12
Kâpâcwâruo bacjopa raniŋmu irec sâsâc ewec
1 Wofuŋte dâŋ ʒuhuckerâ ʒiŋuc fua‐narewec:
2 “Ŋicte ɋâric, go ŋicguru qaqatarahec jaŋere ŋondeŋko jukomec, jaŋe ʒâŋe fojare‐bipieha sifu mi honeeŋgopieŋ â hazec fojare‐bipieha sifu mi manaeŋgopieŋ.
3 Jaŋe ŋicguru qaqatarahec hâcne. Ŋicte ɋâric, go irec hâcne ʒoaŋko honecguhapie kâpâcwâruo huhure he wiacge bâmockerâ hata fuŋkezemec. Go kâpâcwâru ŋic iŋucne haege beherâ mocko rahaŋtec jaŋe ŋicguru qaqataraheczi sifu mana taraniŋmu mecne.
4 Kâpâcwâruo rarare mafa wiac bâmockekicne i ʒoaŋkoa honecguhapie jaha bawahazemec, erâ hae owâeme honecguhapie jaha kâpâcwâru ŋic iŋucne hae beherâ razemec.
5 Ehuc honecguhapie qânâsac âke mârâŋkerâ hawec fuame ira fotâcnerâ huzemec.
6 Erâ honecguhapie jaha mafa wiacge hâporâ dapâcko razemec. Ehuc ʒâŋege bâsoŋkerâ hae mâreŋ mi honezemec; gorao wiac fuakac izi Israe kikefuŋ jaŋerao fuaocmu irec sâsâcne ekac.”
7 Eme no wiac mutâcne‐narekicne sâc efârepo. No kâpâcwâruo rarare mafa wiac‐nane ʒoaŋkoa bawahapo, erâ hae owâeme no nahacne mezi qânâsac bâmârâŋkepo. Ehuc jaŋe honecnuhapie mafa wiac‐nane hâporâ dapâcko raʒipo.
8 Hae fureme Wofuŋte dâŋ norao kecʒiŋuc fuawec:
9 “Ŋicte ɋâric, Israe kikefuŋ qaqatarahec jaŋe go ʒiŋuc mi wio‐garembiŋ me: ‘Go wemo wiac ekomec?’
10 Irec jazac, ‘Wofuŋ Anutuzi kecʒiŋuc mukac: Wiac ʒi fuakac i Jerusalem haere ŋic fekicne ere mecne, erâ Israe kikefuŋ hae maŋnao juŋgopieŋ jaŋere biŋe mâmâc ekac.’
11 Erâ jazac, ‘Norao wiac fuajec izi ŋoŋerao fuaocmu irec sâsâcne ekac. No wiac fua‐narejec iŋucnea ŋoŋerao fuazejec, ŋoŋe kâpâcwâruo bacŋopa raniŋmu hâcne.’
12 Eme ŋic fekicne ŋondeŋ‐ŋeŋicko jukac e mafa wiac‐ticne hâporâ dapâcko razejec; e qânâsac bâmârâŋkerâ ira fotâcnerâ raʒizejec, ehuc ʒâŋe mai‐ticne bâsoŋkerâ mâreŋ moc mi honezejec.
13 Ehame no wiwitic‐nane hepe ira raʒime rozejec; eme Kaldea ŋic jaŋere mâreŋko Babe haeo barâ rapemu, eki ine mâreŋ i mi hohone juku ira hâmozejec.
14 Eme babaficfâc‐ticne â momorifâc‐ticne ehec jueŋgopieŋ jaŋe bâtâtiec‐jopape mâreŋ faic â juwic erâ ŋifec â ŋifec rafârenʒepieŋ; ehuc mupe ʒikazi bâjâpec‐jopazejec.
15 No ŋicne ŋicne jaŋere ŋondeŋko â mâreŋne mâreŋne ira bâtâtiec‐jopape ra juhuc, no hâcne Wofuŋ jukopac i mana taranʒepieŋ.
16 No ine ŋic gâcne akic‐jopape ʒika â roroc erâ huc mimicne wise‐jareniŋmu, ehuc eebapa‐jeŋic mamakâcnere fuŋne i mâreŋ raniŋmu sâc ŋicne ŋicne jaŋerao mufuanʒepieŋ erâ, no Wofuŋ jukopac i mana taranʒepieŋ.”
17 Eme Wofuŋte dâŋ i norao harierâ ʒiŋuc fuawec:
18 “Ŋicte ɋâric, go fâfâre hehejac ehuc hâwicguha nânâ opâge nâzemec.
19 Ehuc ŋic omane jazazemec, Wofuŋ Anutu e Jerusalem ŋecjucfâc‐ticne â Israe mâreŋ irec ʒiŋuc mukac: Jaŋe juju‐jeŋic hehesicnere erâ mâreŋ‐jeŋic ima samaki bafârepe maŋhâhâŋ faio juhuc hâwic‐jopaha nânâ opâ‐jeŋic nânʒepieŋ.
20 Erâ hae sâc ŋic juraŋgopieŋ jaŋe imac‐jopape omaehapie hae mâreŋ i tuhutac fuarâ niniŋ siarereŋ foocmu hâcne. Iŋuc fuame, no hâcne Wofuŋ jukopac i mana taranʒepieŋ.”
21 Eme Wofuŋte dâŋ norao ʒiŋuc fuawec:
22 “Ŋicte ɋâric, Israe ŋic jaŋere mu âke sisic dâŋ kecʒiŋuc wemocte fuaekac? ‘Dameŋ boc âke suekacte findaŋdâŋ mukicne i fârine mi fuakac.’
23 Irec ʒiŋuc jazac: ‘Wofuŋ Anutuzi kecʒiŋuc mukac: No mu âke sisic dâŋ i qatara‐jarepe Israe ŋic jaŋe mocwâc mi munʒepieŋ.’ Erâ wâc ʒiŋuc jazac: ‘Findaŋdâŋ mukicne i fârio qafâreocte dameŋne maickekac hâcne.
24 Irec Israe kikefuŋko findaŋdâŋ burecne mumu me Anuture micdâŋ kosa mumu i mocwâc mi fua‐jâmbâŋkeocmu.
25 Aricne, Wofuŋ no hâcne dâŋ i me i muzo murâ mupe fârio qaocmu. Mocwâc behepe mi foocmu, kikefuŋ qaqatarahec ŋoŋe juhapie jaha mupe fârinehec eocmu, Wofuŋ Anutu nore dâŋ iŋuc.’ ”
26 Eme Wofuŋte dâŋ norao mocwâc kecʒiŋuc fuawec:
27 “Ŋicte ɋâric, go manakic, Israe kikefuŋ jaŋe ʒiŋuc mueŋgopieŋ: ‘Porofetezi wiac hone manac eekac i juku jaha fârinehec eocmu â findaŋdâŋ muekac i ʒâhec dameŋte biŋe.’
28 Irec go jazac, Wofuŋ Anutuzi kecʒiŋuc mukac: ‘No dâŋnane i me i dameŋ ʒora mocwâc mi behepe foocmu, aricne, mupe izia fârinehec eocmu, Wofuŋ Anutu nore dâŋ iŋuc.’ ”