17
Tucwipe â waiŋ qizecne jahere dâŋ
1 Wofuŋte dâŋ norao ʒiŋuc fuawec:
2 “Ŋicte ɋâric, go Israe kikefuŋ dâŋ herâricne â suŋsuŋne moc jazazemec.
3 Ehuc muzemec: Wofuŋ Anutu e kecʒiŋuc mukac: Tucwipe sâko moc fafakec sâkohec â ʒâcʒoranehec erâ suhuc‐ticne qâreŋneheczi Lebanoŋ tikio fisirâ jâmâzâc jâc botâŋnao hewec.
4 Herâ ŋehuc gupiŋne hezurâ âbârâ gie baeŋgopieŋ hae mâreŋ ira barâ wisewec, ehuc jaŋere hae sâko mocko râewec.
5 Iŋuc erâ mâreŋ irec nuucne moc rorâ mâreŋ guec‐ticnehec ira opâ heririŋko niwijâc iŋucne sarawec.
6 Eme bâpâŋnezi soka ŋedâmârec ehuc haŋ qaŋeŋ sâkohec ewec, ehuc tieŋ taeŋnezi tucwipe e jahacnaopec sicnewec â gâtânezi ine domaweckoa huwec. Eme waiŋ qizecne fua taniŋkerâ tieŋ taeŋne sicnehuc rehacnehec ewec.
7 “Eme tucwipe sâko moc fafakec sâkohec â ʒâcʒora sâkohec juwec, ehame eki opâ biaŋne rua‐narezejec muhuc waiŋ qizecnezi gâtâne eraopec râeme rawec â tieŋ taeŋne e jahacnaopec sicnewec.
8 Waiŋzi biaŋne fua sokac erâ fie ruruckehuc hândâŋ fârihec eocte mâreŋ biaŋne opâ heririŋko fowec ira sarakicne i mana‐bipiehuc sifu iŋuc ewec.
9 Irec jazac, Wofuŋ Anutuzi kecʒiŋuc muhuc wiokac: Waiŋ iŋucnezi sâcne fua sokac eocmu? Bâbâni tucwipezi gâtâ‐ticne unuckehuc tieŋ taeŋne hetâcneme rehacne fie ruruckekicne i mi ururucke‐fâreocmu me? I ŋic afecnezi gie sâko mi bahuc mâc unuckeniŋmu hâcne.
10 Unuckerâ mocko sarapie sâcne fua sokac eocmu me? Aricne, ʒoaŋ wewefunaopec mâŋâŋzi ficne sueme hâmo ɋaŋac eocmu, fuawec mâreŋ ijaha hâmoocmu hâcne.”
11 Eme Wofuŋte dâŋ harierâ norao kecʒiŋuc fuawec:
12 “Go Israe kikefuŋ qaqatarahec ʒiŋuc jazac: No dâŋ suŋsuŋne ŋazapac irec fuŋne moc manaŋgopieŋ me? Irec fuŋne ʒiŋuc: Babe ŋicwofuŋ e Jerusalem haeo fisirâ ŋicwofuŋ â fekicnefâc‐ticne rocjoparâ Babe mâreŋko bacjopa rawec.
13 Ehuc ŋicwofuŋte kikefuŋkonec ŋic moc rorâ ehec ʒâʒâfic moc ehuc ecneme mumupaŋ dâŋ muwec.
14 Eme Israe uucmaŋ i mocwâc mi fehuc wawahane erâ juocte â ʒâʒâfic‐ticne basanaŋkepie foocte Juda mâreŋte ŋic fekicne bacjopa rawec hâcne.
15 Judaŋic jaŋere ŋicwofuŋzi ine Babe ŋicwofuŋ râŋgeŋkecnehuc, Aigita ŋicwofuŋzi baficnuhuc momori â becâsic guru sâko râe‐narezejec muhuc erao kiŋaŋ sorec‐jopame rambiŋ. Eme e sâcne fârine bâfuaocmu me? Ŋic moc iŋuc eekaczi okacne sâcne wisecneocmu me? E ʒâʒâfic hetâcneocmuzi juju‐ticne sâcne ŋezickeocmu me?
16 Wofuŋ Anutu no jujâmbâŋkehuc ʒiŋuc mukopac: E Babe haeo ŋicwofuŋ jukackoa hâmozejec. Hae ira hâcne Babe ŋicwofuŋzi ŋicwofuŋ gie jaha mucnewec, eki ine ŋicwofuŋte mumupaŋ dâŋ qâsuahuc ʒâʒâfic‐ticne hetâcnewec.
17 Babeŋic jaŋe ŋic bocjaha sipiric‐jopaniŋte somâ bapa mâreŋ toŋne hefeniŋmu â sac hafeniŋmuo ine Farao â momorifâc‐ticne guru sâko jaŋe fisirâ Judaŋic mi bafic‐jopaniŋmu.
18 Juda ŋicwofuŋ e mumupaŋ dâŋ qâsuahuc ʒâʒâfic hetâcnewec, e Babe ŋicwofuŋhec maŋ mocjaha ehuc meo babac epic, erâ sifu wiac keci ewecte okacne fuacnezejec.
19 Irec Wofuŋ Anutu no kecʒiŋuc mukopac: E mumupaŋ dâŋnane qâsuawec â ʒâʒâfic‐nane hetâcnewec irec no jujâmbâŋkekopacte okacne bazucnepemu.
20 No bitiŋ râecnepe ira kizejec â wiwitic hecnepe ira rozejec. E doc bacnuwecte Babe haeo bararâ dâŋgiere biŋe râepemu.
21 Ehame momorifâc‐ticne bâwosâec‐jopakicne jaŋe ʒikare biŋe efâreniŋmu â ŋic nâfocne jaŋe mâreŋ qaŋeŋne sâc bâtâtiec‐jopape rafâreniŋmu. Iŋuc fuame ʒiŋuc mana taranʒepieŋ: I Wofuŋzi hâcne muwec.”
22 Wofuŋ Anutuzi kecʒiŋuc mukac: “No nahac jâmâzâc botâŋne irec tieŋne rorâ sarapemu, no botâŋ susukucnaonec gupiŋne dodocne moc qazurâ tiki ʒoricnere botâŋko sarapemu.
23 Israe mâreŋte tiki ʒorao sarapemu hâcne; eme ira tieŋ taeŋne râehuc fârinehec eocmu. Ehame jâmâzâc biaŋne soka ŋedâmârec eme qowi fuŋne fuŋne jaŋe irec fuŋnao ŋec foc ehapie wipe hawari fuŋne fuŋne jaŋe tieŋ taeŋnao sareŋ‐jeŋic râeniŋmu.
24 Eme Wofuŋ noni jâc bembeŋne bâʒorac‐jopapemu â jâc ʒoricne bâmbeŋ‐jopapemu, ehuc fie ruruckeekac i mupe hâmo ururuc eocmu â hâmo ururuc ekicne i mupe fie ruruckeocmu, ehame gieo jâc doma raŋgopieŋ jaŋe no hâcne Wofuŋ jukopac i mana taraniŋmu, Wofuŋ noni hâcne mukopac iŋuc epemu.”