20
Porofete e Israe ŋic mârâc jumbiŋ jaŋere fuŋne rituwec
1 Jara 7 irec mosa namba 5 â irec ʒoaŋ gie bapa 10 ira Israe soŋaŋ micne gâcne jaŋe Wofuŋ mu wioc ecneniŋte fisirâ nore maio waha ŋembiŋ.
2 Ehame Wofuŋte dâŋ norao ʒiŋuc fuawec:
3 “Ŋicte ɋâric, go Israe soŋaŋ micne dâŋ ʒiŋuc muhuc jazac: Wofuŋ Anutuzi dâŋ kecʒiŋuc mukac: Ŋoŋe no mu wioc enareniŋte wareŋgopieŋ me? No jujâmbâŋkekopacte mu wioc moc mi enarenʒepieŋ. Wofuŋ Anutu nore dâŋ iŋuc.
4 O ŋicte ɋâric, me goki dâŋjeŋic mutarazo ekomec me? Iŋuc ezo murâ ine mamacfâc‐jeŋic jaŋere hehesic irec fuŋne ritu‐jaretec mananʒepieŋ.
5 Ehuc ʒiŋuc jazazemec: Wofuŋ Anutuzi kecʒiŋuc mukac: No Israe ŋic bâwosâec‐jopapo dameŋ ira Aigita mâreŋko Jakobore ɋâricfâc maic‐jopahuc fuŋne‐nane bataniŋkerâ dâŋ kecʒiŋuc mupaŋke‐jarepo: No ŋoŋere Wofuŋ Anutu.
6 Erâ ʒiŋuc hâcne mupaŋke‐jarepo: No Aigita mâreŋkonec jowac‐ŋopa waharâ mâreŋ moc ŋoŋere biŋe bâwosâekicne ira râec‐ŋopapemu. Mâreŋ i boc biaŋne jâmbâŋ erâ guec sâko‐ticnehec.
7 Erâ ʒiŋuc jazapo: Ŋoŋe wiac mamakâcne hone ʒiziweeŋgopieŋ i ru sâc behe‐fârenʒepieŋ, ehuc Aigita ŋic jaŋere ɋâŋ qâqâtâc bajuhuc maŋŋeŋic mi hegâpârenʒepieŋ; no hâcne Wofuŋ Anutu‐ŋeŋic jukopac.
8 Eme jaŋe ine dâŋnane qatarahuc mi manambiŋ, jaŋe wiac mamakâcne hone ʒiziwembiŋ i ru sâc mi behembiŋ â Aigita ŋic jaŋere ɋâŋ qâqâtâc i wâc mi qikiŋnembiŋ.
“Iŋuc embiŋte Aigita mâreŋko jaha juhapie no kimbeŋ aaric‐nane furu jaha fai‐jeŋicko râepe feocte manasupo.
9 Erâ no ʒâŋe biŋe‐nanezi ŋicne ŋicne jaŋere maio wawahane ezacte iŋuc mi epo. No Israe ŋic Aigita mâreŋko jumbiŋ jaŋe irecnec jowac‐jopa wahapemurâ ŋicne ŋicne jaŋere maio fuŋne‐nane bataniŋkepo hâcne.
10 Iŋuc ehuc Aigita mâreŋkonec jowac‐jopa waharâ mâreŋ burocnao râec‐jopapo.
11 Ira ine dâŋsanaŋ â sâcmutâc dâŋnane jarepo; mâreŋŋic jaŋe dâŋ i mana rereŋ epie juju fua‐jareomu hâcne.
12 Erâ i sawa mâcne, sabata hombaŋ‐nane wâc jarepo, izi ŋondeŋ‐nâŋecko ma eha ʒiŋuc mana taraniŋte: Wofuŋzi jahacne biŋe bâtiric‐nâpowec.
13 Eme Israe kikefuŋ jaŋe ine mâreŋ burocnao fenarembiŋ, jaŋe dâŋsanaŋ‐nane mana rereŋ epie muzac juju fua‐jarezac. Jaŋe ine iŋuc mi embiŋ â sâcmutâc dâŋnanere sâcko mi juhuc sabata hombaŋ‐nane qâsuambiŋ.
“Iŋuc epie mâreŋ burocnao kimbeŋ‐nane fai‐jeŋicko râepe feme omaeniŋte manasupo.
14 Erâ no ʒâŋe biŋe‐nanezi ŋicne ŋicne jaŋere maio rârâpene ezacte iŋuc mi epo. No jaŋere maio hâcne Aigita mâreŋkonec jowac‐jopa wahapo.
15 Erâ i sawa mâcne, mâreŋ burocnao ʒiŋuc mupaŋke‐jarepo wâc; no mâreŋ biaŋne jâmbâŋ â guec‐ticnehec biŋe qaŋarepo ira moc mi jowac‐ŋopa raku râec‐ŋopapemu.
16 Jaŋe sâcmutâc dâŋnane qikiŋnehuc dâŋsanaŋ‐nanere sâcko mi jumbiŋte â sabata hombaŋ‐nane qâsuahuc maŋjeŋic nemuɋâŋfâc‐jeŋic jaŋerao râepie fowecte iŋuc ejarepo.
17 Erâ no sifu busâqoc mana‐jarerâ akic‐jopahuc mâreŋ burocnao mi bâsirowec‐jopapo.
18 “Eme no ɋâricfâc‐jeŋic mâreŋ burocnao dâŋ ʒiŋuc jazapo: Ŋoŋe mamacfâc‐ŋeŋic jaŋere dâŋsanaŋ â sâcmutâc dâŋ mana rereŋ mi enʒepieŋ, â nemuɋâŋfâc‐jeŋic jaŋerao qohotahuc juhapie maŋŋeŋic mi gâpârezejec.
19 No hâcne Wofuŋ Anutu‐ŋeŋic jukopac, irec dâŋsanaŋ‐nane bâjâpehuc sâcmutâc dâŋnane aijakic jaha bajunʒepieŋ.
20 Ehuc sabata hombaŋ‐nane bâtiripie ŋondeŋ‐nâŋecko ma erâ foha, no hâcne Wofuŋ Anutu‐ŋeŋic i mana taranʒepieŋ.
21 Ɋâricfâc‐ŋeŋic jaŋe ine dâŋnane mi bâjâpembiŋ â sâcmutâc dâŋnane aijakic jaha mi bajumbiŋ. I mana rereŋ epie muzac juju fua‐jarezac, jaŋe sabata hombaŋ‐nane qâsuambiŋ wâc.
“Iŋuc epie mâreŋ burocnao aaric‐nane furu jaha fai‐jeŋicko râepe feocte manasupo.
22 Erâ no ʒâŋe biŋe‐nanezi ŋicne ŋicne jaŋere maio rârâpene ezacte sifu iŋuc mi epo. No jaŋere maio hâcne Israe ŋic Aigita mâreŋkonec jowac‐jopa wahapo.
23 Erâ i sawa mâcne, mâreŋ burocnao ʒiŋuc mupaŋke‐jarepo wâc: No ŋicne ŋicne jaŋere ŋondeŋko bâtâtiec‐ŋopape mâreŋ sâc râwiŋ qârâwiŋnenʒepieŋ.
24 Jaŋe sâcmutâc dâŋnane mi reŋkehuc dâŋsanaŋ‐nane qikiŋnembiŋ, â sabata hombaŋ‐nane qâsuambiŋ, erâ mamacfâc‐jeŋic jaŋere nemuɋâŋfâc hone aŋac ejarembiŋte iŋuc hâcne mupaŋke‐jarepo.
25 Erâ i sawa mâcne, no dâŋsanaŋ â mumutâc dâŋ repicne sisipiricnehec wâc jarepo.
26 Erâ no mana‐jarehape nemuɋâŋ wiac taha bajarehuc maŋjeŋic hegâpârembiŋ. No bipic tatara ejareocte mârâc motecfâc‐jeŋic bâzi rikec‐jopaniŋte mana‐jarepo hâcne. No hâcne Wofuŋ jukopac, jaŋe i mana taraniŋte iŋuc epo.
27 “O ŋicte ɋâric, go irec hâcne Israe kikefuŋ dâŋ ʒiŋuc muhuc jazazemec: Wofuŋ Anutuzi kecʒiŋuc mukac: Mamacfâc‐ŋeŋic jaŋe wâc doc bacnuhuc ʒâŋe‐nane musoriŋkembiŋ.
28 No mâreŋ biŋe qajarehuc mupaŋke‐jarepo ira jowac‐jopape fisirâ mâreŋ toŋne me jâc fie ruruckekicne honembiŋ sâc ira bâzi rikerâ nemuɋâŋ jaŋere taha wiac gâcne râehuc maŋbâiŋ enarembiŋ. Jaŋe ira hâcne hosâc âsu biaŋ rikehuc waiŋzi taha bâzi hoŋkembiŋ.
29 Eme no ʒiŋuc muhuc wio‐jarepo: Ŋoŋe mo mâreŋ toŋnao fec wahac eeŋgopieŋ? Eme jaŋe mâreŋ irec ʒâŋe ‘Furu Mâreŋ’ mumbiŋzi muhuc jueŋgopieŋ jaha.
30 Irec Israe kikefuŋ ʒiŋuc jazazemec: Wofuŋ Anutuzi kecʒiŋuc mukac: Ŋoŋe mamacfâc‐ŋeŋic jaŋere sâc bâfuarâ maŋŋeŋic hegâpârehuc ɋâŋ wiac‐jeŋic mamakâcnere erâ qâsoriezo muŋgopieŋ me?
31 Ŋoŋe taha wiac‐ŋeŋic râehuc me motecfâc‐ŋeŋic bâzi rikec‐jopahuc nemuɋâŋfâc‐ŋeŋic kiŋaŋ qajarerâ maŋŋeŋic hegâpâreeŋgopieŋ hâcne. O Israe kikefuŋ, eme ŋoŋe ʒiŋuczia mu wioc enarezo muŋgopieŋ me? No jujâmbâŋkekopacte mu wioc moc mi enarenʒepieŋ. Wofuŋ Anutu nore dâŋ iŋuc.
32 “Maŋŋeŋicko dâŋ kecʒiŋuc fokac i fârine moc mi fuazejec: ‘Nâŋe ŋicne ŋicne â mâreŋ sâc irec ŋic gurune gurune jaŋere sâc ehuc nemuɋâŋ jâc â qânâzi bakicne araŋ bacnenʒepeneŋ.’ ”
Anutuzi bâtiŋ‐joparâ ehâmo‐jareocmu
33 Wofuŋ Anutuzi kecʒiŋuc mukac: “No jujâmbâŋkekopacte tâpiri wânʒâŋ‐nanere fuŋne bataniŋkerâ aaric mana‐ŋarehuc Wofuŋ eŋarepemu.
34 No aaric mana‐ŋarehuc tâpiri menane bâfeŋnekicnezi ŋicne ŋicne jaŋeraonec â mâreŋ sâc bâtâtiec‐ŋopakicne irecnec bâturec‐ŋopahuc bacŋopa warepemu.
35 Ehuc mâreŋ burocnao ŋicne ŋicne jaŋere ŋondeŋko jowac‐ŋopa rarâ maic‐ŋopahuc dâŋgieo râec‐ŋopapemu.
36 No mamacfâc‐ŋeŋic jaŋe Aigita mâreŋte mâreŋ burocnao dâŋgieo râec‐jopapo sâc ijaha ŋoŋe eŋarepemu. Wofuŋ Anutu nore dâŋ iŋuc.
37 No gunu‐nane sicnepe irec rurumaŋnao fotâcnehapie wosec‐ŋopahuc eŋarepe raʒiniŋmu.
38 No bâtâc bacŋopahuc fenareeŋgopieŋ jaŋe â râpecnueŋgopieŋ ŋondeŋ‐ŋeŋickonec bârâriec‐jopapemu; no jaba jueŋgopieŋ jaŋe mâreŋ irecnec batarac‐jopapemu. Mâc Israe mâreŋko raraʒi ine mi enʒepieŋ. Iŋuc fuame no hâcne Wofuŋ jukopac i mana taranʒepieŋ.”
39 Wofuŋ Anutuzi ŋoŋere dâŋ kecʒiŋuc mukac: “O Israe kikefuŋ ŋoŋe nore dâŋ qikiŋnezo muŋgopieŋko ra ru sâc nemuɋâŋfâc‐ŋeŋic kiŋaŋ qajareniŋ, mâc taha rârâe â ɋâŋ qâqâtâc araŋ babajare‐ŋeŋic izi tiri ʒâŋe‐nane mocwâc mi hegâpârenʒepieŋ.”
40 Wofuŋ Anutuzi kecʒiŋuc mukac: “Tiri tiki‐nane Israere tikio hâcne mâreŋ ira Israe kikefuŋ ŋoŋe ʒeŋgoma kiŋaŋ qanarenʒepieŋ, ehame no ira aki anonoc eŋarehuc taha wiac‐ŋeŋic â nânâ bâbâsu â wiac‐ŋeŋic gâcne sasawa bâtirikicne i râe‐nareniŋte ŋaza mutâc epemu.
41 No ŋicne ŋicne jaŋeraonec â mâreŋ sâc bâtâtiec‐ŋopakicne irecnec hetumaŋ‐ŋopa‐fârerâ taha‐ŋeŋicte âsu mumundoŋ manahuc ehâmo‐ŋarepemu hâcne. Iŋuc eŋarehuc, no Tiri rune jukopac, irec fuŋne ŋicne ŋicne jaŋere maio bataniŋkepemu.
42 No mamacfâc‐ŋeŋic mâreŋ jare tahac epemurâ mupaŋkepo, Israe mâreŋ hâcne, ira râec‐ŋopape, no hâcne Wofuŋ jukopac, i mana taranʒepieŋ.
43 Eme ŋoŋe ira juhuc eebapa‐ŋeŋic raŋɋanezi maŋŋeŋic bâsâqorembiŋ irec manasunʒepieŋ, ehuc wiac hehesicne ebac embiŋ irec erâ ŋaŋacnere manapie mamakâcne ezejec.
44 O Israe kikefuŋ, no hehesic â eebapa‐ŋeŋic sâqocnere erâ mâcne, ʒâŋe biŋe‐nanere erâ iŋuc eŋarepe, ŋoŋe no hâcne Wofuŋ jukopac i mana taraniŋmu. Wofuŋ Anutu nore dâŋ iŋuc.”
Mâreŋ juwicpec irec findaŋdâŋ
45 Eme Wofuŋte dâŋ norao ʒuhuckerâ ʒiŋuc fuawec:
46 “Ŋicte ɋâric, go juwic mâreŋ maickerâ ŋic uŋ sawaŋ ejarezemec, ehuc Negebe kâte mâreŋte findaŋdâŋ muzemec.
47 Ehuc kâte mâreŋ i ʒiŋuc âzâcnezemec: Go Wofuŋte dâŋ manac. Wofuŋ Anutuzi kecʒiŋuc mukac: Manakic, no gorao ʒoc ruqepemu, eme bâruŋkehuc jâc hâmocne â ɋâricne mâmâc ʒâseŋke‐fâreocmu. Ehuc ʒocbâruŋzi tatarane tâmiric ʒahuc mâreŋ faic â juwic irec ŋic ʒâfitac‐jopaocmu.
48 Ehame ŋic jaŋe ʒeŋgoma ʒiŋuc mana taracnunʒepieŋ: Wofuŋ e hâcne turuŋkeme ʒawec, irec moczi sâcne mi qâhâpoocmu.”
49 Mume kecʒiŋuc mupo: “O Wofuŋ Anutu, ŋic jaŋe nore ʒiŋuc muŋgopieŋ: ‘E kesaic dâŋ sasawa muhuc juekac!’ ”