13
Porofete burecne jaŋere dâŋ
1 Eme Wofuŋte dâŋ norao kecʒiŋuc fuawec:
2 “Ŋicte ɋâric, go Israe ŋic porofetefâc‐jeŋic burecne jaŋere findaŋdâŋ muzemec, ehuc maŋjeŋicte porofete dâŋ kosa mueŋgopieŋ jaŋe ʒiŋuc jazazemec: ‘Ŋoŋe Wofuŋte dâŋ mananiŋ.’
3 Wofuŋ Anutuzi kecʒiŋuc mukac: Jei, porofete mutucne jaŋe jaŋacne maŋ mamanasu bâjâpehuc wiac hone manac moc mi eeŋgopieŋ.
4 O Israe ŋic, porofetefâc‐ŋeŋic jaŋe kâte qâtozi jawa ŋondeŋko jueŋgopieŋ jaŋere sâc.
5 Jaŋe Israe ŋiczi Wofuŋte ʒika dameŋko sanaŋkerâ domaniŋte qânâsacko hawec fuame ferâ mi hebâzickembiŋ.
6 Jaŋe Wofuŋzi mi sorec‐jopahame micko âkec ecnehuc ʒiŋuc mupie findaŋdâŋ â porofete dâŋjeŋic i burecne ewec: ‘Wofuŋzi mukac.’ Jaŋe iŋuc ehuc Wofuŋzi dâŋjeŋicte fârine bâfuaocte woŋec jumbiŋ.
7 No dâŋ moc mi muhape ʒiŋuc muhuc qoricnumbiŋ: ‘Wofuŋzi mukac.’ Ŋoŋe iŋuc erâ findaŋdâŋ wiac burecne hone manac ehuc nore micdâŋ kosa mi mufuambiŋ me?”
8 Irec hâcne Wofuŋ Anutuzi dâŋ kecʒiŋuc mukac: “Manaŋgopieŋ, ŋoŋe burec â eeatuc ehuc findaŋdâŋ mumbiŋte râsi eŋarekopac. Wofuŋ Anutu nore dâŋ iŋuc.
9 Porofete wiac burecne hone manac eeŋgopieŋ â findaŋdâŋ burecne mueŋgopieŋ jaŋe hâcne râsi ejarekopac; jaŋe ŋicfâc‐nane jaŋehec mi junʒepieŋ â ʒâŋe‐jeŋic i Israe kikefuŋte ʒâŋe birio râepie mi fozejec, erâ mâreŋ‐jeŋicko mocwâc mi risienʒepieŋ. Eme no hâcne Wofuŋ jukopac i mana taranʒepieŋ.
10 Jaŋe wama moc mi fohame ‘Wama fokac’ muhuc ŋicfâc‐nane eatuc‐jopapie qâsoriembiŋ â ŋic jaŋe qânâsac bahapie sahacne hâpezi burec burec ruacnembiŋte iŋuc ejarepemu.
11 Irec go ŋic gie i baŋgopieŋ jaŋe hâcne ʒiŋuc jazazemec: Qânâsac i rândiŋkeocmu. Hoe micsâkozi aisihec heocmu â mâŋâŋ ɋicwânʒâŋnehec qame qânâsac rândiŋkeocmu hâcne.
12 Rândiŋkeme ŋic jaŋe ʒiŋuc wio‐ŋareniŋmu: ‘Hâpe faine ruacnekicne i weni?’ ”
13 Irec Wofuŋ Anutuzi kecʒiŋuc mukac: “No kimbeŋ aaricko mupe mâŋâŋ ɋicwânʒâŋnehec qaha hoe micsâko aisihec hehuc sac sipirickeocmu.
14 Ŋoŋe sac hâpezi ruacnembiŋ i hetâtiepe mâreŋko waha qarâ fome hobeteŋ‐ticnezi kosa forazejec. Sac rândiŋkeha ŋoŋe mâmâc sipirickehuc, no hâcne Wofuŋ jukopac i mana taranʒepieŋ.
15 No iŋuc epe aaric‐nanezi fârinehec eha qânâsac mecne â ŋic hâpe ruacnembiŋ jaŋe mâmâc sipirickenʒepieŋ. Iŋuc fuame ʒiŋuc ŋazapemu: Qânâsac mecne â ŋic hâpezi ruacnembiŋ jaŋe mâmâc omae‐fârembiŋ.
16 Israe ŋic jaŋere porofetezi Jerusalem haere findaŋdâŋ mumbiŋ, erâ wama moc mi foha sifu ‘Wama fokac’ mumbiŋ jaŋe hâcne omae‐fârembiŋ, Wofuŋ Anutu nore dâŋ iŋuc.
17 “Ŋicte ɋâric, goki ine ŋicfâcge jaŋere ŋokacfâc maŋjeŋicte findaŋdâŋ mueŋgopieŋ jaŋe mu hanec ejarehuc findaŋdâŋ jaha jazazemec.
18 Ehuc ʒiŋuc muzemec: Wofuŋ Anutuzi kecʒiŋuc mukac: Jei, ŋokac ŋoŋe ŋic juju‐jeŋic sipirickeniŋte maŋguc‐ŋeŋicko qaŋgec wiac esorierâ rojueŋgopieŋ â irec ufic i ŋic sâcjeŋic honehuc ba akic erâ fârepie ira jowaeŋgopieŋ. Ŋoŋe ŋifec ŋicfâc‐nane jaŋere juju sipirickeniŋte mueŋgopieŋ â ŋifec ine ŋaŋacne jujure manasuhuc gâcne jaŋere juju ŋezickeniŋte mueŋgopieŋ me?
19 Ŋoŋe ŋicfâc‐nane jaŋere ŋondeŋko padi afecne â nânâ poroŋ dâkânere ro waha âte enarembiŋ, ehuc ŋic hâmocte biŋe mi ekicne jaŋe qâhâmoc‐jopambiŋ â jujure biŋe mi ekicne jaŋe ine akic‐jopambiŋ. Ŋicfâc‐nane burecdâŋte hazec râeŋgopieŋ jaŋe burec ejarehuc wiac iŋuc hâcne embiŋ.”
20 Wofuŋ Anutuzi kecʒiŋuc mukac: “Manaŋgopieŋ, ŋoŋe ŋic sipiric‐jopaniŋte qaŋgec wiac bajueŋgopieŋ i râsi ecnehuc meŋeŋickonec bârâriepemu, ehuc ŋic sipiric‐jopaeŋgopieŋ jaŋe wipe iŋucne rambaŋko râec‐jopape junʒepieŋ.
21 Ŋoŋe ŋic sipirickeniŋte ufic fâreeŋgopieŋ, ufic‐ŋeŋic i hâcne bâtâcnehuc ŋicfâc‐nane ŋoŋeraonec batarac‐jopape meŋeŋicko mocwâc mi fenʒepieŋ. Iŋuc eŋarepe, no Wofuŋ jukopac i mana taranʒepieŋ.
22 No ŋic tiŋne ejarepe hâbi gogoroŋ mi embiŋ; ŋoŋe ine maŋ wawaha dâŋ jazahuc ŋic hehesicne jaŋe hata‐jeŋic sâqocne beherâ juju bâfuaniŋte esoc qafeŋ mi ejarembiŋ.
23 Irec ŋoŋe maŋko fuac wiac i hone manac mocwâc mi enʒepieŋ â findaŋdâŋ burecne i wâc mi munʒepieŋ. No ŋicfâc‐nane meŋeŋickonec batarac‐jopapemu. Eme no hâcne Wofuŋ jukopac i mana taranʒepieŋ.”