16
Wofuŋzi Jerusalem ehâmocnewec
1 Wofuŋte dâŋ norao harierâ kecʒiŋuc fuawec:
2 “Ŋicte ɋâric, go Jerusalem hae rune eebapa‐jeŋic mamakâcne i jaza jowatuc etec mana taranʒepieŋ.
3 Ehuc jazac: Wofuŋ Anutu e Jerusalem haere dâŋ kecʒiŋuc mukac: Apa ŋosafâcge jaŋe Kanaaŋ mâreŋko juhapie go ijaha fuameŋ; mamacge e Amori ŋic â neŋgocgezi ine Hitiŋic jaŋeraonec.
4 Go fuameŋ dameŋ ira funʒuŋgere muc mi hetâcnembiŋ â opâ wâc mi rua‐garembiŋ, erâ hucâsu mi rua‐garehuc qoruczi wâc mi foŋgumbiŋ.
5 Ŋic moczi gore busâqoc manahuc wiac keci iŋucne moc mi egarewec, aricne, go fuameŋ dameŋ ira qaisocguhuc rambaŋko kosa behecgukicne.
6 “Eme go soc ruahuc me kikege râe fâretiŋ ehaŋtec no ira fotâcnerâ honecguhuc ʒiŋuc gazapo: ‘Go juzemec,
7 ehuc jâc iŋucne soka sanaŋ ezemec.’ Eme go soka sanaŋ erâ ŋokac ʒeŋoŋ emeŋ, ehame susuge hasickeme qizec susucge haŋsâko ewec. Ŋifec ine ŋaqi tâmiric erâ biuctac jumeŋ.
8 “Eme no goraopec mocwâc fotâcnerâ ʒiŋuc honecgupo: Go biac ŋic rorore sâc emeŋ. Iŋuc honecgurâ ŋaqi‐nane hegarepe hurâ biuctacge sâockewec. Ehame rocgupemurâ mupaŋkehuc gohec ʒâʒâfic epe nore biŋe emeŋ. Wofuŋ Anutu nore dâŋ iŋuc.
9 Iŋuc erâ opâ rua‐garehuc wânâŋ ʒure emasaŋ erâ wokemaŋ rua‐garepo.
10 Erâ ŋaqi qâreŋnehec â kikehuhu hegarepe huwec, erâ umbika joma‐garerâ qoruc hahameŋne qagarepo.
11 Ehuc eri qoqonaŋ wiac râe‐garepo, erâ megao kisueŋ hegarepe feha upegao qoqonaŋ wiac qonaŋke‐garepo.
12 No sâke finʒuŋ râe‐garehuc pâŋi warawa hazecgao râepo, erâ qizecgao eri hendiŋ biaŋne moc hegarepe huwec.
13 Erâ qoqonaŋ wiacge i gol â siliwazi bakicne â ŋaqi wiacge i qoruc furi sâko qâreŋneheczi bafârekicne hâcne. Go nânâ poroŋ erâ baŋac â wokemaŋ nâhuc jumeŋ, ehuc hawari biaŋ jâmbâŋ erâ ŋokac wofuŋ iŋucne jumeŋ.
14 No hâcne eri qoqonaŋ wiac furi sâko râe‐garepe hawarige biaŋne fuame irec biŋezi ŋicne ŋicne sâcjopa‐fârewec. Wofuŋ Anutu nore dâŋ iŋuc.
Jerusalem rune jaŋe Wofuŋ‐jeŋic beherâ wiac mamakâcne embiŋ
15 “Goki ine sahac hawari â ʒâŋe biŋegere manatec fefene eha sasec gie bameŋ, ehuc ŋic ira sicne fotâc embiŋ jaŋe ro fâre ejaremeŋ.
16 Go ŋaqi wiacge gâcne sasec giere erâ furu mâreŋko râe rumac ehuc ira sasec gie bameŋ hâcne. Wiac iŋucne mârâc jaha moc mi fuawec, erâ wâc juku mi fuazokac.
17 Go eri wiac furi sâko gol â siliwazi bakicne noni garepo i hâcne rorâ gahacne biŋe ɋâŋ qâqâtâc ŋic hawari iŋucne barâ jaŋehec sasec gie bameŋ.
18 Ehuc ŋaqige qâreŋnehec hejaretec hume wokemaŋ â hosâc âsu nore biŋe qakicne i jaŋe rike râec ejaremeŋ.
19 Erâ nânâ wiac garepo, nânâ poroŋ uucne, wokemaŋ â baŋac gumecguhuc jupo i wâc iŋuc jaha rorâ bubiaŋ qajarehuc mai‐jeŋicko râe guruc emeŋ. Wofuŋ Anutu nore dâŋ iŋuc.
20 Go naru motecfâcge nore biŋe bâfuac‐jopameŋ jaŋe hâcne ɋâŋ qâqâtâcfâcge jaŋere biŋe hezu rikec ejaremeŋ. Go wiac mamakâcne gâcne ebac etec mi sâckewecte
21 naru motecfâc‐nane hezu rikec ejaremeŋ me?
22 Go ɋieo soc ruahuc ŋaqi tâmiric biuctac fomeŋ â me kikege râe fâretiŋ emeŋ i wiac mamakâcne ehuc sasec gie bameŋ dameŋ ira nikecgu‐fârewec hâcne.
23 “Jei jei, Wofuŋ Anutu nore dâŋ iŋuc.
24 Go wiac hehesicne gâcne erâ irec faicnao hae ʒoŋa sâc bâzi ririke alata â ɋâŋufuŋ bameŋ.
25 Hata ŋeŋehasic forakac sâc ira iŋuc hâcne emeŋ, erâ ŋic ira sicne fotâc embiŋ jaŋe ro fâre ejarehuc hawari biaŋge hesifuckerâ sasec gie batec boc ɋârâŋkewec.
26 Go diguracfâcge ŋic repicne, Aigita ŋic hâcne, jaŋehec wâc sasec gie boc bahuc maŋbâiŋ enaremeŋ.
27 Manakic, no irec hâcne râsi egarehuc wiac biŋe qagarepo i sakare‐garerâ râsifâcge Filisa ŋokac jaŋere meo râecgupo, jaŋe hâcne juju bapage sâqocnere erâ mimiembiŋ.
28 Go sasec gie gapecmâc bameŋte Asiria ŋic jaŋehec sâc iŋuc jaha jumeŋ, ehuc sifu mi sâcguwec.
29 Erâ Kaldea âbârâ ŋic jaŋehec wâc sasec gie bameŋte sasecgezi boc ɋârâŋkewec, erâ izi wâc sifu mi sâcguwec.”
30 Wofuŋ Anutuzi ʒiŋuc mukac: “Opoŋ, saseczi maŋge sâcke‐fârewecte go sasec ŋokac râŋgeŋ qaŋqaŋne iŋucne erâ wiac i sasawa efâremeŋ.
31 Go hata ŋeŋehasic sâc ɋâŋufuŋge bafâremeŋ â hae ʒoŋa sâc bâzi ririke alata wâc barameŋ. Ehuc sasec giere furi qikiŋnehuc sasec ŋokac fârine jaŋere sâc jâmbâŋ mi emeŋ.
32 Go sasec ŋokac fuŋmoc, go ŋowege mâcne, ŋic furune jaŋe wira hefârec ejaremeŋ hâcne.
33 Hae mâreŋ gâcnao sasec ŋokac jaŋe gie‐jeŋicte furi roeŋgopieŋ, goki ine iŋuc mi ehuc mâreŋ sâc irecnec ŋic gorao fisirâ gohec sasec gie baniŋte furine jaremeŋ.
34 Go irec hâcne sasec ŋokac gâcne jaŋere sâc aricne, go sâc moc jumeŋ. Ŋic moczi moc gohec sasec gie baocte mi bâjâpecguwec, erâ go furine moc mi garehapie gokizia jarehuc jumeŋ. Go irec hâcne sasec ŋokac sâc moc jâmbâŋ jumeŋ.”
Anuturaonec okacne fisicneocmu
35 O sasec ŋokac, go irec hâcne Wofuŋte dâŋ manazemec.
36 Wofuŋ Anutuzi kecʒiŋuc mukac: “Go sasec ŋic âgofâcge jaŋehec sasec gie bahuc biuctac juhaŋtec mimige tâtâc fuarâ fowec, â ɋâŋ qâqâtâcfâcge jaŋe bocjaha, erâ naru motecfâcge jaŋe ɋâŋ qâqâtâcfâcge jaŋere biŋe qikiŋ‐jopahuc socjeŋic hoŋkemeŋ.
37 Manakic, no wiac irec erâ sasec ŋic âgofâcge ʒeri bubiaŋ mana‐jaremeŋ jaŋe mecne â behe qaisoc ejaremeŋ jaŋe mecne mâmâc mâreŋ ŋifec â ŋifec irecnec hetumaŋ‐jopape râsi fisi‐garenʒepieŋ. Ehame jaŋere maio ŋaqi qorucge hetara‐garepe biuctac domatec honecgunʒepieŋ.
38 Eme no ŋokac jaŋe ŋowefâc‐jeŋic ro behec ejareeŋgopieŋ â soc hoŋkeeŋgopieŋ jaŋe okacne bazu‐jareekopac irec sâc jaha go egarepe kimbeŋ â ʒoɋac‐nane wahazejec.
39 No sasec ŋicfâcge jaŋere meo râecgupe jaŋe ɋâŋufuŋ wiacge â alata ŋerakac i heroc qâropienʒepieŋ; ehuc ŋaqige heunuckerâ eri wiacge gowac ropie biuctac erâ juzemec.
40 Jaŋe tutumaŋko âkendâŋgurâ qânâzi hecguhuc ʒikazi qâtâc bâtâcguniŋmu.
41 Ehuc ficwiacge ʒoc turuŋkepie ʒame ŋokac bocjaha jaŋere maio dâŋge mutaranʒepieŋ; ehame no sasec giere aka hegarepe go furine mocwâc mi râezemec.
42 No iŋuc egarehuc kimbeŋ‐nane bâmâteŋkepemu â ʒoɋac‐nane behepemu; no uruehuc aaric mocwâc mi manapemu.
43 Manakic, go socɋâri jujugere nikecgume wiac i sasawa ehuc maŋbâiŋ enaremeŋte no eebapagere okacne bazu‐garepemu. Wofuŋ Anutu nore dâŋ iŋuc.
Jerusalemte kiŋzi mâreŋ gâcnere kiŋ sirickekac
“Go wiac mamakâcne ehuc sasec gie moc ʒuhuckerâ mi bameŋ me?
44 Manakic, ŋic mu âke sisic dâŋ mueŋgopieŋ jaŋe go mu âke sisic jaha egarehuc ʒiŋuc muniŋmu: ‘Naru e neŋgoc‐ticnezi juwec sâc ijaha jukac.’
45 Go neŋgocgere otâ hâcne, e ŋowe motecfâcne qaisoc‐jopawec. Go hahac qofâcge jaŋere tofane jaha, jaŋe ŋowe motecfâc‐jeŋic behe qaisoc ejarembiŋ. Neŋgocge e Hitiŋic jaŋeraonec â mamacge e Amori ŋic.
46 Hahacge e Samaria hâcne, e narufâcne jaŋehec mâreŋ faicpec juwec; erâ qoge Sodom e â narufâcne jaŋe ine mâreŋ juwicpec ira jumbiŋ.
47 Go jaŋe wiac ebac embiŋ irec sâc mâcne, â jaŋe wiac mamakâcne bajumbiŋ irec sâc wâc mi bajumeŋ, aricne, go dameŋ mi ʒoraha jaŋere sâc sirickehuc wiac gâgâpâcne ebac emeŋ.
48 Wofuŋ Anutu no ʒiŋuc mujâmbâŋkekopac: Go narufâcge jaŋehec wiac ebac emeŋ irec sâc qoge Sodom â narufâcne jaŋe mi embiŋ.
49 Manakic, qoge Sodom e wiac ʒiŋuc eme kiŋnehec ewec: E jahacne â narufâcne jaŋe sahac fefe embiŋ, ehuc jaŋe nânâ mâriri sâkohec erâ moneŋ mafa fofo dunduŋ fojareha manabâc tâmiric jumbiŋ. Ehame ŋic hapetac â qarâ suriŋne hone bafic moc mi ejarembiŋ.
50 Jaŋe penaroŋ erâ nore maio wiac mamakâcne epie honerâ bâsirowec‐jopapo.
51 Goki wiac hehesicne bâfuameŋ irec ŋifecne moc Samariazi mi bâfuawec. Go jaŋere sâc sirickehuc wiac mamakâcne bâfuameŋ, irec hahac qofâcge honec‐jopape tiŋne hawari juŋgopieŋ tinac ekac.
52 Mimi busâqoczi hahac qofâcge jaŋere faio feocte mumeŋ irec sâc jaha gore faio fezejec. Gore hehesiczi jaŋere hehesic boc sirickekacte jaŋe tiŋne hawari juŋgopieŋ tinac ekac. Irec mimi busâqoczi gore faio feme hahac qofâcge jaŋe tiŋne hawari juŋgopieŋ tinac jaha eocmu.
Wofuŋzi aki anonoc ejareocmu
53 “Fai‐jeŋicko wiac hâhâwicne fokac i bârâriehape juju biaŋnao mocwâc risienʒepieŋ. Sodom â Samaria hae piticfâc‐jekic jaŋe mâmâc iŋuc ejarehuc go sâc ijaha egarepemu.
54 Eme mimi busâqoczi faigao feme wiac ebac emeŋ irec mimiehuc jaŋe mu bâmiriŋ ejarezemec.
55 Eme hahac qo jahecge Sodom â Samaria erâ otâfâc‐jekic jaŋe mârâc juju‐jeŋicko risiehapie go â otâfâcge ŋoŋe wâc iŋuc jaha mârâc juju‐ŋeŋicko risie‐fârenʒepieŋ.
56 Go hehesicge mi bajaŋgeŋkehapie sahac fefe emeŋ dameŋ ira hahacge Sodom e mu âke sisic mi ecnemeŋ me?
57 Ʒi ine Edom otâfâc‐ticne â âgo diguracfâc‐ticne jaŋe nifepupu egareŋgopieŋ, ehame Filisa otâfâc‐ticne rârec rârec juraŋgopieŋ jaŋe iŋuc jaha egarehuc qaisocguŋgopieŋ.
58 Sasec gie bameŋ â wiac mamakâcne emeŋ irec okacne faigao fewec fokac hâcne. Wofuŋ nore dâŋ iŋuc.”
59 Wofuŋ Anutuzi dâŋ kecʒiŋuc mukac: “Go wiac hehesicne ebac emeŋ irec sâcko okacne bazu‐garepemu. Go ʒâʒâfic hetâcnehuc mumupaŋ dâŋ qâsuameŋ hâcne.
60 Erâ no sifu socɋâri jumeŋ dameŋ ira gohec ʒâʒâfic epo irec manasuhuc gohec ʒâʒâfic fofo sanaŋ moc epemu.
61 Eme no hahac qo jahecge otâ jahecge junicte gorao râec‐jofape go eebapa raŋɋagere manasuhuc mimiezemec. Ehame jahe gohec ʒâʒâfic ekicne irec maŋnao jaha juzepirec.
62 Ehame gohec ʒâʒâfic epe no hâcne Wofuŋ jukopac i mana tarazemec.
63 Eme wiac ebac emeŋ irec kiŋ behe‐garepe go irec manasurâ mimiehuc dâŋemâc juzemec. Wofuŋ Anutu nore dâŋ iŋuc.”