21
Wofuŋte ʒika momorinehec irec dâŋ
1 Wofuŋte dâŋ norao ʒiŋuc fuawec:
2 “Ŋicte ɋâric, go Jerusalem hae maickehuc tiri ufuŋte uŋsawaŋ dâŋ muzemec, erâ Israe mâreŋte findaŋdâŋ muzemec.
3 Ehuc mâreŋ rune ʒiŋuc jazazemec: Wofuŋzi kecʒiŋuc mukac: Manakic, no râsi eŋarehuc ʒika‐nane becsahackonec unuckerâ ŋondeŋ‐ŋeŋicko ŋic tiŋne â hehesicne jopa‐fârepemu.
4 No iŋuc eŋarepemure ʒika‐nane unuckerâ juwic mâreŋte ŋic mecne, â faic mâreŋte ŋic mecne mâmâc jopa‐fârepemu.
5 Iŋuc ejarepe ŋic jaŋe sasawa ʒiŋuc mana taracnunʒepieŋ: Wofuŋ e becsahackonec ʒika unuckeweczi mocwâc mi esorieocmu.
6 O ŋicte ɋâric, go irec hâcne kio huse ezemec, go ʒâic busâqoc sâko manahuc jaŋere maio kio mamakuc ezemec.
7 Eme ‘Wemocte kio mamakuc ekomec,’ iŋuc wio‐garepie ʒiŋuc jazazemec: ‘No biŋedâŋ manapo irec, biŋedâŋ izi fârinehec eme maŋŋeŋic gâcke‐fâreha meŋeŋic ɋaŋa‐fâreocmu. Erâ hâbi‐ŋeŋic goroŋke‐fâreha dieŋ‐ŋeŋic ŋetara‐fâreocmu. Manaŋgopieŋ, biŋedâŋ i fârio qafâreocmu.’ ” Wofuŋ Anuture dâŋ iŋuc.
8 Eme Wofuŋte dâŋ norao ʒiŋuc fuawec:
9 “Ŋicte ɋâric, go findaŋdâŋ muhuc ʒiŋuc muc: Wofuŋzi kecʒiŋuc mukac:
Ʒika i ʒâmukicne â wokemaŋ ruacnekicne.
10 Ŋic jopazore ʒâmu taeŋkekicne,
erâ bâricneocte manasuhuc
wokemaŋ ruacnekicne hâcne!
Irec wemocko bubiaŋ moc manazo? O ŋokâ‐nane, go bâbâtiŋte kâcbiŋ qaisocke‐fâremeŋ.
11 Irec ʒika i wokemaŋ ruacneniŋte biac râekicne, ʒika qaqa ŋic ere meo feocte biac ʒâmukicne â wokemaŋ ruacnekicne.
12 O ŋicte ɋâric, ʒika izi ŋicfâc‐nane sipiric‐jopaocmu, ehuc Israe ŋic fekicne sasawa jaŋe ŋicfâc‐nane jaŋehec kimiziec‐jopaocmu wâc, irec kio wâuŋa ec. Go irec busâqoc manarâ mesahacge qânʒiŋkezemec.
13 Eesâiczi maic‐ŋopakac, eme ŋoŋe sifu bâbâtiŋte kâcbiŋ qaisockepie eesâiczi sawa mâcne, wiac faic mukicne izi maic‐ŋopa‐fâreocmu hâcne.” Wofuŋ Anutu ere dâŋ iŋuc.
14 “Ŋicte ɋâric, go findaŋdâŋ muc, ehuc me qatec ʒikazi arecne arecne gie bazejec; ʒika i ima sâko bapare ʒika, irec ŋic rârec‐jopahuc imac‐jopazejec.
15 Eme maŋŋeŋic gâckeha ŋic bocjaha waha jopazejec. No ʒika izi sacmotâc‐jeŋic sâc ima bacjopaocte manacnepo. Jei, ʒika i bâricneocte ruacnekicne â sisipiric gie baocte ʒâmu taeŋkekicne.
16 Fâreopec â qanaopec foc fotikic ehuc nâtâcnezejec.
17 Eme no iŋuc jaha me qahuc juhape aaric‐nane tarazejec. Wofuŋ noni hâcne iŋuc mukopac.”
18 Wofuŋte dâŋ norao harierâ ʒiŋuc fuawec:
19 “Ŋicte ɋâric, go Babe ŋicwofuŋte ʒikazi wareocte hata jajahec bacjofazemec, ehame jahe mâmâc jaha mâreŋ mocjahaonec ware fisizepirec. Erâ hata haeopec fuŋkerâ rakacko ira hatare mumutâc ma âkendâŋnezemec.
20 Ʒikazi ŋifec Amoŋŋic jaŋere hae qizec Raba â ŋifec ine Juda mâreŋko â Jerusalem hae sanaŋko fisiocte iŋuc hâcne ezemec.
21 Babe ŋicwofuŋ e hata sosohoc ekopirecko hatare fuŋne manaocte ɋâsâi qaocmu, ehuc tepe motec hehesac‐jopaocmu, â ɋâŋ qâqâtâc mu wioc ejarehuc qowi bugâpâcne honeocmu.
22 Eme mefârenao ɋâsâi irec seroŋ wiac foocmu izi Jerusalem hae maickerâ foocmu; e ira hâcne ojowa sâko qahuc aŋara heocte â sac ââke mârâŋ tuŋ râeocte â somâ bapare ʒae wiac â mâreŋ toŋne baocte wiac iŋuc fuaocmu.
23 Mâc Israe ŋic jaŋe ine mumupaŋ dâŋ sanaŋne mumbiŋte findaŋdâŋ irec manapie burecne ewec. Anutu eki ine kiŋjeŋicte manasuhuc râsi jaŋere meo feniŋte mutaraocmu.
24 “No Wofuŋ Anutuzi dâŋ kecʒiŋuc mukopac: Ŋoŋe fenarehuc eebapa hehesicnere manasu‐narembiŋ, â sâqocne‐ŋeŋic i eebapa‐ŋeŋicko fua taniŋkewec. Ŋoŋe juju‐ŋeŋic hehesicnere manasu‐narembiŋte râsi jaŋere meo fefâreniŋmu.
25 O Israe ŋic fekicne, miti tâmiric â ŋic sindaŋne gore dameŋ taraha bâbâtiŋzi maicgukac hâcne.
26 Wofuŋ Anutu no gore ʒiŋuc mukopac: Go du kakambu â eri hendiŋge hetarazemec; wiac ʒiŋuczia fokac i juku iŋucnea mi foocmu. Wiac waharâ fokac i juku bafaharezo, â wiac ferâ fokac i juku bawahazo.
27 No wiac ima samaki bape foha irec rune jâmbâŋ fuazejec; fuame wiac sasawa e râcne‐fârepemu.
Amoŋŋic jaŋere mumutara dâŋ
28 “O ŋicte ɋâric, go findaŋdâŋ muhuc ʒiŋuc muzemec: Wofuŋ Anutuzi Amoŋŋic mu âke sisic‐jeŋicte manasuhuc ʒiŋuc mukac: Jei, ʒika i sisipiric gie baocte becsahackonec unuckekicne, erâ bâbâric iŋucne bâricneocte wokemaŋ ruacnekicne.
29 Ehame ŋic jaŋe maŋko fuac dâŋzi eatucguhuc findaŋdâŋ burecne gazambiŋ. Eme ʒika i ŋic miti tâmiric â sindaŋne bâbâtiŋ dameŋ‐jeŋic maickekacte jaŋere upeo feme taraocmu.
30 Irec ʒika i mocwâc fofo‐ticnao esoriec. Eme fuameŋ mâreŋ ira hâcne dâŋge mutarapemu.
31 Ehuc no aaric‐nanere ʒoc i faigao ficnepe ʒaocmu, erâ ŋic sindaŋne sisipiric gie bajâmbâŋkeeŋgopieŋ jaŋere meo râecgupemu.
32 Go ʒocte biŋe ezemec, ehame socge i mâreŋgaoa wahazejec; eme ŋiczi go mocwâc mi manasucgunʒepieŋ. Wofuŋ noni hâcne iŋuc mukopac.”