26
Tiro haere okacdâŋ
1 Eme jara 11 irec mosa wâŋte gie bapa wâŋ jaha ira Wofuŋte dâŋ norao kecʒiŋuc fuawec:
2 “Ŋicte ɋâric, go manakic, Tiro hae e Jerusalemte ʒiŋuc muwec: ‘Sowine, ŋicne ŋicne jaŋere motâc foweczi omaewec. Hae i imackekicnere motâc sâko aŋke‐narewec, irec no mâriri sâkohec epemu.’
3 Irec Wofuŋ Anutu no kecʒiŋuc mukopac: O Tiro hae, manakic, no râsi egarekopac, ehuc hâweczi siri‐ticne beheme wefuekac irec sâc ŋicne ŋicne ejarepe râsi fisi‐garenʒepieŋ.
4 Fisirâ qânâsacge qanʒaŋnehuc ficʒorage hetâtienʒepieŋ; ehame no mâreŋge guec‐ticne âkehockepe sawa fuarâ fozejec.
5 Hae e nuc iŋucne foha ŋic jaŋe ira wasaŋ‐jeŋic râe fâretiŋ epie ŋicne ŋicne jaŋere mafa mateŋ ezejec. Wofuŋ Anutu noni hâcne iŋuc mukopac.
6 Hae piticfâc‐ticne mâreŋ sâkoo ŋeraŋgopieŋ jaŋe ine ʒikare biŋe enʒepieŋ. Iŋuc fua‐jareme jaŋe, no hâcne Wofuŋ jukopac i mana taraniŋmu.”
7 Wofuŋ Anutuzi dâŋ kecʒiŋuc mukac hâcne: “O Tiro hae, no mupe faic mâreŋkonec ŋicwofuŋ jaŋere ŋicwofuŋ, Babe ŋicwofuŋ Nebukaneza hâcne, e becâsic â keretac erâ becâsicko rara ŋic â momori guru dindiŋ jaŋehec fisi‐gareocmu.
8 E hae piticfâcge mâreŋ sâkoo ŋeraŋgopieŋ jaŋe ʒikazi jopa‐fâreocmu; e râsi egarehuc somâcgurâ mâreŋ toŋne bagareocmu, ehuc marozi sâsâoc râe‐gareocmu wâc.
9 E qânâsacge ââke mârâŋ tuŋzi âeckekume rândiŋkeocmu â râric‐ticnezi ficʒorage sasawa hetâc qâtâtieocmu.
10 Becâsicfâc‐ticne guru sâko jaŋe gasackerâ warepie rufezi sâocguocmu. Hae moc ima bakicne foha feeŋgopieŋ irec sâc fohaŋtec haemaŋgao hefâha becâsic â keretac wiac‐ticnere fânâŋte erâ haesacge ɋiɋiteckeocmu.
11 Becâsicfâc‐ticne jaŋe hae hata wiacge âtenʒaŋnehapie ŋicfâcge ʒikazi jopa‐fâreme qânâ wâtuŋfâcge sanaŋne jaŋe mâreŋko rândiŋke qafâreniŋmu.
12 Jaŋe moneŋ mafa wiacge gowac rofâreniŋmu â wiac hure hemârec eekic izi jaŋere mafa mateŋ eme bawiseniŋmu. Jaŋe qânâsacge henʒaŋ qanʒaŋneniŋmu â fic wiacge biaŋne i hetâc qâtâtieniŋmu, ehuc qânâ â katapa erâ jawa wiac gâcne i hâwecko behepie hufâreocmu.
13 Eme ʒeri bubiaŋ fânâŋ‐ŋeŋic bâniniŋkepe ŋiczi mocwâc mi mananʒepieŋ.
14 No hae ʒoŋagao mupe haroŋaŋ sawa fuarâ fozejec, eme ira ŋiczi wasaŋ‐jeŋic râe fâretiŋ ehuc junʒepieŋ. Hae i mocwâc heɋârerâ mi bâpiaŋkezo; Wofuŋ noni hâcne iŋuc mukopac.”
15 Wofuŋ Anutuzi Tiro hae dâŋ kecʒiŋuc âzâcnekac: “Manakic, sisipiric dameŋge maickeme haemaŋgao ʒika qahuc ŋic jopapie ki owa fuame nucne nucne jaŋe irec fânâŋte ɋiɋiteckeniŋmu.
16 Iŋuc fuame hâwecmecko ŋic fekicne juraŋgopieŋ jaŋe eri ŋeŋe‐jeŋickonec waharâ eri qaraweŋ‐jeŋic hetaraniŋmu, ehuc mateŋ qonaŋkerâ ɋarac ɋarac qaniŋmu. Jaŋe honecgurâ bipic tatara ejareme mâreŋko ŋehuc fâfâre hehejac eniŋmu.
17 Ehuc gore erâ makuc gae moc ʒiŋuc muhuc hefuaniŋmu:
‘Jei, hae ʒâŋe biŋe sâkohec, go hâwecmecko ŋehuc
weniŋuc erâ sipirickehuc omaemeŋ.
Go â ŋicfâcge ŋoŋe hâwecko rac warec ehuc
tâpiri‐ŋeŋicte fuŋne bataniŋke jumbieŋ.
Ehuc mâreŋ sâkoo bataniŋkepie,
ŋic jaŋe ŋoŋere hâwic‐jopa jujec.
18 Ʒi ine sisipiric dameŋge maickeme
hâwecmecko ŋic juraŋgopieŋ
jaŋe bipic tatara ejarekac,
â nucne nucne jaŋe gorao ima sâko fuawec i honerâ fâfâreŋgopieŋ.’ ”
19 Wofuŋ Anutuzi dâŋ kecʒiŋuc mukac hâcne: “No ima bacgupe hae sâko gâcne jaŋe sesuctac fuarâ foraŋgopieŋ irec sâc jaha fozemec, no hâwec sâko ecnepe wefurâ ʒâkâŋ‐ticnezi qâurucguocmu.
20 Erâ ŋic mârâc jaha juku hâmorâ hâmoc haeo humbiŋ jaŋerao wâc sârocgupe huzemec, ehuc mârâc hâmombiŋ jaŋehec mâreŋ jujuwicnao hae mârâc jaha ima bacjopakicne ira hurâ juzemec. Iŋuc fuame ŋic ɋâricne jaŋehec mocwâc mi juzemec, â gorao ŋic mocwâc fuarâ mi junʒepieŋ.
21 No bâsirowecgu‐jâmbâŋkepe omae‐fârezemec. Eme ŋic jaŋe basacgu‐bipiehuc sifu mocwâc mi bâfuacgunʒepieŋ. Wofuŋ Anutu nore dâŋ iŋuc.”