14
Nemuɋâŋ araŋ babajare ŋic jaŋere dâŋ
1 Israe ŋic soŋaŋ gâcne jaŋe norao fisirâ mai‐naneo waha ŋembiŋ.
2 Ehame Wofuŋte dâŋ kecʒiŋuc fua‐narewec:
3 “O ŋicte ɋâric, ŋic ʒi jaŋe maŋjeŋic nemuɋâŋfâc‐jeŋic jaŋerao râepie foekac, ehuc wiac sâqocnezi eatuc‐jopame waha jopaekac i hâcne honebâckeeŋgopieŋ. Eme ŋic iŋucne jaŋe mu wioc enarepie no dâŋ okacne sâcne bâtikie‐jarepemu me?
4 Irec go ʒiŋuc muhuc jazazemec: Wofuŋ Anutuzi dâŋ kecʒiŋuc mukac: Israe kikefuŋ ŋoŋeraonec ŋic e me e moczi maŋticne nemuɋâŋfâc‐ticne jaŋerao râeme foekac me wiac sâqocnezi eatuckeme waha qaekac i hâcne honebâckehuc porofeterao raocmu e nemuɋâŋfâc‐ticne jucne‐bipiehapie Wofuŋ noni hâcne dâŋ okacne bâtikiecnepemu.
5 Iŋuc ecnepe ŋic nemuɋâŋfâc‐jeŋic jaŋerao qohotahuc no râpecnumbiŋ jaŋe fâfârerâ hemâtâc‐jopaocmu.
6 “Irec hâcne Israe kikefuŋ ʒiŋuc jazazemec: Wofuŋ Anutuzi kecʒiŋuc mukac: Ŋoŋe maŋŋeŋic bârisierâ nemuɋâŋfâc‐ŋeŋic behec‐jopanʒepieŋ, ehuc wiac mamakâcne bacjopa jueŋgopieŋ i râpec‐jopa‐fârenʒepieŋ.
7 Israe ŋic moczi me jaŋere ŋondeŋko ŋic furune jueŋgopieŋ jaŋeraonec moczi no râpecnurâ maŋticne nemuɋâŋfâc‐ticne jaŋerao râeme fohame me wiac sâqocnezi eatuckeme waha qaekac i hâcne honebâckehuc sifu no mu wioc enareocte porofeterao raocmu ine Wofuŋ no nahac hâcne okacne bâtikiecnepemu.
8 No ŋic e mu âke sisicte biŋe eocte râsi ecnehuc ŋic jaŋere ma âkendâŋnepe izi uŋsawaŋ‐jeŋic ezejec. Ehuc ŋicfâc‐nane jaŋeraonec bârâriepe, no hâcne Wofuŋ jukopac i mana taranʒepieŋ.
9 Eme porofete e ŋic jaŋere eatuc dâŋ manarâ okacne bâtikie‐jareocmu ine Wofuŋ noni eatuckepo tinac eocmu. Irec no râsi ecnehuc Israe ŋicfâc‐nane jaŋeraonec bârâriepemu.
10 Eme okacne i porofete â dâŋ mu wioc eekac ŋic i jahere biŋe mâmâc ezejec.
11 Iŋuc fuame Israe ŋic jaŋe mocwâc mi râpecnunʒepieŋ me qaqatara bâfuahuc maŋjeŋic mi hegâpârenʒepieŋ, aricne, jaŋe ŋicfâc‐nane juhapie no Anutu‐jeŋic erâ juzepac; Wofuŋ Anutu nore dâŋ iŋuc.”
12 Wofuŋte dâŋ norao kecʒiŋuc fuawec:
13 “Ŋicte ɋâric, manakic, mâreŋ moc irec rune jaŋe no qaisocnuhuc râpecnuniŋmu ine râsi ejarehuc nânâ gie‐jeŋic sipirickepemu. Ehuc roroc bâfua‐jarehuc ŋic mecne qowi mecne mâmâc imac‐jopapemu.
14 Ehame Noa, Danie â Hiobe ŋic jahec â moc i jaŋe ira junʒapiŋ muzac tiŋne juju‐jeŋicte erâ jaŋe jaŋacne juju sawa ŋezickenʒapiŋ. Wofuŋ Anutu nore dâŋ iŋuc.
15 No mâreŋ mocko ira mupe qowi mimicnezi fuarâ mâreŋ rune ki sipiric ejarepie omaenʒapiŋ muzac ŋic gâcne jaŋe qowire hâwic‐jopame ira sicne fotâc mi enʒapiŋ.
16 Eme no jujâmbâŋkekopacte ŋic jahec â moc keci jaŋe ira junʒapiŋ muzac naru motecfâc‐jeŋic wâc sâcne mi ŋezic‐jopanʒapiŋ, aricne, jaŋe jaŋacne juju sawa ŋezickehapie mâreŋ i niniŋ siarereŋ fuarâ fozac. Wofuŋ Anutu nore dâŋ iŋuc.
17 Me mâreŋ ira ʒika fuame mupe ʒikazi mâreŋ fotâcnehuc ŋic â qowi kimiziec‐jopame muzac
18 ŋic jahec â moc keci jaŋe no Wofuŋ jukopacte naru motecfâc‐jeŋic sâcne mi ŋezic‐jopanʒapiŋ, aricne, jaŋe jaŋacne juju sawa ŋezickenʒapiŋ. Wofuŋ Anutu nore dâŋ iŋuc.
19 Me mâreŋ ira mupe huc sâqocne fuame muzac me ŋic â qowi sipirickeniŋte aaric mana‐jarehuc ʒika bâfua‐jarezapo muzac ine no Wofuŋ jukopacte
20 Noa â Danie erâ Hiobe jaŋe naru motecfâc‐jeŋic wâc sâcne mi ŋezic‐jopanʒapiŋ, aricne, jaŋe tiŋne juju‐jeŋicte erâ jaŋe jaŋacne juju sawa ŋezickenʒapiŋ. Wofuŋ Anutu nore dâŋ iŋuc.”
21 Wofuŋ Anutuzi kecʒiŋuc hâcne mukac: “No Jerusalem hae okacne bazucnehuc ŋic â qowifâc‐ticne omaeniŋte bâbâtiŋ wiac 4 mupe fuaocmu, ine kecʒiŋuc: Ʒika, roroc, qowi mimicne â huc sâqocne.
22 Erâ sifu ŋic afecne jaŋe naru motecfâc‐jeŋic haeonec jowac‐jopapie wahaniŋte ŋezic‐jopapemu. Eme jaŋe wahapie ŋoŋe juju â eebapa‐jeŋic honerâ buŋeŋic mâteŋkeme ʒiŋuc mananiŋmu: Wofuŋzi Jerusalem haeo wiac hâhâwicne ebac ewec i sâckewec.
23 Ŋoŋe juju â eebapa‐jeŋic honerâ ʒiŋuc mana tarahuc buŋeŋic mâteŋkeocmu: Wofuŋ e wiac ebac ewec i kosa mâcne, fuŋnehec efârewec. Wofuŋ Anutu nore dâŋ iŋuc.”