11
Ŋic fekicne hehesic‐jekicte bârâriec‐jofakicne
1 Mârozi baafecnuhuc Wofuŋ ufuŋ‐ticnere motâc ʒoaŋ wewefunaopec fowec ira jowa qataŋ enareme rapo. Ra fisirâ mi motâc raraʒio ŋic 25 domahapie honec‐jopazepac i! Ehuc jaŋere ŋondeŋko fekicne jahec‐jeŋic Aʒurure ŋokâ Jaʒania â Benajare ŋokâ Pelatia jahe honec‐jofapo.
2 Eme Wofuŋzi ʒiŋuc nazawec: “Ŋicte ɋâric, ŋic keci jahe hâcne hae ʒira dâŋ wiac hehesicne â qacne gâpâcne manasu biric eekopirec.
3 Ehuc ʒiŋuc muekopirec: ‘Fic hae bapare dameŋ biac mi maickekac, hae ʒizi kuʒi enâreha nâŋe ine qowi eŋgopeneŋ.’
4 Irec ŋicte ɋâric, go râsi ejactehuc findaŋdâŋ‐jekic muzemec.”
5 Eme Wofuŋte Mârozi norao waharâ ʒiŋuc nazawec: “Go jazac, Wofuŋzi ʒiŋuc mukac: O Israe kikefuŋ, ŋoŋe iŋuc hâcne manasueŋgopieŋ â maŋŋeŋicko dâŋ fuarâ fokac i wâc manakopac.
6 Ŋoŋe hae ʒira ŋic bocjaha qâhâmoc‐joparâ behec‐jopapie qâŋɋâŋzi hae ʒoŋa‐ticne fusucmarâ fokac.
7 Irec hâcne Wofuŋ Anutu no ʒiŋuc mukopac: Ŋoŋe ŋic qâhâmoc‐joparâ hae ʒâʒâŋiŋko behec‐jopambiŋ jaŋe hâcne qowi ehapie hae ʒizi kuʒi ekac, ŋoŋe ine hae ʒirecnec bacŋopa razo.
8 Ŋoŋe ʒikare hâwic‐ŋopaekac, no ine sifu ʒikare micko râec‐ŋopapemu, Wofuŋ Anutu no iŋuc mukopac.
9 No hae ʒirecnec rocŋoparâ ŋic furune jaŋere meo râec‐ŋopahuc okacne bazu‐ŋarepemu.
10 Ŋoŋe ʒikare nânâ ehapie Israe mâreŋ qaŋeŋnao bâbâtiŋko râec‐ŋopape, no Wofuŋ jukopac, i mana taranʒepieŋ.
11 Hae ʒizi kuʒi‐ŋeŋic mi eocmu â ŋoŋe wâc qowifâc‐ticne mi eniŋmu. No Israe mâreŋ qaŋeŋnao bâtiŋ‐ŋopapemu hâcne.
12 Eme no Wofuŋ jukopac i mana taranʒepieŋ. Ŋoŋe sâcmutâc dâŋnanere sâcko mi jumbiŋ â mumutâc dâŋnane mana rereŋ mi embiŋ, aricne, ŋoŋe ŋicne ŋicne rârec‐ŋopahuc jueŋgopieŋ jaŋere mumutâc dâŋte sâcko wiac ebac embiŋ hâcne.”
13 Eme no findaŋdâŋ muhuc domahape Benajare ŋokâ Pelatia e rândiŋke qarâ hâmowec. Iŋuc fuame no mâreŋko hetutuckerâ kâcɋene wirahuc ʒiŋuc mupo: “O Wofuŋ Anutu, go Israe ŋic nâfocne jaŋe wâc omae‐fâreniŋte mukomec me?”
Wofuŋzi Israe ŋic Mâro tahac‐jopaocmu
14 Eme Wofuŋte dâŋ kecʒiŋuc fua‐narewec:
15 “O ŋicte ɋâric, qomâfâcge gohec kâpâcwâruo mâmâc juŋgopieŋ Israere kikefuŋ sasawa hâcne ŋoŋere dâŋ i Jerusalem haere ŋecjucfâc jaŋe ʒiŋuc mumbiŋ: ‘Jaŋe Wofuŋ beherâ taicko juŋgopieŋ, irec mâreŋ ʒi nâŋe ro rauc enaŋte nârekicne!’
16 Irec jazac, ‘Wofuŋ Anutuzi ʒiŋuc mukac: No ŋicne ŋicne jaŋere ŋondeŋko guruc‐joparâ mâreŋne mâreŋne bâtâtiec‐jopahape jaŋe sifu mâreŋ ra jumbiŋ ira dameŋ gâcnao nore manapie ŋeŋezic‐jeŋic jukopac jaha ewec.’
17 Irec jazac, ‘Wofuŋzi ʒiŋuc mukac: No ŋic jaŋere ŋondeŋkonec qâzuc‐ŋoparâ mâreŋne mâreŋne bâtâtiec‐ŋopakicnaonec henusuc‐ŋoparâ Israe mâreŋ‐ŋeŋic ŋarepe mocwâc rauckeniŋmu.’
18 Eme jaŋe ira fisirâ wiac mamakâcne â hehesicne i bârârie‐fâreniŋmu.
19 No buhândâŋ ɋâricne jarepemu â Mâro ɋâricne maŋjeŋicko râepe huocmu. Maŋjeŋicko busezi buhâdâŋ fokac i ro bârâriec ehuc biuczi buhândâŋ moc râe‐jarepemu.
20 Ehame jaŋe sâcmutâc‐naneo ninipenʒepieŋ â mumupaŋ‐nane reŋkenʒepieŋ, ehuc jaŋe ŋicfâc‐nane juhapie no Anutu‐jeŋic erâ jupemu.
21 Maŋjeŋic nemuɋâŋko â wiac mamakâcnao râepie foocmu ine eebapa‐jeŋicte okacne bazu‐jarepemu, Wofuŋ Anutu nore dâŋ iŋuc.”
22 Dâŋ iŋuc mutarame kerubim jaŋe fafakec‐jeŋic heratierâ rapie ʒafeŋgâŋ jaŋe mâmâc rambiŋ, ehame Israere Anutu ere huriri qâreŋzi faic‐jeŋicko jaha domawec.
23 Erâ Wofuŋte huriri qâreŋ i haemaŋkonec wefurâ tiki haere ʒoaŋ wewefunao ŋewec ira fe domawec.
24 Ehame manape Mârozi baafecnuhuc enareme kâpâcwâru ŋic Kaldea mâreŋko jumbiŋ jaŋerao rapo tinac ewec erâ wiac hone manac epo i omaewec.
25 Eme Wofuŋzi wiac naza nowatuc ewec i sasawa kâpâcwâru ŋic jaza‐fârepo.