15
Jerusalem hae e waiŋjâc behekicne iŋucne
1 Eme Wofuŋte dâŋ norao kecʒiŋuc fuawec:
2 “Ŋicte ɋâric, waiŋjâczi jâc wiac gâcne kâteo doma rakac i moc siric‐jopaocmu me?
3 Waiŋjâc izi wiac gâcne moc bapane me? Me ŋiczi irec tieŋne moc rorâ ira wiac moc ɋeɋetickene me?
4 Aricne, i ʒocte biŋe eekac. Eme tieŋne moc tofane ŋifec â ŋifec ʒoczi ʒâtâcnehuc ombâŋne ʒâgâpâreme izi wiac moc bapane eocmu me?
5 Manakic, furu jaha fohuc wiac i me i bapanere sâc mi ewecko wemocko ʒâgâpârekicnezi wiac i me i moc bazo.
6 Irec hâcne Wofuŋ Anutuzi ʒiŋuc mukac: No kâtejâc jaŋere ŋondeŋkonec waiŋjâc rorâ ʒocte biŋe râepo irec sâc jaha Jerusalem haere ŋecjucfâc qikiŋ‐jopapemu.
7 No râsi ejarepemu, eme jaŋe ʒoc wisecnepie ʒoczi sifu ʒâtâmirec‐jopaocmu. Wiac iŋucne fuame, no hâcne Wofuŋ jukopac i mana taranʒepieŋ.
8 Jaŋe no behecnumbiŋte mâreŋ‐jeŋic imackepe niniŋ siarereŋ fuarâ fozejec. Wofuŋ Anutu nore dâŋ iŋuc.”