79
Nigada paila mina Isireli kasi kwala
1 Mwa Yaubada! Matausina gala inikolaimsi bogwa leisuvisi mwada biyoulisi m valu.
E matausina bogwa eiyogwalaisi m Bwala Kwebumaboma,
deli eiligaimwaisi mapilana Yerusalem kwedadaimi wala.
2 E matausina eiligaimwaisi uwosi m tomota paila mluveka bikamsi,
e uwosi m towotetila paila mauna nabubolodila bikomasi.
3 E matausina ivigakaisi m tomota buyavisi ibubusi makawala sopi,
e buyavisi ititayelu makawala sopi olopola mapilana Yerusalem,
deli gala taitala isisu paila bikalibekwa tomata.
4 Boda ituwoli ituwoli otalila ikikatudeuwaimasi,
e matausina igigilaimasi deli iyosokanaimasi.
5 Mwa Guyau! Ki - m gibuluwa baisa yakamaisi gala wala biwokuva?
Kaina kam leiya bisisu wala bilululu makawala kova?
6 Kukivili m gibuluwa bilokaia boda ituwoli ituwoli gala itapwarorusi baisa yoku,
e deli matausina gala ininigadasi baisa yoku.
7 Paila uula matausina bogwa eikatumataisi m tomota,
e deli eikatudidaimisi m valu.
8 Taga bukumipukwaimasi paila si mitugaga tubumaiasi.
Kunokapisaimasi lagaila.
Ma pikwakusi komwaidona bogwa eitamwau.
9 Mwa Yaubada! Kupilasaimasi, deli kukwatumovaimasi.
Kukolaimasi deli kuligaiwa ma mitugagasi,
e baisa bivigaki kam kwamaiaba.
10 Avaka paila boda ituwoli ituwoli bikatupoiyaimasi, kawasi,
“Ki, ambaisaga mi Yaubada?”
Kutagwala bakagisaimsi yoku bukumipuki boda mabudosina
paila mapula buyavisi m towotetila.
11 Kunakaigali si kayagigila matausina okatupipi,
e metoya om peuligaga kutaneku matausina availa availa kasi mipuki mwada kaliga.
12 Mwa Guyau! Kumipuki mabudosina boda ituwoli ituwoli biboda sivalima sivayu,
paila uula si kauvikulu baisa yoku.
13 Mitaga yakamaisi m tomota, e m sipi metoya om yawa,
bakanokagutokisi baisa yoku tuta gala biwokuva,
deli bakayakawolaimsi tuta komwaidona e gala kala kalitutila.