☰ SAM 80
80
Nigada paila mina Isireli bikaimilavausi
1 Mwa! Yoku kasi Toyamata mina Isireli, kulagaimasi.
M yawa kala tokugwa yoku, kulagi ma bigasi.
Yoku kusili om takaikaia odubasi minasina bubuli isim pinupanesi.r+
2 Kuyomitalaim baisa madilasina dalesi Epereim, Beniamina deli Manasa.s
Kuvitulokaimasi m peula,
e kuma bukukwatumovaimasi.
 
3 Mwa Yaubada! Kukwaimilivauwaimasi.
Kunokapisaimasi, e bakabanaisi kama katumovasi. +
 
4 Mwa! Guyau Yaubada Topeuligaga,
ammakawala kala woloula bukugibuluwit ma nigadasi yakamaisi m tomota?
5 Yoku lokusakaimasi ninamwau okuvigaki kamasi bakakamsi,
e kwelaveka bolula mitalogi okuvigaki kama sopisi bakamomsi.
6 Lokutugwali mabudosina boda ituwoli ituwoli otalila bikabiliasi mwada biyoulisi ma valusi,
e kama tilaulasi ibigigagaimasi.
 
7 Mwa! Yaubada Topeuligaga, kukwaimilivauwaimasi.
Kunokapisaimasi, e bakabanaisi kama katumovasi. +
 
8 Lokukwalitati tamtala wainiu metoya mapilana Itipita,
e kubokavili boda ituwoli ituwoli, e lokuvali matamna osi valu.
9 E kutamigileu matamna,
e kaiviliwalila eisonusi sainela e tammla itetila wala ikaligiaki valu. +
10 Kuyowala ikuboli koya komwaidona,
e sisila goli ikalisuwolaisi kweisila kaivakaveka.
11 Sisila matamna ilovasi ilosi opilikwaibwaga, mapilana Bolita Kwaiveka,
e opilibomatu maduyona Waya Yupereiti.
12 Avaka uula lokukwatudidaimi kalila matamna?
Ka, availa ililoula opapala gagabila bikoumakavi kaiuwala.
13 Bolodilav ivapupoiyaisi,
e avai mauna avai mauna isusuvisi ikamkomasi kaiuwala.
 
14 Mwa! Yaubada Topeuligaga, kutovilakaimasi!
Kukululukwaimasi metoya wa labuma.
E kuma kukolaimasi yakamaisi m tomota.
15 Kuma bukukoli matamna lokuvali,
matamna goli lokuvigaki bitamveka.
 
16 Kama tilaulasi ikapitunaisi matamna e igabwaisi.
Kukululuki deli m ninamwau, e kumtuli matausina.
17 Bukukolaimasi deli bukutabodaimasi yakamaisi lokunagaimasi mwada m tomota,
paila omitibogwa kukwatupewolaimasi sainela.
18 Gala tuvaila bakatotubulokaimsi.
Kuyomovaimasi, e bakayakawolaimsi goli.
 
19 Mwa! Guyau Yaubada Topeuligaga, kukwaimilivauwaimasi.
Kunokapisaimasi, e bakabanaisi kama katumovasi.
r 80:1 Kugisi Sam 18.10. + 80:1 Sun 25.22 s 80:2 Epereim deli Manasa madilasina dilivakaveka oluwalaisi madilasina mina Isireli, e sivabidubadu bikalaumgulisi madilana Beniamina deli madilasina. + 80:3 Baw 10.10 t 80:4 Kugisi Sam 79.5. + 80:7 Sun 17.7; Baw 20.13 u 80:8 Baisa kabutuvitusila mina Isireli. + 80:9 Sun 20.2-3; Kak 5.6-7 v 80:13 Baisa kabutuvitusila kasi tilaula mina Isireli.
☰