36
Iso tubula liliusi
(1 Lil 1.34-37)
1 Baisa makawala Iso matauna igiyuwela Edom tubula liliusi.
2 Iso ivaiya Ada minana vilela Kenani, tamala yagala Eloni guma Itai. Nayuwela la kwava yagala Owolibama minana tamala yagala Anai, matauna Sibioni latula guma Ivi,
3 e natolula yagala Basimata, minana Nebaioti luleta, e tumasi Isimeili.
4 Ada latula Elipasa; Basimata latula Reueli;
5 e Owolibama litula, Yeusa, Yalam, deli Kora, matausina komwaidosi wala Iso litula leiuni mapilana Kenani.
6 Oluvi Iso ikoluluvi la kukova, litula tauwau deli vivila, e komwaidona la tomota ola bwala, la mauna komwaidona, deli la guguwa komwaidona makwaisina leitakuni mapilana Kenani, e Iso isilavi bodala Yekobe, e ila valu ituwoli.
7 Matauna la koluluvi uula valu makwaina leisisikaisi sola Yekobe gala ibudoki si kaisisu. Paila kasitaiyu wala saina bidugaga si mauna e gala ibodi bisisuaisi valu kwaitala.
8 Mapaila Iso ila ibudi valu mapilana Edom wa koya.
9 Baisa makawala Iso tubula, dalesi mina Edom.
10-13 Iso la kwava Ada iuni taitala wala latula yagala Elipasa. E oluvi Elipasa iunai tailima litula. Temani, Oma, Sepo, Gatam, deli Kenasi. E nayuwela la kwava, minana Timna eiuni taitala tuvaila latula tau, yagala Ameleki. Iso la kwava Basimata latula taitala wala tau, yagala Reueli, e oluvi Reueli iuni litula kasi bawa taivasi, yagasi. Naata, Sira, Samma, deli Misa.
14 E Iso nayuwela la kwava yagala Owolibama, minana Anai latula, e Anai matauna Sibioni latula. Minana iuni litula taitolu tauwau. Matausina yagasi Yeusa, Yalam, Kora.
15 Dala makwaisina leidalasi metoya baisa Iso. Iso la kuluta yagala Elipasa matauna dalela, Temani, Oma, Sepo, Kenasi,
16 Kora, Gatam deli Ameleki. Komwaidosi wala matausina tubusi Ada, minana Iso la kwava.
17 Iso latula Reueli matauna tubula madalasina, Naata, Sira, Samma deli Misa. Komwaidosi wala matausina tubusi Basimata Iso la kwava nayuwela.
18 Iso dalela leidalasi metoya baisa la kwava natolula, yagala Owolibama, minana Anai latula, matausina yagasi Yeusa, Yalam, deli Kora.
19 Komwaidosi wala matausina Iso dalela.
Seiri tubula liliusi
(1 Lil 1.38-42)
20-21 Baisa makawala Seiri matauna guma Ora, tubula yagasi matausina tosibogwa mapilana Edom, Lotani, Sobali, Sibioni, Anai, Disoni, Esa, deli Disani.
22 Lotani dalela Ori sola Emani. (Lotani luleta yagala Timna.)
23 Sobali dalela madilasina Alivani, Manaata, Ebali, Sepo deli Onam.
24 Sibioni litula taiyu, Aiya sola Anai. (Anai matauna leibanena sopi yuviyavi ititayelu oviloupakala; avai tuta iiyamata tamala la ase.)
25-26 Anai latula Disoni e matauna tubusi, Emdani, Esibani, Itirani, deli Kerani dalela. Tuvaila Anai latula natana vivila yagala Owolibama.
27 Esa dalela madilasina Bilani, Saavani, deli Akani.
28 Disoni dalela madilasina Usa deli Arani.
29-30 Matausina Ora dalela eisisuaisi mapilana Edom. yagasi, Lotani, Sobali, Sibioni, Anai, Disoni, Esa, deli Disani.
Edom gweguyala liliusi
(1 Lil 1.43-54)
31-39 Omitibogwa igau gala avai guyau iguguyoi Isireli, e ka, baisa yagasi matausina eitakasasi gweguyala Edom.
Bela matauna Beori latula, tolela Dinaba
Yobabi matauna Sera latula tolela Bosira
Usam matauna tolela mapilana Temani
Adadi matauna Bedadi latula, tolela Aviti,
(matauna eitomgwaga odubasi mina Midiani okabilia mapilana Mowabi)
Samla matauna tolela Masireka
Sauli matauna tolela Reyoboti Wa Waya
Beali Anani matauna Akibori latula
Adadi matauna tolela Pau
(matauna la kwava yagala Meetabeli;
minana Materedi latula, e Meseyabi tabula.)
40-43 Matausina Iso tubula mina Edom. Timna, Aliva, Yeteti, Owolibama, Ela, Pinoni, Kenasi, Temani, Mibisari, Magidieli, deli Iram. E ammakatuposina dala madalasina isisuaisi idokaisi si valu yagasi oigiyagala wala si dala.