19
Israe ŋic fekicne jajahec jahere makuc gae moc
1 Go Israe ŋic fekicne jajahec jahere makuc gae moc hefuazemec.
2 Ehuc ʒiŋuc muzemec:
Neŋgoc‐ŋekic e laioŋ jaŋere ŋondeŋko
laioŋ ŋokacne mo iŋucne juwec!
E laioŋ motecne jaŋere guruo ŋec foc ehuc
hone soŋaŋ ejarehame soka sanaŋ embiŋ.
3 Eme motecne moc gume jowac ecnekume
wiac sâko ewec,
ehuc qowi qaqare fuŋne manawec,
â ŋic wâc jopa nâc ewec.
4 Ehame ŋicne ŋicne jaŋe ere biŋe manarâ sawaŋ qaqac embiŋ,
ehuc nombâŋ rocnepie huwec;
eme hawiczi hehawickehuc fâre wefurâ
Aigita mâreŋko barambiŋ.
5 Iŋuc fuame neŋgocnezi ere woŋec juipieku
motecne moc gume jauŋ ecnekume
wiac sâko jaha ewec.
6 E laioŋ gâcne jaŋere ŋondeŋko kiwac qawac ewec,
ehuc laioŋ tâpirihec irec sâc bâfuawec,
e qowi qaqare fuŋne mana tarawec,
â ŋic wâc jopa nâc ewec.
7 E ficsanaŋ‐jeŋic kiroc qâropiewec,
â hae‐jeŋic imackewec;
ehame hae mâreŋ â ira ŋec juc embiŋ
jaŋe owa fânâŋ‐ticnere bipic tatara ejarewec.
8 Eme ŋicne ŋicne jaŋe somâ râecnehuc
bitiŋ bacne‐fârembiŋ;
jaŋe ufic hecnembiŋ,
erâ nombâŋ rocnepie ira huwec.
9 Jaŋe hawiczi hehawickehuc katapa maŋko râerâ
Babe ŋicwofuŋ erao barambiŋ;
marac fânâŋ‐ticne Israe tikio mocwâc mi mananiŋte
kâpâcwâru ficko râembiŋ hâcne.
10 Neŋgocge e waiŋ qaŋeŋne opâ heririŋ
waiŋ gieo sarakicne iŋucne,
e opâ boc fowecte
fâri rarau â tieŋ taeŋ sâkohec ewec.
11 Tieŋne moczi sokarâ ŋicwofuŋ gunu ewec.
E tieŋ taeŋne gâcne siric‐jopahuc ʒoricne ʒora fewec;
e boc ferâ domawec â tieŋ taeŋ sâkohec ewecte
ŋiczi hone‐fârembiŋ.
12 Eme waiŋ qizecne e aaricko unuckerâ mâreŋko behekicne;
ʒoaŋ wewefunaonec mâŋâŋzi ficneme kereŋkewec,
â hândâŋ‐ticne mâtâckerâ waha‐fârewec;
tieŋne sanaŋne izi hâmo kereŋ eme ʒoczi ʒâseŋkewec.
13 Ʒi ine mâreŋ burocnao sarakicne,
mâreŋ kereŋne â opâ tâmiricko hâcne.
14 Eme waiŋ qizeckonec ʒoc wefurâ
tieŋ taeŋne â fârine ʒâseŋke‐fârewec,
ehame tieŋne sanaŋne i mocwâc mi fowec,
â ŋicwofuŋ gunu i wâc omaewec.
Gae ʒizi makuc gae eocte hefuakicnere makuc gae ewec hâcne.