើតមានចំពោះកូនប្រុសទាំងពីររបស់អ្នក គឺហូបនី និងភីនេហាស ទុកជាទីសំគាល់។ ពួកគេទាំងពីរនាក់នឹងត្រូវស្លាប់ក្នុងថ្ងៃតែមួយ។
៣៥ បន្ទាប់មក យើងជ្រើសរើសយកបូជាចារ្យមួយរូប ដែលមានចិត្តស្មោះត្រង់ ហើយប្រព្រឹត្តតាមចិត្ត និងតាមគោលគំនិតរបស់យើង។ យើងនឹងអោយគេមានពូជពង្សមួយដែលមានស្ថិរភាព គេនឹងបំរើស្ដេចដែលយើងចាក់ប្រេងអភិសេកជារៀងរហូត។
៣៦ ពេលនោះ ពូជពង្សរបស់អ្នកដែលនៅសេសសល់ នឹងមកក្រាបសំពះអ្នកនោះ ដើម្បីសុំប្រាក់ និងសុំអាហារទាំងអង្វរថា “សូមមេត្តាអនុញ្ញាតអោយខ្ញុំប្របាទ នៅបំពេញការងារជាបូជាចារ្យជាមួយលោក ដើម្បីអោយខ្ញុំប្របាទមានអាហារខ្លះសំរាប់បរិភោគផង”»។