20
येसु सिउनी सैंसिद ओबाव
(मत्ती २८:१-८; मर्कूस १६:१-८; लूका २४:१-१२)
1 सातालाव उस॰कताव छ्याम छकाल्न्या ओमासँद ज़ मरियम मग्दलिनी बनै घग ज़ येसुए ओखादरक ओबाक नो खादर याःताव कसिउ घ्योःव लुँ हाइसिउ रँःक्यो।
2 निताव रँःद ननी धोंःनाद सिमोन पत्रुस स़ोनो येसुए उयुँलाव उसिसनी निल्योक बाद, “गेप्रभुलाई ते काताकावराए खादरनी हाइद यालाँव ओल्यो। काना यालाँव गेमासैंए,” है उनिदोव प़ाइँना,
3 पत्रुस स़ोनो येसुए छुत उसिसनी हतप्त ज़ खादर पोदा धोंःनाकिनी।
4 निधोंःनाज़्याक पत्रुसलाई बलेंद ओनैं ङ़ादा खादरक केस्के।
5 नो खादरल मापसिद घोम लिद उचिऊक येसुलाई लुम्बैसिउ क्वार वाज़ रँःक्यो।
6 नकिन छ्यावाक सिमोन पत्रुस मनी खादरक ओकेस्हुव प़ाइँना ज़ खादरल पसिद उचिऊक होए मनी येसुए ओमोरो लुम्बैसिउ क्वार वाज़ रँःक्यो।
7 नो ओङ़ैताव पो·सिउ क्वालाई फरी नो ओमोरो लुम्बैसिउ क्वाकिन जाँ अछतङ पतैद नैसिउ रँःक्यो।
8 हाःत ज़ नो ङ़ादा हुव येसुए छुत उसिस मनी खादरल पसिद प़ाइँ चिऊद येसु ओसोव ज़ ओल्यो लिद उयुँ हुप्के।
9 नोनी नोकिन ङ़ादा नो धर्मसास्त्रलाव सर्सिउ पाँ ‘येसु उसिदी ब सोन्या ले’ लिन्या निमाथ·रैताव।
10 नकिन नो उसिसनी निझ़िमदा ओल्द बाकिनी।
येसु मरियम मग्दलिनीए ओङ़ाक ओसरैंःसिउ
(मत्ती २८:९-१०; मर्कूस १६:९-११)
11 मरियम मग्दलिनी ते खादर छ्योक च्याँःसिद घरो ज़ उलिज़्याव। नाःत ज़ घोम लिद खादरल तखेप ओभाल्सिक,
12 परमेस्वरए ओचाकर्यानी ऩेब्लो पाल पालो क्वा क्वाइसिउनी निरँःक्यो। नोनी येसुलाई नैसिउ पोक तोबो उगुमदा, तोबो उखँदा च़ुसिद निलिज़्याव।
13 नोनी मरियमलाई, “अ माँ, नँ काराव नघर्ज़्याव?” है निदोक ते, नोए, “ङाप्रभुलाई काताकावराए आव खादरनी हाइद यालाँव ओल्यो। काना यालाँव ओताव ङामासैंए,” है निदोक्यो।
14 नाः है दाद नो मेंमा उछींदा ओभाल्सिक येसु नक च्याँःसिद उलिज़्याव रँःक्यो। खाली येसु ज़ लिन्या मासरेस्धुक्यो।
15 हाःत ज़ येसुए, “अ माँ, नँ काराव नघर्ज़्याव, सुलाई नखिम्ज़्याव?” है ओदोक ते, नो मेंमाए, आव ते बगैचालाव माली ची सा लिद, “अ दाज्यु, येसुलाई नँ आनी हाइद नलाँव ताकिन, ‘आक ङानैज़्या’ है दाव ताके। ङा होलाई ङालाँरिज़्या,” है ओदोक ते,
16 येसुए, “अ मरियम,” है ओदोव प़ाइँना नो मेंमा ओल्योदा फर्किद, “रब्बोनी!” है दोक्यो। (हिब्रू खामनी रब्बोनीए ओअर्थ ‘गुर्बा’।)
17 हाःत ज़ येसुए, “ङालाई ताछाप्नायो, ङा आःपै ङाबाबुए ल्योक ङामाबाताए। बुरू ङानैंरालाई, ‘ङाबाबु परमेस्वर स़ोनो जेबाबु परमेस्वरए ल्योदा ङाबारिज़्या’ है यादोनाके,” है दोक्यो।
18 हो प़ाइँना ज़ मरियम मग्दलिनी उसिसराए ल्योदा धोंःनाद प्रभुलाई उरँःव स़ोनो है ओदोव पाँ भरी ब है यादोक्यो।
येसु उसिसराए याङ़ाक ओसरैंःसिउ
(मत्ती २८:१६-२०; मर्कूस १६:१४-१८; लूका २४:३६-४९)
19 हो छ्याम ऱिमक ज़ येसुए उसिसर यहूदीराए छ्याचेए य़ाम गल्द झ़िमल यालिज़्याव। नो छ्याम आइतबार ओल्यो। नाःत ज़ येसु उमँःजानी उसिसराए खार्ल च्याँःसिहुद, “जेयुँर होलाँ ओताक,” है लिद,
20 येसुए उकुइर ओकोखार सतैंद याएक्यो। याप्रभुलाई रँःद नोर यायुँर होलाँ ताद बनै रेंकेर।
21 येसुए फरी ब, “जेयुँर होलाँ ओताक। किताव ङाबाबुए ङालाई उपरींनाव, हिताव ज़ जेलाई मनी ङापरींचिज़्या,” है दाद,
22 नोराए ल्योदा उस॰ ह्वास जैद, “आख ते छैंव पुरूस दोचिके,” है यादोक्यो।
23 नकिन फरी, “जे मिँरालाई यापाप क्याल्द जेराएकिन, नोराए यापाप क्याल्सिद परमेस्वरस खैवर तान्या लेर। फरी यापाप क्याल्द जेमाराएकिन नोराए यापाप हिताव ज़ रहिरिज़्या।”
थोमाए येसुलाई ओसरेसो
24 येसु उसिसराए ल्योक उहुव छ्याम दिदुमस यादोज़्याव थोमा नल ओमाल्यो।
25 छींनी उपुर्काव उसिसराए थोमालाई, “गे गेप्रभुलाई गेरँःके,” है यादोक ते, नोए, “ङा झँ किलाए उकुइ सघ्वाँःसिउ कुँ रँःद होल ङाआङुला ङामालुइवा पै स़ोनो ओकोखाल ङाकुइ ङामालुइवा पै ङायुँ ज़ माहुबे,” है यादोक्यो।
26 हुकिनकाव साताक फरी उसिस भरी य़ाम गल्सिद झ़िमल यालिज़्याव। हो छ्याम ते थोमा ब यास ज़ उलिज़्याव। हाःत ज़ निताव य़ाम गल्सिउ उलिज़्यावत ब येसु उमँःजानी याखार्ल च्याँःसिहुद, “जेयुँ होलाँ ओताक,” है यादोक्यो।
27 नकिन थोमालाई, “आव ङाकुइ सघ्वाँःसिउल नआङुला लुइके, ङाकोखाल ब नकुइ लुइद माहुबो नयुँलाई सुहुप्के,” है ओदोव प़ाइँना,
28 थोमाए, “अ ङाप्रभु, ङापरमेस्वर, नँ ज़ ची नल्यो,” है लिके।
29 हाःत ज़ येसुए, “थोमा, नँ ते ङालाई रँःद नयुँ हुप्के। खाली ङालाई मारँःद उयुँ हुप्ज़्याव ते झन धन्याकाव लिज़्या,” है दोक्यो।
आलाव सर्सिउ जेयुँ सुहुप्द्यान्याए जूँनी ज़
30 येसुए उसिसराए याङ़ाक आव पोस्तोकोल मासर्सिउ छुत सरेसर मनी कुधु ज़ सतैंद याएक्यो।
31 खाली आलाव सर्सिउ भरी जे येसुलाई, परमेस्वरए ओज़ा गेलाई बाँचैज़्याव ख्रीस ज़ लिद जेयुँ सुहुप्द्यान्याए जूँनी सर्द ङायाचिके। हो ताकिन ची जे नोए ल्योदा जेयुँ जेसुहुप्किन होए उमिननी अजम्बरी जुनी दैन्या जेले।