18
Moc e sâqocne baocmuzi hâmozejec
1 Wofuŋte dâŋ norao ʒiŋuc ʒuhuckerâ fuawec:
2 “Ŋoŋe wemocte Israe mâreŋte qâqiŋ qahuc mu âke sisic dâŋ keʒiŋuc boc muhuc jueŋgopieŋ, ‘Mamacfâc‐jeŋic jaŋe jâchândâŋ ʒaʒacne nâmbiŋte naru motecfâc‐jeŋic jaŋe mic aaric ejareekac’?
3 Irec Wofuŋ Anutu no ʒiŋuc mukopac: No jujâmbâŋkekopacte mu âke sisic dâŋ i Israe ŋic ŋondeŋ‐ŋeŋicko mocwâc mi fuazejec.
4 Manaŋgopieŋ, juju i nore biŋe sasawa, mamacte juju i nore biŋe, â ŋokâre juju i nore biŋe jaha, irec moc e sâqocne baocmuzi hâmozejec.
5 “Ŋic moc e tiŋne juhuc sâcmutâc dâŋte sâcko wiac ebac eocmu,
6 e tiki botâŋko nemure tiwâ bâzi mi nâocmu, me Israe kikefuŋ jaŋere nemuɋâŋko ʒâŋe mi fiocmu, me âgo‐ticnere ŋokac mi bâsâqoreocmu, me ŋokac mosa dameŋ‐ticne maickehame erao mi raocmu.
7 E ŋic moc mi eatuckehuc wiac irec me irec kifac râcnewec i bârisiecneocmu, me wiac kâŋgâc mi jowac roocmu, me nânâre hâmo sipiric eeŋgopieŋ jaŋe nânâ gumec‐jopaocmu, me biuctac jueŋgopieŋ jaŋe ŋaqi hejareme huocmu.
8 Me moneŋ hotâ jareocmuzi juku irec sâc sirickehuc bârisiecneniŋte mi muocmu, me wiac hehesicne ba bâuac mi ehuc ŋic dâŋjeŋic mutiŋnerâ wiac sâckoa ejareocmu.
9 Erâ mumutâc dâŋnane mana maŋ erâ sâcmutâc‐nane aijakic jaha bâjâpe‐fâreocmu ŋic eki hâcne bahac fâsâc erâ jujâmbâŋkeocmu. Wofuŋ Anutu nore dâŋ iŋuc.
10 “Ŋic bahac fâsâc juekac ere ŋokâ moc fuarâ ŋic ʒâʒâicne eocmu me soc hoŋkeocmu, me wiac mukicne keci moc mi efâreocmu,
11 ehuc tiki botâŋko nemure tiwâ bâzi nâocmu, me âgo‐ticnere ŋokac bâsâqoreocmu.
12 Â ŋic hapetac me tac qararacne bâʒâic‐jopaocmu, me fiuc serereŋ gie baocmu, me âgo‐ticnere kifac mi bârisieocmu, me nemuɋâŋ jaŋerao ʒâŋe fiocmu, me wiac mamakâcne gâcne ebac eocmu.
13 Erâ moneŋ hotâ jareocmu irec sâc sirickehuc jowac roocte muocmu. Eme weniŋuc, wiac iŋucne eocmuzi sâcne juocmu me? Aricne, e mi juzejec, e wiac hehesicne keci ebac eocmuo ine hâmo‐jâmbâŋkezejec, â socticnere kiŋzi e jahacne faio fezejec.
14 “Me eraonec ŋokâ moc fuarâ mamac‐ticne wiac hehesicne ebac ewec i honerâ hâwickeme hata hehesicne ijaha mi âteocmu.
15 E tiki botâŋko nemure tiwâ bâzi mi nâhuc Israe kikefuŋte nemuɋâŋ jaŋerao ʒâŋe mi fiocmu, erâ âgo‐ticnere ŋokac wâc mi bâsâqoreocmu.
16 E ŋic moc mi bâʒâic‐jopaocmu â kifac moc mi roocmu, e fiuc tâmiric juhuc nânâre hâmoeŋgopieŋ jaŋe gumec‐jopaocmu â biuctac jueŋgopieŋ jaŋe ŋaqi hejareme huocmu.
17 E wiac hehesicne ba bâuac mi eocmu, erâ moneŋ hotâ jareocmu irec sâc sirickerâ bârisiecneniŋte mi muocmu, aricne, e mumutâc dâŋnane mana maŋ erâ sâcmutâc‐nane bâjâpeocmu; irec e mamac‐ticnere hehesicte erâ mi hâmohuc jujâmbâŋkezejec.
18 Mamac‐ticnezi ine ŋic fific bacjopawec â âgo‐ticnere wiac fiuc rowec, erâ ŋic ŋondeŋko wiac sâqocne ebac ewecte hehesic‐ticnere erâ hâmozejec.
19 “Ŋoŋe ʒiŋuc mecne wioŋgopieŋ: ‘Ŋokâ e wemocte mamac‐ticnere kiŋte erâ mi bâtiŋnezo?’ Iŋuc wioŋgopieŋ ŋoŋe ʒiŋuc mananiŋ: Ŋokâ e wiac tiŋne â fâretiŋ jaha ebac ehuc mumutâc dâŋnane mana maŋ ewec â sâcmutâc‐nane aijakic jaha bâjâpewecte jujâmbâŋkezejec.
20 Manaŋgopieŋ, ŋic sâqocne baocmu e hâcne hâmoocmu. Ŋokâ e mamac‐ticnere kiŋte erâ mi hâmoocmu â mamac e ŋokâ‐ticnere kiŋte erâ wâc mi hâmoocmu. Ŋic tiŋne e tiŋne juju‐ticnere fârine bâfuaocmu, â ŋic hehesicne e juju‐ticne hehesicnere fârine bâfuaocmu jaha.
Anuture hata i tiŋne
(Eʒek 33:10–20)
21 “Me ŋic hehesicne moczi maŋticne bârisiehuc sâqocne ebac ewec i qikiŋne‐fârerâ sâcmutâc dâŋnane mana rereŋ efârehuc wiac tiŋne â biaŋne eocmu e mi hâmohuc jujâmbâŋkeocmu.
22 Ehame wiac gâgâpâcne ebac ewec i mocwâc mi manasupemu, aricne, e eebapa‐ticne tiŋnere erâ juzejec.
23 No ŋic hehesicnezi hâmome bubiaŋ mi manapemu, aricne, e hata raŋɋa‐ticne râpeckehuc juocmu ine manape biaŋkeocmu. Wofuŋ Anutu nore dâŋ iŋuc.
24 Me ŋic tiŋne moczi hata‐ticne tiŋne râpeckerâ ŋic hehesicne jaŋe wiac mamakâcne fuŋne fuŋne eeŋgopieŋ i eocmu e wemocko juocmu. Aricne, e mârâc wiac tiŋne ebac ewec irec mocwâc mi manasupemu. E râpecnuhuc sâqocne bâfuawec irec hâmozejec.
25 “Ŋoŋe ine sifu ʒiŋuc mueŋgopieŋ: ‘Wofuŋzi wiac ebac eekac i fâretiŋ aricne.’ Irec Israe kikefuŋ ŋazape mananiŋ: No mâcne, ŋoŋe hâcne wiac ebac epie fâretiŋ mi eekac.
26 Ŋic tiŋne moczi tiŋne juju‐ticne râpeckerâ wiac hehesicne bâfuaocmu e hâmoocmu, e wiac hehesicne bâfuaocmu irec erâ hâmoocmu hâcne.
27 Ŋifec ine ŋic hehesicne moczi juju‐ticne hehesicne râpeckerâ wiac biaŋne â tiŋne ebac eocmu eki ine juocmu.
28 E fuŋne‐ticne hone ʒâŋitac erâ hehesic bâfuawec i râpeckewecte mi hâmohuc jujâmbâŋkeocmu.
29 Israe kikefuŋ ŋoŋe ine sifu ʒiŋuc mueŋgopieŋ: ‘Wofuŋzi wiac ebac eekac i fâretiŋ aricne.’ Irec Israe kikefuŋ ŋazape mananiŋ: No mâcne, ŋoŋe hâcne wiac ebac epie fâretiŋ mi eekac.
30 “O Israe kikefuŋ, no irec hâcne eebapa‐ŋeŋicte sâcko ru sâc dâŋŋeŋic mutarapemu. Wofuŋ Anutu nore dâŋ iŋuc. Hehesic‐ŋeŋiczi sipiric‐ŋopazacte maŋŋeŋic bârisierâ sâqone‐ŋeŋic râpecke‐fârenʒepieŋ.
31 Ŋoŋe no râpecnuhuc sâqocne bâfuambiŋ i behe‐fârenʒepieŋ, ehuc maŋɋâri â juju ɋâri bâfuanʒepieŋ. O Israe kikefuŋ, ŋoŋe wemocte hâmoniŋte mueŋgopieŋ?
32 Manaŋgopieŋ, ŋic e me e moczi hâmome no bubiaŋ mi manapemu, irec ŋoŋe maŋŋeŋic bârisierâ junʒepieŋ. Wofuŋ Anutu nore dâŋ iŋuc.”