24
Kuʒi du âtekac irec kesaic dâŋ
1 Jara namba 9 irec mosa 10 â irec ʒoaŋ gie bapa 10 jaha ehame Wofuŋte dâŋ norao kecʒiŋuc fuawec:
2 “Ŋicte ɋâric, go ʒoaŋ gie bapa ʒirec ʒâŋe qâreŋkec. Babe ŋicwofuŋ e ʒoaŋ ʒira hâcne Jerusalem hae somâckekac.
3 Ehame kikefuŋ qaqatarahec jaŋere kesaic dâŋ moc kecʒiŋuc muzemec: Wofuŋ Anutuzi dâŋ kecʒiŋuc mukac:
Go kuʒi ʒocko hetec ŋeha opâ qatec huoc.
4 Erâ qowi dâkâne biaŋne ŋefacne â ɋawene hâcne
i râetec huha
siecne bâwosâekicne izi bâfusucmazemec.
5 Go qowi biaŋne jâmbâŋ moc rorâ hezu rikec ezemec,
erâ kuʒi rurumaŋnao ʒoc ruqetec,
siecne mecne biucne mecne mâmâc ʒazejec.”
6 Irec Wofuŋ Anutuzi dâŋ kecʒiŋuc mukac: “Jei, soc hohoŋke hae! Jei, kuʒi hufeŋ bakicne! Hufeŋ‐ticne moc mi omaehuc fokac jaha. Irec qowi dâkâne dâkâne furu jaha kuʒionec rozemec.
7 Soc hoŋkewec i haeo fokac jaha, e soczi rufemaŋko huzacte mâreŋko mâcne, qânâ faio hoŋkewec hâcne.
8 Maŋnane bâruŋkeme okacne bazucnepemurâ mâreŋko mâcne, qânâ faio soc hoŋkeme tâtâc foocte manacnepo.
9 Irec hâcne Wofuŋ Anutu noni ʒiŋuc mukopac: Jei, soc hohoŋke hae, no ʒocfiki sâko bapemu.
10 Irec ʒoc bocjaha guruckerâ ruqetec ʒaoc, eme biuc i ʒâdockeha opâ sicne hoŋketec raha siecne ʒâgâpârezejec.
11 Iŋuc fuame kuʒi tacne ʒocko hetec ŋehuc fârone ezejec; ehame kuʒi sahacne bâruŋkeme maŋnao wânâŋ wiac fokac i ʒâtâcneme hufeŋ‐ticne wâc omaezejec.
12 No ʒâic gie barâ bâipiepo, ehame hufeŋ sanaŋ‐ticne i mi omaewec.
13 Hufeŋ‐ticne i sasec boe sau hâcne. No ʒure ɋaɋackepemurâ muhape go wâwânâŋgere erâ mi ɋaɋackemeŋte wâwânâŋhec jaha juhaŋtec okacne bazu‐garepe kimbeŋ‐nane tarazejec.
14 Wofuŋ noni hâcne iŋuc mukopac. Irec dameŋne maickeme ejâmbâŋkepemu. No busâqoc mana‐garehuc moc mi akicgupemu, â maŋnane wâc mi risieocmu. Aricne, no juju â eebapagere sâcko dâŋ mutara‐garepemu. Wofuŋ Anutu nore dâŋ iŋuc.”
Eʒekie ŋonâŋ‐ticne hâmowec
15 Eme Wofuŋte dâŋ norao ʒuhuckerâ ʒiŋuc fuawec:
16 “O ŋicte ɋâric, manakic, no ŋonâŋge maŋzi jauŋkeekic e ututuŋ jaha gowac ropemu. Ehame go sifu ʒâŋeucge wahame ki mamakuc mi ezemec.
17 Kio ŋâŋâtâc kâcɋene mi ehuc soŋgâŋ wâc mi qazemec. Duʒorage â kikehuhu hetec huoc, mecʒâwâge mi sâockezemec â soŋgâŋ nânâ râe‐garepie mi nâzemec.”
18 No furicte ŋic ŋokac dâŋ jazapo â hae owâeme ŋonâŋ‐nane hâmowec. Eme hae fureme dâŋ nazakicne irec sâc epo.
19 Eme ŋic ŋokac jaŋe ʒiŋuc nazambiŋ: “Go wiac keci ekomec irec fuŋne sâcne nâzâcmu me?”
20 Iŋuc mupie ʒiŋuc jazapo: “Wofuŋte dâŋ norao ʒiŋuc fuawec:
21 ‘Go Israe kikefuŋ jaŋe jazazemec: Wofuŋ Anutu e ʒiŋuc mukac: Manaŋgopieŋ, no tiri ufuŋ‐nane hegâpârepemu. Ŋoŋe ira hâcne roweckehuc sasanaŋ bâfuambiŋ â ʒâŋe‐ŋeŋiczi hone ʒiziwembiŋ, erâ maŋ manasu‐ŋeŋic ira râepie fowec. Naru motecfâc‐ŋeŋic ira hetarac‐jopambiŋ jaŋe ʒikare biŋe enʒepieŋ.
22 Iŋuc fua‐ŋareme ŋoŋe noni wiac epo irec sâc jaha enʒepieŋ. Mecʒâwâ‐ŋeŋic mi sâockenʒepieŋ, erâ soŋgâŋ nânâ râe‐ŋarepie mi nânʒepieŋ.
23 Duʒora â kikehuhu‐ŋeŋic hepie huzejec. Ŋoŋe ki mamakuc mi ehuc kiŋŋeŋiczi kidapec‐ŋopame ʒâic busâqoc mamanac enʒepieŋ.
24 Eʒekie e eebapa‐ŋeŋicte maqâreŋ ehame wiac efârewec irec sâc jaha ŋoŋe enʒepieŋ. Eme wiac i fua‐fâreme ŋoŋe no hâcne Wofuŋ Anutu jukopac i mana taranʒepieŋ.’
25 “Eme jaŋe taha ufuŋ sanaŋko roweckehuc sasanaŋ bâfuarâ ʒâŋe biŋehec embiŋ â ʒâŋe‐jeŋiczi hone ʒiziwembiŋ, erâ maŋ mamanasu‐jeŋic râepie fowec i hâcne bârâriehuc naru motecfâc‐jeŋic sipiric‐jopapemu
26 dameŋ ira ʒikare nâfocne moczi fisirâ biŋedâŋ gazaocmu.
27 Eme dameŋ ijaha micge tâcneme nâŋguŋ mocwâc mi juhuc dâŋecmu. Ehame go jaŋere maqâreŋ ehaŋte jaŋe, no hâcne Wofuŋ jukopac i mana taraniŋmu.”