23
Samaria â Jerusalem hae jahere dâŋ
1 Wofuŋte dâŋ norao ʒiŋuc fuawec:
2 “O ŋicte ɋâric, go manakic, mârâc jaha ŋokac jajahec jupic, jahe neŋgoc mocjahazi rocjofawec.
3 Jahe Aigita mâreŋko ŋokac ʒeŋoŋ juhuc sasec gie bapic. Ehuc mana‐jarepire ŋic jaŋe susu‐jekicko ro fârec embiŋ.
4 Mârâc fufua ere ʒâŋe Ohola â qoticnere ʒâŋe ine Oholiba. Eme jahe nore biŋe erâ naru motec bâfua‐narepic. Ohola ʒâŋe i Samariare â Oholiba ʒâŋe i Jerusalemte mukicne.
Ohola ere dâŋ
5 “Ohola e nore biŋe jaha juhuc sasec gie bawec, e Asiria ŋic jorocfâc‐ticne boc honebâc‐jopawec.
6 Asiria gawamaŋ ŋic fekicne â momori ŋic micne jaŋe ŋaqi qoruc bâbâroŋzi furi sâko roju jumbieŋ, jaŋe ŋic socɋârizi hawari biaŋ sasawa, erâ becâsicko juju ŋic.
7 Asiria ŋic bâwosâec‐jopakicne i jaŋe sasawa honebâc‐jopawec hâcne, ehuc ɋâŋ qâqâtâcfâc‐jeŋic bacjopa juhuc maŋ mamanasu‐ticne hegâpârewec.
8 Aigita ŋic jaŋehec sasec gie bahuc juwec i wâc mi behewec. E socɋâri juhame ŋic jaŋe ehec juhuc susu‐ticnao ro fârec erâ erao sasec gie bambiŋ.
9 Eme no irec hâcne Asiria ŋic jorocfâc‐ticne hone sasec ejarewec jaŋere meo râepo.
10 Jaŋe ine ŋaqi heunuckecnepie biuctac juwec, jaŋe naru motecfâcne bacjopa wisembiŋ, e jahacne ine qâhâmombiŋ. Iŋuc ehuc okacne bazucnehapie ŋokac gâcne jaŋe mu âke sisic ecnembiŋ.
Oholiba ere dâŋ
11 “Iŋuc fuame qoticne Oholiba eki honewec. Hone‐bipiehuc hahac‐ticnezi sasec gie bahuc juwec irec sâc sirickehuc bawec.
12 E iŋuc jaha Asiria gawamaŋ ŋic fekicne â momori micne ʒikare wiac râe jumbieŋ jaŋe honebâc‐jopawec. Jaŋe ŋic socɋârizi hawari biaŋ sasawa, erâ becâsicko juju ŋic.
13 Eme no qoticne honepe e iŋuc jaha wâwânâŋhec ewec, hahac qo jahe eebapa‐jekic mocjaha fowec hâcne.
14 Erâ Oholiba e ine sasec gie‐ticne ʒuhuckerâ bawec. E Kaldea ŋic jaŋere hawari peŋ bâbâroŋzi qânâsac‐jeŋicko bapie fome honewec.
15 Jaŋe ombâŋ‐jeŋicko becsahac jomambiŋ, â qizec‐jeŋicko duʒora hepie huwec, jaŋe momori micne sasawa, erâ Babeŋic Kaldea mâreŋko fuambiŋ iŋucne.
16 E jaŋe hâcne honebâc‐joparâ Kaldea mâreŋ‐jeŋicko kiŋaŋ sorec‐jopame rambiŋ.
17 Eme Babeŋic jaŋe fisirâ ehec fohuc sasec gie bambiŋ, ehuc jaŋe bâsâqorekupie jaŋere takickeme râpec‐jopawec.
18 E sasec gie‐ticne mimi tâmiric tâtâcko iŋuc bahuc juhame no hahac‐ticnere takicnuwec, iŋuc jaha ere takicnume râpeckepo.
19 Eki ine Aigita mâreŋko socɋâri juhuc sasec gie bawec, irec manasuhuc sau gie‐ticne ʒuhuckerâ bawec.
20 E sasec ŋicfâc‐ticne doŋgi â becâsic ŋicne jaŋere sâc jumbiŋ jaŋere mâretec ecnewec.
21 Aigita ŋic jaŋe susuge ro fârec ehapie go socɋâri juhuc sasec gie bameŋ, irec manasuhuc mocwâc egarewec.”
Babe ŋic jaŋe râsi fisicneniŋmu
22 O Oholiba, Wofuŋ Anutu e irec hâcne kecʒiŋuc mukac: “Manakic, sasec ŋicfâcge jaŋere takicgume râpec‐jopameŋ jaŋe hâcne ejarepe mâreŋ ŋifec â ŋifec irecnec râsi fisi‐gareniŋmu.
23 Babeŋic â Kaldea ŋic sasawa, Pekodo â Sowa erâ Koa hae mâreŋkonec ŋic, erâ Asiria ŋic sasawa, ŋic iŋuczi fisiniŋmu hâcne. Jaŋe ŋic socɋâri sahac hawari biaŋ, jaŋe gawamaŋ ŋic kâcɋene â kia sâko, momori micne â momori ŋicguru, jaŋe becâsicko rara ŋic sasawa.
24 Jaŋe faic mâreŋkonec ʒika keretac‐jeŋic â ŋic guru sâko jaŋehec fisiniŋmu, jaŋe maro kâcɋene â piticne erâ aeŋdu rojuhuc mâreŋ ŋifec â ŋifeckonec râsi fisi‐gareniŋmu hâcne. Ehame jaŋe sâcmutâc‐jeŋicte sâcko dâŋ mutara‐gareniŋte mana‐jarepemu.
25 Eme no aaric mana‐garepe wiac qacne gâpâcne egareniŋmu. Jaŋe sâkege â hazecge hetâc qâtâcnepie nâfocnefâcge jaŋe ʒikare biŋe eniŋmu. Jaŋe naru motecfâcge amec‐jopa rahapie ʒanʒaŋnefâcge jaŋe ine ʒocte biŋe eniŋmu.
26 Jaŋe ŋaqi qorucge hetarahuc eri wiacge gowac rofâreniŋmu.
27 Wiac i mupe fua‐gareha Aigita mâreŋko fuŋkerâ sasec â sindaŋ wiac ebac ehuc juwefumeŋ i arictac efârezejec. Ehame go Aigita ŋic jaŋerao ʒâŋe mocwâc mi fizemec â jaŋere mocwâc mi manasuzemec.
28 Wofuŋ Anutuzi dâŋ kecʒiŋuc mukac hâcne: Manakic, qaisoc‐jopahuc juekic â takicgume râpec‐jopameŋ jaŋere meo râecgupemu hâcne.
29 Jaŋe qaisocguhuc wâcwiac hure hemârec emeŋ i gowac rofârepie biuctac erâ domazemec, ehame sasec giere fuŋne fua taniŋkezejec.
30 Go nemuɋâŋ araŋ bajarehuc wâwânâŋhec emeŋte â ŋicne ŋicne jaŋehec sasec gie bameŋte wiac iŋucne hâcne faigao feocmu.
31 Hahacgezi hata hehesicne âtewec ijaha âtemeŋte ere ʒâic fârore râqâc gore meo râepe fezejec.”
32 Wofuŋ Anutuzi kecʒiŋuc mukac:
“Go hahacgere râqâc ʒoricne â kâcɋene
irecnec ʒâic fârore wiac nâhuc juzemec,
ehame mu gâgâwi â mu ruruc egarenʒepieŋ,
râqâc i fusucmarâ fokac;
33 irec nâku maŋsifuc egareme ʒâic busâqoc bâfuacmu.
Hahacge Samaria ere râqâc hâcne
i ʒâic serereŋ â sisipiricte râqâc.
34 Maŋnao wiac fokac i nâku nâzickehuc
qizec susucge unuckezemec,
erâ susuge hetâcnezemec.
Wofuŋ Anutu noni iŋuc hâcne mupo.
35 Irec Wofuŋ Anutu noni dâŋ kecʒiŋuc mukopac: Go nore nikecgume râpecnumeŋte sasec â sindaŋgere okacne faigao fezejec.”
Hahac qo jahe kiŋ bahac bâfuapicte okacne fisi‐jacteocmu
36 Eme Wofuŋzi dâŋ kecʒiŋuc nazawec: “Ŋicte ɋâric, go Ohola â Oholiba jahere dâŋ sâcne mutaracmu me? Go eebapa‐jekic mamakâcne i mutaniŋke‐jactezemec.
37 Jahe boe sau gie bapic, erâ ʒika qahuc soc hoŋkepic. Nemuɋâŋfâc‐jekic jaŋehec sasec gie bahuc motecfâc‐jekic nore biŋe fuambiŋ jaŋe taha rikec‐jopapic.
38 Erâ ʒuhuckerâ ʒiŋuc enarepic: Ʒoaŋ gie bapa ijaha tirific‐nane bâsâqorehuc sabata hombaŋ‐nane qâsuapic.
39 Jahe naru motecfâc‐jekic nemu jaŋere biŋe hezuc‐jopapic ʒoaŋ ijaha tirific‐nane wâwânâŋ ecnenicte ira fepic. Manakic, jahe nore ficko wiac iŋuc hâcne epic.
40 Erâ ʒuhuckerâ ŋic mâreŋ ʒorickonec fisiniŋte kiŋaŋ sorec‐jopapire rambiŋ. Eme jaŋe fisipie jaŋere erâ opâ ruahuc ʒâŋe mai‐jekic jâwec ruacnerâ sahac‐jekic erickepic.
41 Erâ ŋeŋe biaŋnao ŋehuc maŋfuŋ‐jekicko tebo moc herâ hosâc âsu â wokemaŋ‐nane râepire ŋewec.
42 Ehame haeo ojowa fânâŋ sâko fuame ŋic omane â Saba mâreŋ burocnaonec ŋic maŋsifuchec mâmâc ejarepire fisimbiŋ. Eme ʒorickonec fisimbiŋ jaŋe ŋokac jahere meo maŋguc kisueŋ wiac hejactepie fewec â qizec‐jekicko eri hendiŋ biaŋ hejactepie huwec.
43 “Eme no irec ʒiŋuc mupo: Jei, ŋokac e boe sau gie bawefuhuc juku ŋokac qizec ewec. Eme ŋic jaŋe ehec sasec gie mocwâc baniŋmu.
44 Jaŋe erao sasec gie baniŋte fisimbiŋ, sasec ŋokac Ohola â Oholiba jaherao fisimbiŋ hâcne.
45 Ŋic tiŋne jaŋe ine boe sau ŋic â ʒika qaqa jaŋere dâŋ sâcmutâc dâŋko fokac irec sâcko dâŋjekic mutara‐jacteniŋmu. Jahe boe sau gie bapa â ʒika qaqa ŋokac hâcne.”
46 Wofuŋ Anutuzi dâŋ kecʒiŋuc mukac: “Ŋic guru gâcne jaŋe fisi‐jacterâ imac‐jofahuc wiac‐jekic jofac rofârenʒepieŋ.
47 Jaŋe qânâzi hecjofahuc ʒikazi qâtâc bâtâc‐jofanʒepieŋ, ehuc naru motecfâc‐jekic qâhâmoc‐joparâ fic wiac‐jekic ʒoczi turuŋkepie ʒafârezejec.
48 No wiac iŋucne hâcne mupe fua‐jacteme mâreŋ ira sasec gie bapa i omaezejec, ehame ŋokac gâcne jaŋe honerâ jahe sasec gie bapic ijaha banʒipiŋte hâwic‐jopazejec.
49 Ŋohe sasec gie bajupirec â nemu wiac araŋ bajarehuc kiŋ bâfua jupirec irec okacne fua‐ŋactezejec. Ehame no hâcne Wofuŋ jukopac i mana tarazepirec.”