☰ YONI IGISIMLILI 2
2
Kasi biga toekalesia mapilana Epeso
1 “Kugini baisa ekalesia si anelosi mapilana Epeso.
“Biga mabigasina metoya baisa matauna iiyosi nalima nayu utuyam ola kakata, matauna ililoula oluwalaisi kwailima kwaiyu kaitapa si kabototu goula. 2 Anikoli avaka lokuuvagaisi. Anikoli ammakawala lokuwotetilasi saina peula deli ammakawala lokupeulokaisi. Anikoli gala gagabila bukutagwalasi tomitugaga bisisuaisi, e deli lokuwakolaisi matausina ikaponaisi mwada aposetolo mitaga gala, e lokubanaisi isisasopasi. 3 Yokomi kupeulokaisi e lokulumkolaisi mwau paila yeigu, taga gala kuligaimwaisi mi tapwaroru, kupwaitukulasi wala. 4 Mesinaku baisa aiyosi paila yokomi; gala kuyebwailigusi tuta baisa makawala lokuvigakaigusi wa tuta eikugwa. 5 Bukululuwaisi ammakawala lokukwapusisi. Kuninavilasi metoya omi mitugaga e bukuvigakaisi makawala lokububunabogwasi. Kidamwa gala kuninavilasi metoya omi mitugaga, yeigu bawokaiami bakau mi kaitapa la kabototu metoya okabala. 6 Mitaga baisa bakavisaimi, paila kukoulovaisi bubunesi kala tobwakuli Nikoleiyo,i makawala goli yeigu akoulovi.
7 “Availa ilagi ibodi biligimlili avaka Baloma iluluki mabudosina ekalesia. +
“Baisa availa availa bitomgwagasi batugwali bikamsi kawailuwa makaina kaila momova itotu Yaubada ola bagula.
Kasi biga toekalesia mapilana Simona
8 “Kugini baisa ekalesia si anelosi mapilana Simona.
“Biga mabigasina metoya baisa matauna kabovitouula deli kabovigimkovila, matauwena goli eikaliga mitaga eimovavau. + 9 Anikoli kukulaisi pakula; anikoli yokomi kutonamakavasi (mitaga saina bidubadu mi veiguwa). Anikoli vavagi pupagatu ilivalaisi paila yokomi, matausiwena ikayupalaisij mwada mina Yudia, mitaga gala, paila mabudona Setani wala la boda. 10 Taga gala bukukukolaisi avai pakula avai pakula makateki bukubodaisi. Ka, Diabolo makateki bilavaimi mimilimi bukusuvisi wa bwala katupipi mwada biwakolaimi, e bukubodaisi kami mwau kwailuwotala yam.k Mitaga ibodaimi bukukimadagaisi e kaina bukutugwalaimi baisa okaliga goli, e mapaila basakaimi momova paila kami butia.l
11 “Availa ilagi ibodi biligimlili avaka Baloma iluluki mabudosina ekalesia. +
“Baisa availa availa bitomgwagasi gala bibodaisi kaliga kwaiyuwela.
Kasi biga toekalesia mapilana Pegam
12 “E kugini baisa ekalesia si anelosi mapilana Pegam.
“Biga mabigasina metoya baisa matauna iiyosi puluta eisimataisi pilayu wala. 13 Anikoli am mokusisikaisi, baisa wala Setani la takaikaiam isisu. Yokomi goli lokukimadagaisi baisa yeigu, e tuta makwaina Anitipasa agu tosola toduwosisia eikatumataisi oluwalaimi ola valu Setani, tuta matutona yokomi gala kuligaimwaisi mi dubumi goli. 14 Mesinaku baisa mimilisi vavagi laiyosi paila yokomi. Oluwalaimi mimilisi eibokulaisi la vituloki Balam. Paila matauna eivituloki Balaki ammakawala bivakapusii mina Isireli; ivituloki goli mwada ibodi bikomasi kaula tomota leisemakavaisi baisa si tokolu, e deli ivituloki mwada ibodi bikailasisi. + 15 E makawala goli mimilisi yokomi ibokulaisi si vituloki kala tobwakuli Nikoleiyo.n 16 Kuninavilasi metoya omi mitugaga. Kidamwa gala, makateki bawokaiami e bawaiya matausina deli makaina puluta isusunapula owodogu.
17 “Availa ilagi ibodi biligimlili avaka Baloma iluluki mabudosina ekalesia. +
“Baisa availa availa bitomgwagasi basaiki sita kaula kwekatupwana makwaina yagala mana. E tuvaila goli basaiki taitala taitala kwepupwakau dakuna deli yegila igavau bogwa eiginisi opapala, baisa gala availa binikoli maigana mesinaku wala matauna ikokeula kala dakuna binikoli maigana.
Kasi biga toekalesia mapilana Taiatira
18 “Kugini baisa ekalesia si anelosi mapilana Taiatira.
“Biga mabigasina metoya baisa Latula Yaubada, matauna matala ikavikavila makawala kova ilululu e kaikela makawala barasi kala waikisi ivivivila. 19 Anikoli wala avaka kuuvagaisi. Anikoli mi yebwaili mi tagwala, mi wotetila deli mi peuloki. Anikoli mi wotetila bogwa isiniveka, gala makawala lokuvigakaisi omitibogwa. 20 Mesinaku wala baisa aiyosi paila yokomi, paila lokutagwalasi minanao Yesebelap bisisu, minana goli idoki titoulela Yaubada la nawotetila. Paila minana iuvituloki agu towotetila e imnabi mwada bikailasisi deli bikomasi kaula tomota leisemakavaisi baisa si tokolu. + 21 Bogwa laluvituti minana paila bininavila metoya ola mitugaga, mitaga gala wala magila bininavila metoya ola kailasi. 22 Mapaila balavi minana okabala, e baisa bibodi kala mmayuyu kwaiveka. E matausina deli leikikailasisi tuvaila bibodaisi kasi mmayuyu sainela. E bavigaki baisa tuta goli, kidamwa gala binanakwasi bininavilasi metoya makwaisina mitugaga leivagaisi deli minana. 23 E tuvaila kala tobwakuli bakatumati e mapaila komwaidosi mabudosina ekalesia binikolaigusi wala kidamwa yeigu akakateta tomota avaka ninasi deli avaka magisi. Ka, yeigu bamapuvigasi taitala taitala yokomi makawala avaka bogwa lokuvagaisi. +
24 “Mitaga yokomi kesala mina Taiatira gala lokubokulaisi makwaina vituloki kwemigaga;q e gala lokunainevisi baisa avaka mimilisi idokaisi Setani la vavagi kwekikium. Alivala baisa yokomi gala kwaitala tuvaila koni mwau basakaimi. 25 Mitaga yokomi bukuyosikikitaisi avaka lokuiyosisi igau wala bawa. 26 Baisa availa availa bitomgwagasi e bisaitaulasi bivagaisi nanogu igau tuta kala vigimkovila, yeigu bakasali si karaiwaga makawala Tamagu leikasali ulo karaiwaga. Mapaila bikaraiwogaisi mina watanawa, + 27 e bikaraiwagasi makawala giyougaga oyumasi gai kaipuwopuwa, e bikatumimisaisi makawala kulia senisenila pilakikekita. 28 E tuvaila basaiki matausina minana utuyam yagala Kubwanayam.r
29 “Availa ilagi ibodi biligimlili avaka Baloma iluluki makwaisina ekalesia.
i 2:6 Mabudona eitapwarorusi baisa tokolu deli ibububunasi doudoga (kugisi mailela 15); e kaina mailela 14,20,24 tuvaila ililivalasi paila mabudona. + 2:7 Vit 2.9; Isi 28.13; 31.8; YG 22.2 + 2:8 Ais 44.6; 48.12; YG 1.17; 22.13 j 2:9 Mitaga mabudona gala wala Yaubada la tomota. k 2:10 Ikibuboti tuta pikekita. Tuvaila mina Yudia mimilisi tuta binagaisi kweluwotala yam paila tuta wakola kala kaduwonaku (kugisi Vit 24.55; Baw 11.19; Dan 1.14). l 2:10 Kugisi Ym 1.12 kala katumiki. + 2:11 YG 20.14; 21.8 m 2:13 Mapilana Pegam (kugisi mailela 12) idokaisi Setani la takaikaia paila uula bidubadu mina Pegam eivigakaisi si yaubada matauna si giyouveka mina Roum e itapwarorusi baisa matauna. Mauula Yoni ikamogi mapilana paila Tomitugaga iguguyoi baisa. + 2:14 Baw 22.5,7; 25.1-3; 31.16; Kak 23.4 n 2:15 Kugisi mailela 6. + 2:17 Sun 16.14-15,33-34; Ais 62.2; 65.15; Yn 6.48-50 o 2:20 lokutagwalasi minana: Mimilisi buki pilabubogwa iginisi, “minana m kwava”. p 2:20 Natana vivila kaina navitoubobuta, e maigana ikibuboti la bubunela makawala minana omitibogwa guyau Eyabi la kwava namitugaga. + 2:20 1 Gwe 16.31; 2 Gwe 9.22,30 + 2:23 Sam 7.9; 62.12; Yer 17.10 q 2:24 Vituloki kwekikium paila mabudona la boda Nikoleiyo. + 2:26 Sam 2.8-9 r 2:28 Minana ikibuboti Keriso (kugisi YG 22.16).
☰