19
येसुलाई सैःन्या याथ·रैव
(मत्ती २७:१५-३१; मर्कूस १५:६-२०; लूका २३:१३-२५)
1 नाःत ज़ पिलातसए येसुलाई रीःन्याए जूँनी सिपाईंरालाई यासूँपिक्यो।
2 सिपाईंराए ज़ुए मुकुत ऱ॰द ओङ़ैत जास्द घ्यामर्यासो क्वा जास्द,
3 ओङ़ाक बाद बरे·द, “यहूदीराए याराजा, जय जय ओताक,” है ल्यो जैसिउ य़ेन ओङाःत लफरैदिकेर।
4 पिलातस फरी तखेप लाँःदा पुलुस्द नो माहोल्यारालाई, “दे आवलाई जेलाई ज़ रैद ङायाचिज़्या। ङा ङाल्योनी ते आवए ओक्याँत काता खत ज़ ङामादैए, जे ज़ सैंचिके,” है ओरादोव प़ाइँना,
5 येसु ओल ज़ नो ज़ुए मुकुत जासिसिउ, घ्यामो क्वार क्वाइसिसिउ याङ़ाक पुलुस्के। हाःत ज़ पिलातसए, “चिऊचिके, आव ज़ जेरैव मिँ,” है यादोक्यो।
6 हाःत ज़ नक लिज़्याव मुख्या पुजारीर स़ोनो पाल्यार येसुलाई यारँःव प़ाइँना ज़ बनै चोइस क़िद, “क्रुसत तङ्गैद सैःन्या!” है यादोक ते, पिलातसए, “हो ची ताकिन्दा जे ज़ लाँद क्रुसत तङ्गैचिके। ङा ते आवए ओखत काता ज़ ङामादैए,” है ओरादोक ते,
7 यहूदीराए, “आव मिँ ओलनी ज़ परमेस्वरए ओज़ा ओजैसिउनी गे यहूदीराए गेकानुननी सिन्या सजा दैव ज़ परिए,” है दोकेर।
8 पिलातस इताव पाँ थैद झन ज़ छे·द,
9 येसुलाई महलल लाँद फरी ब, “नँ काताङाव नताव?” है ओदोक ते, येसुए झन ज़ घाइ ज़ मादोक्यो।
10 पिलातसए फरी, “ङालाई काराव घाइ नमादाँज़्याव? नँलाई तङ्गैन्या तादी ब ऱास्न्या तादी ब ङा ङाकुइत उलिज़्याव नमासैंए रो?” है ओदोक ते,
11 येसुए, “परमेस्वरए नँलाई ओमाईंव ताकिन ङा ङाक्याँत नहक काता ज़ मालिखेहो। है जैद ङालाई क्योःद नँलाई याज़्यावर नँकिन घ्योःव पापल ज़ परिकेर,” है दोक्यो।
12 पिलातसए निताव ओपाँ थैद येसुलाई ऱास्न्या बनै धामा दोक्यो। हितावत ब यहूदीर झन ज़ क़िद, “आव मिँलाई नऱास्किन नँ माहाराजाए ओनैं ज़ माःक। यानी राजा जैसिज़्याव भरी माहाराजाकिन तँदाङावर ज़ ताज़्यार सानी,”
13 है यालिज़्याव थैद पिलातसए येसुलाई लाँःक रैद हिब्रू खामनी गब्बथा यादोज़्याव लुँ छापिसिउ चतराक लाँद ओल फाल्न्या पोल च़ुसिके।
14 नो छ्याम निस्तार पर्बए ओङ़ालाव तयारीलाव दिन लाकाव बाह्र बजेवाक ओल्यो। पिलातसए यहूदीरालाई, “चिऊचिके, आव ज़ जेराजा,” है ओरादोक ते,
15 नोराए झन, “आवलाई नैन्या माःक, क्रुसत तङ्गैद सैःन्या ची,” है लिद क़िकेर। पिलातसए फरी, “काराव जे जेराजालाई क्रुसत तङ्गैद सैःन्या है जेदाँज़्याव?” है ओरादोक ते, मुख्या पुजारीराए, “गेराजा रोमी माहाराजाकिन सु ज़ माले,” है यालिज़्याव
16 थैद पिलातसए येसुलाई क्रुसत तङ्गैद सैःन्याए जूँनी यहूदीरालाई ज़ याभीःक्यो।
येसुलाई क्रुसत यातङ्गैव
(मत्ती २७:३२-४४; मर्कूस १५:२१-३२; लूका २३:३२-४३)
सिपाईंराए येसुलाई यापासल रैद,
17 नोराए येसुलाई उक्रुस ओललाई ज़ सुघुर्द गलगथा यादोज़्याव पोक लाँकेर। हिब्रू खामनी गलगथाए ओअर्थ ‘खप्पर्या पो’ ज़।
18 नक नोराए येसुलाई क्रुसत तङ्गैकेर। हो छ्याम ओलस छुत ऩेब्लोनिलाई मनी ओलस ज़ यारातङ्गैकेर। येसुलाई खार्ल जैद तोबोलाई ओवोर्दा, तोबोलाई ओदाबर्यादा जैद सु सु याक्रुसत यारातङ्गैकेर।
19 पिलातसए फरी फल्यात तोबो सर्द,
“आव नासरतलाव येसु, यहूदीराए याराजा ज़”
लिद येसुए उक्रुसत चदिक्यो।
20 नो सर्सिउ हिब्रू, ल्यातिन स़ोनो ग्रीक खामनी ब उलिज़्याव। येसु क्रुसत तङ्गैसिउ पो सहर छ्योक ओतावए यहूदीराए कुधुए ज़ रँःद,
21 यहूदीराए मुख्या पुजारीर पिलातसए ल्योक बाद, “नताव नसरो ‘आव यहूदीराए याराजा ज़’ है लिद सर्न्या माःक, बुरू ओल ज़, ‘ङा यहूदीराए याराजा ज़ है ओल्यो,’ सर्न्या ची,” है यादोक ते,
22 पिलातसए, “ताधुके, जो मिताव तादी ब ङासर्धुके,” है यादोक्यो।
23 नकिन येसुलाई तङ्गैद सैःज़्याव सिपाईंराए येसुए ओक्वार चार भा जैद सु सु याजुँ लाँकेर। ओतर्ताव ओक्वाइसिज़्याव ओक्वा ते तपाता ज़ काङ्क ज़ माऱूप्सिउ ओल्योए,
24 “आवलाई चीन्या माःक, जोए ओल्योदा ओबादी ब गोला झाःव ताके,” है लिकेर। नो पाँत ज़ धर्मसास्त्रलाव पाँ ब यो·के। नो पाँ आव ज़,
“नोराए ङाक्वार भाःद लाँन्या लेर।
ओतर्ताव ङाक्वात गोला झाःन्या लेर।”
है जैद सिपाईंराए हैज़ जैकेर।
25 हो बेलाक क्रुसकिन जाँ होकसैक येसुए ओआमा, ओआमाए ओबैंनी, क्लोपासए ओज्या मरियम स़ोनो मरियम मग्दलिनीर च्याँःसिद यालिज़्याव।
26 येसुए ओआमा स़ोनो उयुँलाव उसिसनी नक च्याँःसिद निलिज़्याव रँःद ओआमालाई, “आमा, नज़ा आव ज़,” है दोक्यो।
27 नकिन फरी उसिसलाई, “चिऊके, आव नआमा ज़,” है दोक्यो। है जैद हो छ्यामकिन ज़ नो उसिसए येसुए ओआमालाई उझ़िमक लाँद ओलस ज़ नैक्यो।
येसु उसिउ
(मत्ती २७:४५-५६; मर्कूस १५:३३-४१; लूका २३:४४-४९)
28 हाःत ज़ येसुए, ‘अब ते ङाय़ेन भरी यो·के’ लिन्या सैंद धर्मसास्त्रलाव पाँ सयो·न्याए जूँनी, “ऱी ङाछोस्ज़्या,” है यादोक्यो।
29 हाः बेलाक नक तोबो जाल सिरो दाखमद्य झाःद यानैज़्याव। नक लिज़्यावराए भाताए उतुपात थाकना पो·द नो सिरो ऱील छिम्द ओयाःत पिउ परींकेर।
30 येसुए नो पिद, “अब ते ङाय़ेन भरी दुम्के,” है लिद ओङ़ै घोम जैद उस॰ सफ्या·क्यो।
31 हो छ्याम तयारीलाव दिन ओल्यो, स़ोनो घेप्पा पर्बए ओङ़ालाव छ्याम ब उलिज़्याव। यहूदीराए याकानुननी हो छ्याम नो यारासैःवरालाई क्रुसत नैन्या ओमाताज़्याव। है जैद नोराए नो क्रुसत तङ्गैसिउरालाई यास॰ सफ्या·द्यान्याए जूँनी ‘याखँर केःद्याद क्रुसतिन झरैव ताके’ है लिद पिलातसलाई बिन्ती दाद,
32 येसुए ओवोर्दाङाव मिँलाई उखँर केःदिकेर। नकिन ओदाबर्यादाङावलाई मनी उखँर केःदिकेर।
33 नकिन येसुए उखँर केःना याबाक उसिधुव रँःद उखँर केःद माएकेर।
34 हाःत ज़ नक लिज़्याव तोबो सिपाईंए ओज़लए येसुए ओकोखाल घोइदिक्यो। ओघोइव प़ाइँना ओकोखानी झी स़ोनो ऱी हुके।
35 आव पाँ भरी तोबो मिँए ओल ज़ उरँःव। नोए ओपाँ साचो थ॰रिउ ज़ लिज़्या। है जैद आव पाँत जेयुँ उहुप्क।
36 आव पाँ भरी धर्मसास्त्रलाव पाँ सयो·न्याए जूँनी ज़ ताके। नलाव सर्सिउ आव ज़,
“नोलाई तके उऱूस ब केःद्यान्या मालेर।”
37 फरी तोथोल इताव मनी सर्सिउ लिज़्या,
“नो ज़लए याघोइवलाई प़ाइँए ज़ रँःन्या लेर।”
येसुए ओमोरो खादरल याझाःव
(मत्ती २७:५७-६१; मर्कूस १५:४२-४७; लूका २३:५०-५६)
38 आव भरी ओतावत अरिमाथियालाव योसेफ पिलातसए ल्योक बाद येसुए ओमोरो ऩिक्यो। नो मिँ मनी येसुए ओपाँत बाज़्याव मिँ ज़ ओल्यो। खाली नोए यहूदीराए यास़ेरराए छ्याचेए येसुए ओपाँ जाँ म़ोंसिद ओदोज़्याव। नोए पिलातसए ल्योनी हक रैद येसुए ओमोरो लाँक्यो।
39 नो ङ़ादा रील म़ोंसिद येसुए ल्योक हुज़्याव निकोदेमस मनी योसेफस उलिज़्याव। नोए बनै चाव सी ङरो जरार हे·सिउ बरे·द तुगुर ज़ घुर्द रैक्यो।
40 नोनी यहूदीराए याचलन मितावनी येसुए ओमोरोलाई नो उसी ङरो जरार झाःद क्वाए लुम्बैकिनी।
41 येसुलाई क्रुसत तङ्गैसिउ पोकिन जाँ होकसैक तोबो बगैचा उलिज़्याव। नो बगैचाल सुलाई ज़ यामाझाःताव साःरो खादर तोबो उलिज़्याव।
42 है जैद यहूदीराए तयारीलाव दिन ओतावए, नो नजिककाव लिज़्याव खादरल ज़ येसुए ओमोरोलाई झाःकिनी।