27
Tiro haere makuc gae
1 Wofuŋte dâŋ norao ʒuhuckerâ ʒiŋuc fuawec:
2 “O ŋicte ɋâric, go Tiro haere makuc gae moc hefuac.
3 Ehuc Tiro hae hâwecmecko ŋeekaczi mâreŋ sâc ŋicne ŋicne â nucne nucne jaŋehec âbârâ gie baekac e ʒiŋuc âzâcnec: Wofuŋ Anutu e dâŋ kecʒiŋuc mukac:
“O Tiro hae, go kecʒiŋuc mumeŋ:
‘No wokere sâc biaŋne jâmbâŋ.’
4 Giegaŋge i hâwec ʒâʒâŋiŋko fokac;
gieŋicfâcge jaŋe sahac hawarige basarickehuc bambiŋ.
5 Paraŋ wiacge i Seniri mâreŋkonec bizojâczi bafârembiŋ;
â jâmânere ine Lebanoŋ tikionec jâmâzâc rombiŋ.
6 Foige i Basaŋ mâreŋkonec boriŋjâc he fasaec embiŋ;
â wokere maŋne ine Kipiro nuckonec jâczi bambiŋ,
ehuc elefaŋte ʒuŋenezi ba eric embiŋ.
7 Aigita mâreŋkonec qoruc qâreŋ biaŋhec
izi rac bapie mage ewec;
â woke bupune ine Kipiro nuckonec
qoruc furi sâko bâbâroŋ â bugeneheczi ɋâtâmbiŋ.
8 Sidoŋ â Arawada haeonec ŋic jaŋe
foi qaqafâcge erâ juhapie,
gahacne ŋic mepapac jaŋe guriŋ bapafâcge erâ jumbiŋ.
9 Gebali haeonec ŋic kâcɋene â ŋic mepapac jaŋe
gore maŋko juhuc kikisuge sâfâzi ʒimickembiŋ;
Woke sasawa â ŋicfâc‐jeŋic jaŋe gorao fisirâ,
gohec âbârâ gie bambiŋ.
10 “Perisia â Ludi â Puti ŋic jaŋe ʒikaŋicfâcge erâ jumbiŋ, jaŋe maro erâ aeŋdu wiac‐jeŋic gorao hepie ŋehuc juwec; jaŋe hâcne ʒâŋe biŋege fuaocte giene bambiŋ.
11 Arawada haeonec ŋic jaŋe go gahacne ŋicfâc jaŋehec ruc bapa ŋic erâ jumbiŋ. Ehame Gamada ŋic jaŋe ficʒorage hâŋ bafekicne ira ferâ ŋembiŋ, ehuc maro‐jeŋic qânâsacko râepie qâfeŋneme hawari biaŋge fuawec.
12 “Go mafa mâririge fofo dunduŋ fogarewecte Tarasisi ŋic jaŋe gohec âbârâ gie bambiŋ, ehuc siliwa, aeŋ â wapa erâ led izi goraonec wiac gâcne furine bambiŋ.
13 Jawaŋ, Tubali erâ Meseke ŋic jaŋe gohec wiac nareŋ gareŋ embiŋ; jaŋe goraonec wiac furine baniŋte kiŋaŋ qaqa â aeŋ bâbâroŋzi râqâc wiac bakicne i amec‐jopa fisimbiŋ.
14 Bete‐Togarama mâreŋkonec ŋic jaŋe goraonec wâcwiac kitâcne‐jareocte becâsic â doŋgi bacjopa fisimbiŋ.
15 Rodo nuckonec ŋic jaŋe gohec wâc nareŋ gareŋ embiŋ, ehame hâwec mâreŋte ŋicne ŋicne siricfâcge jufârembiŋ jaŋe goraonec wiac furine baniŋte elefaŋte ʒuŋe â bonejâc wiac bafisi‐garembiŋ.
16 Go mafa mâririge fofo dunduŋ fogarewecte Edomŋic jaŋe gohec âbârâ gie bahuc jumbiŋ, ehuc goraonec wiac i qânâ â qoruc furi sâko â qoruc qâreŋ biaŋ erâ qoruc hahameŋne â kubu wiac erâ qânâ furi sâko bâbâroŋ izi furine bambiŋ.
17 Juda â Israe ŋic jaŋe gohec nareŋ gareŋ ehuc goraonec wâcwiac i padi â oliwa â jâmbo hândâŋne erâ baŋac â wokemaŋ wiac izi furine bambiŋ.
18 Damasko ŋic jaŋe gohec âbârâ gie bambiŋ wâc, ehuc wiac hawari fuŋne fuŋne fogarewec i Heliboŋ mâreŋkonec waiŋ â lama kanʒaŋ wiac izi furine bambiŋ.
19 Wedaŋ â Jawaŋ ŋic jaŋe Uʒali mâreŋkonec aeŋ wiac ba akic ekicne bafisi‐garembiŋ, ehuc musijâc uucne â wiac âsu biaŋ gâcne i goraonec wiac furi baniŋte bafisimbiŋ wâc.
20 Dedaŋŋic jaŋe ine becâsicko ŋeŋere qoruc wiac bafisi‐garembiŋ.
21 Arabia ŋic â Kedara ŋic fekicne jaŋe gohec nareŋ gareŋ eniŋte lama bulimakao â noniŋ wiac amec‐jopa fisimbiŋ.
22 Seba â Rama haeonec ŋic jaŋe goraonec wiac furine baniŋte wiac âsu biaŋ fuŋne fuŋne â qânâ furi sâko erâ gol bafisimbiŋ.
23 Haraŋ, Kane, Edeŋ, Asihuru â Kilimadi ŋic jaŋe gohec âbârâ gie bambiŋ wâc.
24 Jaŋe ŋaqi qoruc biaŋne â ŋaqi ʒora qoruc furi sâko â qâreŋneheczi bakicne erâ ɋâriŋko rurumac qoruc foforierâ muczi basanaŋkekicne i bafisi‐fârembiŋ.
25 Tarasisionec woke jaŋe wiac i sasawa furire biŋe bafisi‐gare jumbieŋ hâcne.
Tirozi wokere sâc juku omaewec
“Iŋuc egarepie mafa mâriri sâkohec etec ʒâŋe biŋegezi
hâwecne hâwecne sâcke‐fârerâ fowec.
26 Foi qaqa ŋicfâcge jaŋe foicgupie hâwec ʒâʒâŋiŋko rameŋ.
Ehame ʒoaŋ wewefunaonec mâŋâŋzi fisirâ qanʒaŋguwec.
27 Eme mafa mâririge mecne nareŋ gareŋ eere mafa wiac mecne,
wokeŋic â guriŋ bapa ŋicfâcge mecne,
woke ʒiʒimic ŋicfâcge mecne
nareŋ gareŋ gie bapa ŋicfâcge mecne,
momorifâcge gohec jumbiŋ mecne,
erâ ŋic gâcne gohec jumbiŋ jaŋe sasawa
sisipiric dameŋge maickeme
hâwec fâhâŋnao hufârembiŋ.
28 Guriŋ bapafâcge jaŋe ki owa epie
mâreŋzi ɋiɋiteckewec.
29 Ehame foi qaqa ŋic jaŋe
woke‐jeŋickonec tararâ waha‐fârembiŋ.
Wokeŋic â guriŋ bapa ŋic sasawa
jaŋe moŋgeŋko ferâ domahuc
30 gore erâ kio ŋâŋâtâc ehuc owa ruruckembiŋ.
Jaŋe rufe fiapie fai‐jeŋicko feme
ʒafemaŋko fohuc risimbine qambiŋ.
31 Jaŋe gore erâ qizec‐jeŋic utu pârâc bambiŋ,
â mateŋ qonaŋke‐fârembiŋ,
ehuc gore erâ wâuŋa qahuc ki mamakuc embiŋ.
32 Jaŋe iŋuc ehuc gore makuc gae moc ʒiŋuc hefuambiŋ:
‘Mozi Tirore sâc
hâwec ʒâʒâŋiŋko moc sipirickewec?
33 Go hâwecko rac warec erâ nareŋ gareŋ gie bahuc
ŋic bocjaha bubiaŋ qajaremeŋ;
mafa mâririge ɋâfoŋne foweczi
mâreŋne mâreŋne ŋicwofuŋ dope hutuŋ ejaremeŋ.
34 Ʒi ine hâwec sirizi qanʒaŋgume,
hâwec fâhâŋnao hujâmbâŋkemeŋ;
ehame furi bapare wiac â wokeŋic
sasawa jaŋe gohec mâmâc hufârembiŋ.
35 Irec hâwecmecko ŋic ŋec juc eeŋgopieŋ
jaŋe honecgurâ bipic tatara ejare‐fârekac;
ŋicwofuŋfâc‐jeŋic jaŋe fâfâre sâqorepie
hawari‐jeŋic memezacne ekac.
36 Ŋic gurune gurune jaŋere âbârâ gie bapa ŋic
jaŋe mu ruruc egareŋgopieŋ;
go ɋeŋfâfâc jaha sipirickemeŋ i,
go omae‐jâmbâŋkemeŋ hâcne.’ ”